Read Khumi Chin EZARA 8 Bible Online

EZARA 8 - Khumi Chin bible

EZARA 8

¹Empara samrang Artazeret my peang nai deung y, Babulon pri dengdairei Jerusalem mary y Ezara my hawi nai pri pala nai cho nupaichi ai lu sa nai khumichi i amyn vuikanai ly hinichi ne:

²Phineha nupai theung i Kerashom Ithama nupai theung i Daniela Davida nupai theung i Shekaniah i chapo Hattu Parosh nupai theung i Zekhariah hawi ni i nupai theung i neampacho 150 rei (nichi yhm dengtheung ly record awm.) Pahat Moba nupai theung i Zerahiah i chapo Eliehonai hawi neampacho 200 rei Hattu nupai theung i Jahaziela i chapo Shekaniah hawi neampacho 300 rei Adin nupai theung i Jonathan i chapo Ebed hawi neampacho 50 rei Elam nupai theung i Athalia i chapo Jeshaia hawi neampacho 70 rei Shephatiah nupai theung i Mikhaela i chapo Zebadiah hawi neampacho 80 rei Juaba nupai theung i Jehiela i chapo Obadia hawi neampacho 218 rei Bani nupai theung i Josiphiah i chapo Shelomith hawi neampacho 160 rei Bebai nupai theung i Bebai i chapo Zekhariah hawi neampacho 28 rei Azaka nupai theung i Hakatan i chapo Johanan hawi neampacho 110 rei Adonikam nupai theung i Eliphelet, Jeuela, Shemaiah hawi neampacho 60 rei (nichi ly nithun mang hui u naichi(...)

¹⁵Kai ly huni khumichi ai Ahava mary mang y leaung nai tuilam sahawi y angym hai iy, huni meingtym y kaichi ly kani thomrei jei bo. Huni khumichi theung y pathyp pi nai keungchi abawi i py, Levi theaungchi ai ly niu y nai deaungkho y,

¹⁶kai ly lu sa nai keung Elieza, Ariela, Shemaiah, Elanathan, Jarib, Elanathan, Nathan, Zekhariah hawi Meshulamchi leaung takawrei ai py, khumi kacheng Joiarib hawi Elanathan nini leaung nyhrei ai py palau iy,

¹⁷Kasiphia mary lu areng Iddo teng y pato. Iddo hawi ni i ahawi kamkawm Achura yhm y kalop amsi naichi teng y, “Tameuh i Achura yhm y kalop sa ai nai khumichi ai kai teng y pato ba,” nanai thui hai bo.

¹⁸Nichi ly Tameuh i pahen nai saho y Mahli nupai theung i Levi theaung sa thai naira angym nai keung Sherebiah ai, kaichi teng y ang pato nai ne. Ni i chapo hawi amjo amnau leaung holai tajareichi py, vanrei abang u bo.

¹⁹Iddo hawi ni i ahawi kamkawmchi ly Merari nupai Hashabiah hawi Jeshaia nini ai py, my ni i amjo amnau leaung apomreichi hawi vanrei pato nai ne.

²⁰Hunaibaly Levi theaungchi ai sabawm ai nai samrang Davida hawi ni i bangtangchi my pasym pi yb nai Achura yhm y kalop amsi nai leaung 220 reichi py abawi nai ne. Nichi bawibawichi i amyn cha-iu theung y tajiu typ bo.

²¹Tameuh ly achi i khuleaung amla naira lam patei pi iy, achi hawi vanrei cho chanauchi hawi yhmtheaung katuichi ang kry pi ai. Huni molam y achi bawibawi ly mymy i mo y paleung apanem parai naimy biu hai ai nai, hini Ahava tuilam sahawi y kaimy leu pei nai ne.

