Read Khumi Chin EZARA 9 Bible Online

EZARA 9 - Khumi Chin bible

EZARA 9

¹Hini kalop bawibawichi sa pajau nai khala y Israela cheng miteaung keh phyreichi ly kai teng y ang jeu u iy, “Mipuichi, pathyp pi nai keungchi hawi Levi theaungchi ly mymychi tengpang y awm nai Ammon pri, Moba pri hawi Aikupta pri i khumichi hawi py, Kanani cheng, Hiti cheng, Perizi cheng, Jebusi cheng, Amori chengchi hawi py awm takhra u y; nichi ly huni khumichi i sa nai kamta amso ngai naichi sa u teang.

²Juda chengchi ly cheng takhra neampachychi hawi yhmtheaung sa u nai deaungkho y, Tameuh i khai takhra nai khumichi ly amso ngai veng bo. Hini kamngochi sa naira y lu sa naichi hawi miteaung kehchi ly ty keh nai ne,” napi u.

³Kai ly huni leu thai nai khala y kaimy i ateaungchi kasei iy sam hawi labeaung mui py ka-kyn i, paleung si naimy ka-teh su bo.

⁴Dym mang apathyp ai nai neng tym i, khumichi ly kai teng y jeu u achu nai ryrei, kai ly paleung si nai hawimy huni meingtym y ateh jo rai; nichi ly pri palara i vawi ali teang nai khumichi i kamngo nai molam y, Israela chengchi i Tameuh my leu pei nai deaungkho y jei hyn nai khumichi ne.

⁵Dym mang apathyp ai nai neng tym nai khala y kai ly tangam naimy atehra i nai ang thau iy aseih nai ateaungchi hawimy kheukhu di iy, kai i ARENG Tameuh teng y kiu pheu naimy chiu kasa bo.

⁶Kai ly “Aw Tameuh, kaichi i kamngo ly kaichi i lu um nanai pa-rei nawi na bo. Huni kamngochi ly kani mang y angteu na bo.

⁷Amsi pajochi deung i dengdai vaini khrairei, nang i khumi kaichi ly khri pa-rei kamngo sa tamang u bo. Huni kamngochi molam y kaichi i samrangchi hawi pathyp pi nai keungchi ly cheng takhra samrangchi kiu tleaung y tym hai nai, acho akei tamo tym hai nai, lawm vui nai, langheng hawi nai, vai i kamta pipi tahm by y nai hinichi avum hai bo.

⁸Aw kaichi i ARENG Tameuh, nang ly kaichi ai pahen nai deaungkho y, cheng takhrachi kiu i nai lawi hai iy, vai ly tahm asang parai nai kachai meingtym y, neng maidenreichy sala y phrumai by y pa-rei awm ai nai pei bo. Nang ly kaichi ai miseaungra i nai alaw hai iy khumi kangtha lawm ai nai pei bo.

⁹Kaichi ly miseaung achei i py, nang ly kaichi ai miseaung ne i py khai su y leang. Nang ly Pasia empara i mo y kaichi ai meimai nga hai iy tlang heng ai nai hawi, phra seaungkhrang nai Achura yhm sa palum teang ai nai nga nai hawi, Juda pri Jerusalem mary y phrumai by y pa-rei awm ai nai pei nai ne.

¹⁰“Na i py aw Tameuh, huni pahen nairachi nga chum nai bo y, kaichi ati kang hnei bi thai ai mo?

¹¹Nangmy ly ‘Nangchi peang ai nai pri ly amso ngai nai ne; mipuichi ly khuteng katem y tym pa-rei amso ngai nairachi hawimy kawi hai cheng bo. Nangchi ly huni pri i amti amjangchi kajeu kawi pa-rei cha nei u iy, huni pri ai py nangmychi i katu chanauchi kiu tleaung y deungtasa au ai nai ngai lawh baly, huni pri y awm nai khumichi hawi mana khala py apom u moh.

¹² Nichi nang chawn ai nai molam ly mana khala py sabawm u moh,’ nanai nang i miseaung amochi dengdairei leu pei naichi ai kaichi tangai u y.

¹³Kaichi ly kaimychi i kamngo nai molam y hina tanrei pajeng naira avum u teu i py, aw kaichi i Tameuh, nang ly kaichi i tlang tleaung y pajeng ai nai avo khyp teu i py, nang i pahen nai saho y tlang vui tem hai y nai ne, nanai kaichi pany.

¹⁴Kaichi ly nang i reita leu pei naichi tangai y bi naimy, hini amso ngai nai khumichi hawi apom lawh bi baly, nang ly kaichi i tlang tleaung y khri pa-rei kado theu hai iy, leaungrei py tleaung y pa-rei tamyh vui ai ny y a?

¹⁵Aw Israela chengchi i ARENG Tameuh, nang ly leu meitang teaung nai keung ne. Na i py nang ly kaichi ai heng ai nai pei bo. Kaichi ly kaimychi i kamngo nai y ahui u bo. Hini kamngo nai deaungkho y nang i mo y jeu vam ai nai leaungrei py by y,” nanai takeng nai ne.