Read Khumi Chin NEHEMIA 10 Bible Online

NEHEMIA 10 - Khumi Chin bible

NEHEMIA 10

¹Lamai nip man nai khumi ly Hakaliah i chapo Nehemia ne; huni bo baly Zedekiah lamai nip nai ne. Lamai nip nai takhra khumichi ly anui mang i naichi ne:

²Pathyp pi nai keungchi: Seraiah, Azariah, Jeremia, Pashura, Amariah, Malakhijah, Hattu, Shebaniah, Mallu, Harim, Meremoth, Obadia, Daniela, Kinethon, Baru, Meshulam, Abijah, Mijamin. Maaziah, Bilaka hawi Shemaiah.

⁹Levi theaungchi: Azaniah i chapo Josua, Henada nupai lu Binnui, Kadmiela, Shebaniah, Hodiah, Kelita, Pelaiah, Hanan, Mika, Rehob, Hashabiah, Zakura, Sherebiah, Shebaniah, Hodiah, Bani hawi Beninu.

¹⁴Khumi mipui luchi: Paro, Pahat Moba, Elam, Zattu, Bani, Bunni, Azaka, Bebai, Adonijah, Bikavai, Adin, Ata, Hezekia, Azura, Hodiah, Hashum, Bezai, Harip, Anatho, Neba, Makabjasa, Meshulam, Hezira, Meshezabela, Zadok, Jadua, Pelatiah, Hanan, Anaiah, Hoshe, Hananiah, Hashu, Hallohe, Pilha, Shobek, Rehum, Hashabana, Maaseiah, Ahiah, Hanan, Anan, Mallu, Harim, Baana.

²⁸Achi i pri y awm nai cheng takhrachi hawi amprei u nai Israela chengchi, pathyp pi nai keungchi, Levi theaungchi, Achura yhm tamcheaung typ nai risachi, Achura yhm y katyn kapau beu kawp naichi, Achura yhm y kalop sa naichi hawi kaichi ly kaimychi i ajuchi, tleaungri acheang nai cho chanauchi hawi vanrei,

²⁹Mosi dengdairei Tameuh my pei nai Reita leu tangai ai. Kaichi ai ARENG my pei nai leu bawibawichi tangai ai. Nang i Reita leuchi hawi dawn hai nai bawibawichi tangai ai. Hini adeu nai leu ai taphra lawh baly vaineng lawi kalei sy.

³⁰Kaichi ly hini pri y awm nai cheng takhrachi hawi apom ai ny y.

³¹Cheng takhrachi my anawn kani y mo, khai takhra nai pawi kani y mo, choh, ti y baly takhra sai sairei jo ai nai syn lawh baly, kaichi ly van pi ai ny y. Saryh saneng tym nai tleirei kaichi ly li sa ai ny y. Kalum kalai awm nai bawibawi py palawi pi vui ai.

³²Kaichi ly saneng tleitleirei khumi leaungrei i tangka kram 5 rei ly Achura yhm i vui pasum ai nai molam y pei talam ai.

³³Kaichi ly Achura yhm y chiu sa ai nai molam y tako kachai, kani tleirei teicha teinei talam nai, kani tleirei leng patlum ai nai tawnbawichi, anawn kani, lo si pawi kani hawi takhra pawi kanichi i vui katalamrachi, takhra chai parai nai katalamrachi, Israela chengchi i vui kamngo lawi nai kapathypra hawi, Achura yhm i vui takhra aly ngai naichi katalam u ai.

³⁴Khumi mipuichi, pathyp pi nai keungchi hawi Levi theaungchi ne u nai kaichi ly Reita leu molam y kaichi i ARENG Tameuh teng y kapathyprachi leng patlum ai nai i vui aly ngai nai thengchi ly mani nupaichi my syn pi ai nai tla mo, nanai saneng tleitleirei tambe va ai.

³⁵Kaichi ly saneng tleitleirei pakym achu nai amti amjang athai chuluchi py, kaichi i thengthai keungchira y myn man nai athaichi py, Achura yhm y syn ai.

³⁶Reita leu pei nai cha-iu theung y dawn hai nai kamta, kaichi ly Tameuh teng y talam ai nai molam y kaimychi i chapo chalu ai py, kaimychi i si, beram, mi-ichi i tapen nai cho chalu ai py, Achura yhm i pathyp pi nai keung teng y syn pi ai.

³⁷Kaichi saneng tlei tleirei tyn man nai choh chalu hawi sa nai tako dei, takhra katalamra kreip hang, olive asitui hawi thengthai cheaungkhangchi ai, Achura yhm pathyp pi nai keungchi teng y syn pi ai. Li hlau sa nai avangchira y horei y harei talam nai ai cheaung u nai Levi theaungchi teng y kaichi ly kaimychi li hlaura i amti amjang phy ho phyrei syn pi ai.

³⁸Hini horei y harei talam nai ai cheaung nai thym khala y, Aron i kangpreang pathyp pi nai keung ly Levi theaungchi hawi vanrei awm ai nai tla. Naibaly Levi theaungchi my, mymychi cheaungra i nga nai amti amjangchi theung i phy ho phyrei ai, Achura yhm y teaung ai nai Achura yhm vawnsai khai nai takun mang y khai ai.

³⁹Israela chengchi hawi Levi theaungchi ly amti amjang, kreip hang, olive asitui talam nai ai, Achura yhm ateaung alangchi khai naira y kalop amsi nai pathyp pi nai keungchi, Achura yhm tamcheaung typ nai risachi hawi Achura yhm y katyn kapau beu kawp naichi i awm nai takun theung y syn pi ai. Kaichi ly kaimychi i Tameuh yhm khai su ai ny y.