Read Khumi Chin EZARA 10 Bible Online

EZARA 10 - Khumi Chin bible

EZARA 10

¹Ezara ly Achura yhm mo y lu meung naimy vo iy, kamngo ahui i chiu sa nai thym khala y, Israela neampacho, neampachy, deaungdichi abawi nai khumi mipuichi ly vo nai tarawi y ni teng y angym u bo.

²Huna nai khala y Elam nupai theung i Jehiela i chapo Shekaniah my Ezara teng y, “Kaichi ly cheng takhra neampachychi hawi apom iy Tameuh i leu tangai y bo. Na i py Israela chengchi i vui athang khai naira awm rai nai ne.

³Vai kaichi ly huni neampachychi hawi cho chanauchi ai khai su ai, nanai kaichi i Tameuh teng y vaineng adeu u ai. Tameuh i leu pei naichi tahm khai u nai, nang hawi takhra khumichi my tau pei nai kamta, kaichi kasa u ai. Kaichi ly Tameuh i Reita leu kamta sa khyp ai mang.

⁴Hini atitichi ai nangmy ka-vo so pi ba. Kaichi ly nang ai kang sabawm u kaleuteu ai. Huna nai y vam parai naimy so ba,” napi.

⁵Hunaibaly Ezara ly pathyp pi nai keungchi i luchi, Levi theaungchi i luchi, mipuichi i luchi teng y Shekaniah my tau pei nai kamta kasa u ai, nanai leu adeu hai bo.

⁶Naibaly ni ly Achura yhm mo i nai ang thau iy Eliashib i chapo Jehohanan i takun mang y chei iy, pri palara i vawi ali teang nai khumichi i leu atangai y nai molam y, vumtorei ati sai py cho y naimy tangam bo.

⁷Naibaly pri palara i vawi ali teang nai khumichi ly peang nai keungchi hawi mipuichi my leu pei nai kamta, kani thomrei sala y Jerusalem mary y tym angym ai nai tla.

⁸Tym angym y nai khumichi ly nichi teng i awm nai vawnsaichi la pi pawn veng iy, Israela cheng theaung theung i nai py pala vui ai, nanai Jerusalem mary hawi Juda pri verei y satang ahei hai bo.

⁹Juda hawi Benjamin khu ka-peang theung y awm nai neampacho bawibawichi ly kani thomrei sala y my, takawrei lo kani apomrei kani y Jerusalem mary Achura yhm ly-um y jeu u achu bo. Huna nai khala y khri pa-rei kani taawi. Khumichi ly kani hawi y nai hawi aly len nai meeting molam y py kaso theu u nai ne.

¹⁰Pathyp pi nai keung Ezara ly ang thau iy leu pei. Ezara my, “Nangchi ly leu atangai u y; cheng takhra neampachychi hawi apom u iy, Israela chengchi i tlang tleaung y kamngo tym hai bo.

¹¹Huna nai y nangchi i amsi pajochi i ARENG Tameuh teng y nangmychi i kamngo ahui iy, mymy i kangai su u. Achi i pri theung y nangchi hawi vanrei awm nai cheng takhra khumichi hawi, nangchi i cheng takhra ajuchi hawi py amprei u,” nanai aeu naimy thui pi.

¹²Khumichi my py aeu iy pathang nai ly “Nang i leu pei nai kamta kaichi kasa u ai,” napi.

¹³Na i py nichi my teang, “Hini khumi kanghuchi ly khri pa-rei nawi iy kani py khri pa-rei nai; kaichi ly hini angdym angdengra y angdo jo pajau y; kaichi bawibawi py huni kamngo sa tamang u nai ne i, hini atitichi ai kanirei, kani nyhrei naimy sa pajau ai ny y.

¹⁴Huna nai y kaichi ai peang nai keungchi ly Jerusalem mary y awm iy, hini kalopchi so u sy. Naibaly kaichi i mary hawi avang theung y cheng takhra neampachychi hawi apom nai khumichi ly mymychi i mary hawi avang i miteaung kehchi, tara chih nai keungchi hawi vanrei adeu yb nai neng khala tym u iy, hini molam y Tameuh i kado theu naira rym ai nai so pi sy,” napi u.