²²Achi i Tameuh ly mymy ai ym nai khumi bawibawichi ai amtheaung naira pei iy, mymy ai nithun thun nai khumichi ai ly niu ngai y iy pajeng reng, nanai samrang teng y amti pi bo. Huna nai y kai ly khuleaung lam y paleung ka-echi ai paka pi ai nai samrang teng i keaungngo tavaimi kasabawmra hnei ai nai ly kaji ai nai hawi parai.

²³Hunai deaungkho y Tameuh my ang kry ai nai i vui y biu hai naimy, mymy teng y chiu sa ai nai avo; mymy ly achi i chiu sa nai ang tangai pi nai ne.

²⁴Kai ly pathyp pi nai keung kalen kehchi theung i Sherebiah, Hashabiah hawi takhra leaung horeichi ai vawi takhra iy,

²⁵samrang hawi ni i bangtangchi, miteaung kehchi hawi Israela chengchi my Achura yhm y teaung ai nai talam nai muku, tangka hawi ateaung alangchi ai neh iy, huni pathyp pi nai keungchi teng y au pi bo.

²⁶Nichi teng y kai i au naichi ly: Tangka kaji sie 21,527 rei Tangka ateaung 100 rei, tangka kaji sie 105 rei Muku kaji sie 5,207 rei Muku khau 20 rei, muku kaji sie 12 rei Muku khau hawi vang atawm nai kheupaja tangcheng khau 2 rei

²⁸Kai ly pathyp pi nai keungchi teng y, “Nangchi ly amsi pajochi i ARENG Tameuh i vui khai takhra nai khumichi ne i, mymy teng y paleung hawi parai naimy talam nai muku tangka, ateaung alangchi py khai takhra nai vawnsaichi ne.

²⁹Nangchi Achura yhm y tym y ryrei ly huni vawnsaichi kry iy pathyp pi nai keungchi i takun theung y neh u ly pathyp pi nai keung luchi, Levi theaung luchi hawi, Jerusalem mary i Israela mipui lu sa nai keungchi teng y au pi u,” nanai taviu bo.

³⁰Huna nai y pathyp pi nai keungchi hawi Levi theaungchi my, muku tangka hawi ateaung alangchi ai Jerusalem mary Achura yhm y tha pi ai nai ka-vo sa u nai ne.

³¹Angchei lo kani holai nyhrei kani y kaichi ly Ahava tuilam dengdairei Jerusalem mary mang y tako u bo. Tameuh ly kaichi hawi vanrei awm nai deaungkho y, kaichi ai paleung ka-echi teng i nai py, ka-deng mang amo yb iy ang tiu ai naira i nai py ama hai nai ne.

³²Jerusalem mary y tym nai khala y kaichi ly kani thomrei amdaw bo.

³³Naibaly palyh kani Achura yhm y chei i muku tangka hawi ateaung alangchi neh iy, Uriah i chapo pathyp pi nai keung Meremoth i kiu y pei pi bo. Ni hawi vanrei Phineha i chapo Eleaza hawi, Levi theaung Jeshua i chapo Jozaba hawi Binnui i chapo Noadiah nini leaung nyhrei py awm.

³⁴Kaichi ly awm nai vawnsai bawibawichi kati chum, neh chum baly vuikanai theung y tajiu typ bo.

³⁵Naibaly pri palara i vawi teang nai khumi bawibawichi ly Israela chengchi i Tameuh teng y leng patlum nai apathyp ai nai katalamrachi syn u. Israela cheng bawibawichi i vui y talam naichi ly si katai 12 rei, beram katai 96 rei, beramcho 77 rei talam u. Mi-i 12 rei py apachai nai katalamra talam u. Hini tawnbawi bawibawichi ai ARENG teng y leng patlum nai apathyp u.

³⁶Khumichi ly mymychi teng y samrang i leu pei nai cha ai Euphrat tavo pui nidym ka-peang samrang i bangtang kalenchi hawi, miteaung kehchi teng y pei pi nai khala y, nichi ly mipuichi hawi Achura yhm y chiu sa naira y sabawm u bo.