Read Khumi Chin EZARA 4 Bible Online

EZARA 4 - Khumi Chin bible

EZARA 4

¹Pri palara i nai vawi ali teang nai khumichi ly Israela chengchi i ARENG Tameuh i Achura yhm sa palum teang bo, nanai Juda hawi Benjamin nupaichi i paleung ka-echi my thai u bo.

² Hunai deaungkho y nichi ly Zerubabela hawi nupaichira y lu sa nai khumichi teng y chei u iy, “Achura yhm sa naira y kaichi ai py nangchi hawi vanrei abawi ai nai pei kyh; kaichi ly nangchi i chiu nai Tameuh ai chiu teang nai ne. Kaichi ai hini meingtym y awm ai nai Asuria samrang Esarahadon my ang pato nai dengdairei, huni Tameuh teng y kapathyp u nai ne,” napi u bo.

³Zerubabela, Josua nupaichi ai lu sa naichi my ly nichi teng y, “Kaichi ly kaimychi i ARENG Tameuh i vui Achura yhm sa naira y nangchi i kasabawm aly ngai y leang. Pasia empara pri samrang Kuru i leu pei nai molam y, huni Achura yhm ai kaimychi naimy kasa u ai,” nanai pathang.

⁴Naibaly huni pri y awm yb nai khumichi ly Juda chengchi paleung phra iy kalop amcheang y pa-rei,

⁵Pasia pri peang nai miteaung kehchi teng y un tangka pei u. Empara samrang Kuru deung i dengdai empara samrang Dari deung tym pa-rei, nichi ly hina nai kamta paka u nai ne.

⁶ Pasia empara samrang Ahasuru my peang angchei nai khala y, Juda pri hawi Jerusalem mary y awm u nai khumichi i paleung ka-echi ly nichi i tlang tleaung y ka-jo hau nai cha pei u nai ne.

⁷Hunaibaly Pasia empara samrang Artazeret my peang nai khala y Bishalam, Mithreda, Tabeel hawi nichi i ahawichi ly samrang teng y cha pei pi u nai ne. Huni cha ai ly Arami[2]leu hawi tapeang iy phain pi bo.

⁸Huni bo y Jerusalem mary i satang molam y samrang i bangtang kalen Rehum hawi ka-peang secretary Shimashai nini my samrang Artazeret teng y, cha tajiu iy pei pi nai ly:

⁹“Samrang i bangtang kalen Rehum, ka-peang secretary Shimashai hawi nini i ahawichi, tara chih nai keungchi, Erech mary, Babulon mary hawi Elam pri Susa mary mang i jeu iy kalop sa nai miteaung kehchi,

¹⁰Samari mary hawi Euphrat tavo pui nidym pri[3]ka-peangra y ang pyn hai ai nai sa thai naira len nai samrang Ashubanipa my pato nai takhra khumi mipuichi teng i cha ne.

¹¹Cha theung y abawi nai satangchi ly: “Empara samrang Artazeret teng y samrang i miseaungchi, napi nai Euphrat tavo pui nidym ka-peang i khumichi my tajiu nai ly”

¹²“Nang parai nai keung awi, nang i takhra khu ka-peangchi mang i hi y jeu u nai Juda chengchi ly Jerusalem mary y khuteng sa iy huni hawi y parai nai, atiu reng nai mary ai palum u nai ne, nanai nang teng y kang pany hai nai bo. Nichi ly mary apaichi sa amteaung u bo i, kra y nai sala y pajau ai bo.

¹³Samrang awi, hini mary hawi apaichi sa palum nai pajau baly, mary i khumichi ly kahm ang pei ai ny y leang bo. Hunaibaly nang i kahm tangka kun nai di vui ai.

¹⁴Kaichi ly nang i pahen nai anui y awm naichi ne i, huna nai kahm tangka di vui ai nai ngai hai y.

¹⁵Naibaly nang i amsi pajochi my khai pi nai cha-iu theung y hau baly, hini mary ly atiu reng nai hawi jangni dengdairei khu ka-peangchi ai peang nai samrang hawi samrang i bangtang kalenchi ai, rai naira tym hai reng nai py niu ai mang. Hini mary i khumichi ai peang nai ly rai jojo; huni molam y hini mary ly taphra naira avum nai ne.

¹⁶Huna nai y hini mary hawi apaichi sa palum nai pajau vui lawh baly, samrang nang ly Euphrat tavo pui nidym ka-peang y peang pajau ai ny y leang bo, nanai kang pany hai nai ne,” napi.

¹⁷Samrang i pathang nai ly “Samrang i bangtang kalen Rehum, ka-peang secretary Shimashai i kamkawm Samari mary khumichi hawi, Euphrat tavo pui nidym ka-peang khumichi teng y kawn nai leu kang thui.

¹⁸“Nangchi i pei nai cha ly leu tapeang iy kai teng y phain pi bo.

¹⁹Kai ly leu pei iy hau hai i, Jerusalem mary ly jangni dengdairei samrangchi ai tiu reng nai py, atiu naichi hawi khrukhra naira tym hai nai khumichi kawi nanai py kaniu bo.

²⁰Phum-ang len nai samrangchi ly huni mary y peang iy, Euphrat tavo pui nidym ka-peang verei y kahm tangka cheaung nai ne.

²¹Huna nai y kai teng i leu pei nai sai sairei ngo teang bi y ryrei ly huni mary sa palum nai kalop anawn hai vui ai nai nangchi my cha patheu ai nai tla.

²²Kai i vui rai naira tym hai bi y ai nai huni cha ly vaimy ahei hai praw ai nai tla,” nanai pathang pi bo.

²³Empara samrang Artazeret teng i cha ly Rehum, Shimashai hawi nini i kamkawmchi my phain i, nichi ly vaimy Jerusalem mary y chei u iy Juda chengchi i Achura yhm sa nai kalop ai atho y my anawn hai bo.

²⁴Achura yhm sa nai kalop ly Pasia empara samrang Dari my peang nai pa-nyh saneng tym pa-rei anawn nai ne.