¹⁵Meshulam hawi Levi theaung Shabethai nini i kangai y abawi nai Asahela i chapo Jonathan hawi, Tikvah i chapo Jahazia nini ny y baly, takhra ami py huni tau pei nai ai ei y nai ne.

¹⁶Pri palara i vawi ali teang nai khumichi ly huni tau pei nai ngai u i, pathyp pi nai keung Ezara ly nupai lu sa naichi theung i khumi phyreichi ai vawi takhra iy, nichi i amyn ly cha-iu theung y tajiu pi typ bo.

¹⁷Nichi ly cheng takhra neampachychi hawi yhmtheaung sa nai khumichi molam y lo horei, kani harei dengdai chih pi i, lo thomrei sala y pajau nai ne.

¹⁸Hini ly cheng takhra neampachychi hawi yhmtheaung sa nai khumichi i vuikanai ne. Nupai ka-thui pathyp pi nai keungchi Josua nupai hawi ni i amnauchi, Jehozada i chapochi napi nai Maaseiah, Elieza, Jarib hawi Kedalia.

¹⁹Nichi ly mymychi i ajuchi hawi akhai ai, nanai leu adeu u chum baly, mymychi i kamngo lawira nga ai nai beram katai harei hawi apathyp u bo.

²⁰Immera nupai theung i Hanani hawi Zebadiah

²¹Harim nupai theung i Meseja, Elija, Shemaiah, Jehiela hawi Uziah

²²Pashura nupai theung i Elioenai, Maseja, Ismaela, Nethanela, Jozaba hawi Eleasah

²³Levi theaungchi Jozaba, Shimei, Kelaiah (ti y baly Kelita), Pethahiah, Judah hawi Elieza

²⁴Katyn kapau beu kawp nai Eliashib Achura yhm tamcheaungchi Shalum, Telem hawi Uri

²⁵Takhra khumichi Parosh nupai theung i Ramiah, Iziah, Malakhijah, Mijamin, Eleaza, Malakhijah hawi Benaiah

²⁶Elam nupai theung i Mattniah, Zekhariah, Jehiela, Abadi, Jeremoth hawi Elija

²⁷Zattu nupai theung i Elioenai, Eliashib, Mattniah, Jeremoth, Zabad hawi Aziza

²⁸Bebai nupai theung i Jehohanan, Hananiah, Zabai hawi Athalai

²⁹Bani nupai theung i Meshulam, Mallu. Adaiah, Jashub, Shela hawi Jeremoth

³⁰Pahat Moba nupai theung i Adana, Khelala, Benaiah, Maseja, Mattniah, Bezalela, Binnui hawi Manase

³¹Harim nupai theung i Elieza, Ishijah, Malakhijah, Shemaiah, Shimeon, Benjamin, Mallu hawi Shemariah

³³Hashum nupai theung i Matenai, Mattattah, Zabad, Eliphelet, Jeremai, Manase hawi Shimei

³⁴Bani nupai theung i Maadai, Amram, Uela, Benaiah, Bedeiah, Kheluhi, Vaniah, Meremoth, Eliashib, Mattniah, Matenai hawi Jaasu

³⁸Binnui nupai theung i Shimei, Shelemiah, Nathan, Adaiah, Makhnadebai, Shashai, Sharai, Azarela, Shelemiah, Shemariah, Shalum, Amariah hawi Josepha

⁴³Nebo nupai theung i Jeiela, Matithia, Zabad, Zebina, Jadai, Joela hawi Benaiah

⁴⁴Hini khumi bawibawichi ly cheng takhra neampachychi hawi yhmtheaung sa naichi ne. Nichi ly mymychi i ajuchi ai py, nichi hawi nga nai cho chanauchi ai py khai u su bo.