Read Khumi Chin EZARA 6 Bible Online

EZARA 6 - Khumi Chin bible

EZARA 6

¹Hunaibaly empara samrang Dari ly Babulon mary y khai nai samrang yhm recordchira y hau ai nai leu pei bo.

²Na i py record ra y abawi nai anui mang i cha aeang ai ly Medi ka-peang Ekabatana mary y naini avum nai ne.

³Huni cha aeangra y ly “Empara samrang Kuru my mymy i peang nai angchei saneng y kapathyprachi talam ai nai hawi kapathyprachi leng patlum nai meingtym lawm ai nai molam y, Achura yhm sa palum teang ai nai tla, nanai leu pei nai awm.

⁴Dengpangchi ly lengseaung lam thomrei tleangleang nai salo y dengkeaung lam harei tleangleang naimy palyn veangveang ai nai tla. Huni i vui kheih nai ly samrang i peang nai tangka-yh theung i pasum ai nai tla.

⁵Samrang Nebukhadnezar my Jerusalem mary Achura yhm i nai Babulon mary y syn vui nai muku, tangka ateaung bawibawichi py, mymychi i mary Jerusalem Achura yhm y tha pi ali teang ai nai tla,” nanai abawi nai ne.

⁶Empara samrang Dari my pathang pi nai cha pei pi nai ly: “Euphrat tavo pui nidym ka-peang samrang i bangtang kalen Tatenai, Shetha Bozenai hawi, Euphrat tavo pui nidym ka-peang y awm nai nangchi i kalop sa ahawi nai miteaung kehchi awi, “Nangchi ly Achura yhm sahawi y ahai u moh;

⁷Achura yhm sa nai kalop ai py paka u moh. Juda samrang bangtang kalen hawi Juda miteaung kehchi teng y, Tameuh i Achura yhm ai meingtym kangngymra y sa teang ai nai pei pi u.

⁸Sa palum teang nai kalopra y nichi ai sabawm ai nai, vai nangchi teng y kaimy leu kang pei bo. Nichi i sa nai kalop avawby y ai nai pasum nai chareichi ly Euphrat tavo pui nidym mang y cheaung nai kahm tangka, samrang i peang nai tangka-yh theung i pei pi u praw.

⁹Kani pri mang y awm nai Tameuh i kangai kapathyprachi talam iy kai hawi kaimy i chapochi i vui py, mymy teng y amtheaung naira hnei pi u.

¹⁰Jerusalem mary i pathyp pi nai keungchi my kani pri mang y awm nai Tameuh teng y leng patlum nai kapathyprachi talam ai aly ngai nai si katai beaungjeaung, beram, beramcho, chohpui chomaw, palawi, kreip hang hawi olive asituichi kani tlei tleirei avawby y pa-rei pei pi u.

¹¹Kaimy leu kang pei bi nai ly hini leu pei nai tangai y nai khumi ai ly my i yhm kaleaung harei lo hai ly pasui iy apacheu naimy dei sy, ni i yhm py anyn aso aphi cheng nai kamta lawm na sy.

¹²Jerusalem mary ly mymy ai chiu ai nai meingtym vawi takhra nai Tameuh my hini leu pei nai tangai y nai, Jerusalem mary Achura yhm taphra ai nai atho sa nai mani samrang py ne sy, mani khumi py ne sy, nichi ai ly Tameuh my pajeng sy; hini ly kai empara samrang Dari i leu pei nai ne, leu pei nai kamta tangai u,” nanai tajiu bo.

¹³Naibaly samrang i bangtang kalen Tatenai, Shetha Bozenai hawi nini i ahawi kamkawm miteaung kehchi ly samrang i leu pei nai kamta takhawi y naimy sa u.

¹⁴ Juda miteaung kehchi ly amo Hakai hawi Zekhariah nini my atho pei nai deaungkho y, Achura yhm sa nai kalop hawihai palai sa u bo. Nichi ly Israela chengchi i Tameuh my leu pei nai hawi, Pasia empara samrang Kuru, samrang Dari, samrang Artazeretchi i leu pei nai molam y Achura yhm cheang pa-rei sa u.

¹⁵Empara samrang Dari my peang nai tariu saneng Ada lo kani thomrei khala y patem u nai ne.

¹⁶Naibaly Israela mipuichi, napi nai pathyp pi nai keungchi, Levi theaungchi hawi, pri palara i vawi u ali teang nai khumi bawibawichi ly amo theu parai naimy Achura yhm khai takhra u bo.

¹⁷Huni Achura yhm khai takhra nai pawira y nichi ly si katai 100 rei, beram 200 rei hawi beramcho 400 reichi ai kapathypra tawnbawichi palawn iy, Israela cheng theaung ha harei i vui y mi-i ha harei, cheng theaung holai nyhrei kavui mi-i holai nyhrei ai kamngo ahui nai kapathypra palawn iy apathyp u nai ne.

¹⁸Nichi ly Mosi i reita cha-iu theung y leu pei nai kamta, Jerusalem mary Achura yhm i kalop sa ai nai vui y, pathyp pi nai keungchi hawi Levi theaungchi ai ka-thui ka-thui kalop paji pi bo.

¹⁹ Pri palara i vui u ali teang nai khumichi ly Katlen Vui nai Pawi ai angchei lo kani holai palyhrei kani y sa u bo.

²⁰Pathyp pi nai keung hawi Levi theaung bawibawichi ly mymychi apachai nai deaungkho y, reita leaungsai molam y chai u nai ne. Levi theaungchi ly mymychi i pri y vawi u teang nai khumichi, pathyp pi nai keungchi hawi mymychi kypkyp i vui py katlen vui nai tawnbawichi tleh u bo.

²¹Huni kapathypra tawnbawichi i ngan ly pri palara i vawi teang nai khumi Israela chengchi hawi vanrei, hini pri y awm nai khumichi i myn y chiu nai reita ai khai su nai khumichi hawi, Israelachi i ARENG Tameuh ai chiu ai nai jeu u nai khumi bawibawichi ly cha u nai ne.

²²Nichi ly kani saryh ryrei tako angbo abawi y nai pawi ai amo theu parai naimy sa u bo. Israela chengchi i Tameuh i vui Achura yhm sa naira y abawi ai ngai nai paleung ly Suria empara samrang[4] teng y Tameuh my pakun pi bo. Hunai deaungkho y nichi ly khri pa-rei amo theu u nai ne.