Read Khumi Chin NEHEMIA 11 Bible Online

NEHEMIA 11 - Khumi Chin bible

NEHEMIA 11

¹Lu sa naichi ly Jerusalem mary y awm u; takhra khumichi ly yhm dengtheung horei y deaung deaungrei, Jerusalem mary kachaira y hawi, huni bo i khumichi ly takhra mary katheang kalenchira y py, awm hai ai nai tambe va u bo.

²Jerusalem mary y mymychi alyly naimy awm nai khumichi ai khumi mipuichi my lyh u nai ne.

³Takhra mary katheang kalenchira y ly Israela chengchi, pathyp pi nai keungchi, Levi theaungchi, Achura yhm y kalop sa naichi, Solomon i miseaung kangpreangchi ly mymychi sa nai yhmchira y awm u nai ne. Naibaly Jerusalem mary y awm nai Juda pri khu ka-peang miteaung kehchi i amynchi thui pi ai:

⁴Juda cheng theaungchi: Zekhariah i katu, Uziah i chapo Athaiah. Ni i kangpreangchi theung y Juda i chapo Perez i kangpreang Amariah, Shephatiah hawi Mahalalelchi ne.

⁵Kolahozeh i katu, Baru i chapo Maaseiah ne; ni i takhra amsi pajochi theung y Shela i chapo Juda i kangpreang Hazaia, Adaiah, Jojari hawi Zekhariahchi ne.

⁶Perez i kangpreangchi theung i sorai risa 468 reichi ly Jerusalem mary y awm u bo.

⁷Benjamin theaungchi: Joeda i katu, Meshulam i chapo Sallu. Ni i takhra amsi pajochi theung y Pedaiah, Kolaiah, Maaseiah, Ithiela hawi Jesaiachi abawi.

⁸Sallu i amjo amnau kypkypchi ly Kabai hawi Sallai ne. Benjamin theaung 928 reichi ly Jerusalem mary y awm u.

⁹Zikhri i chapo Joela ly nichi i lu ne i, Hasenua i chapo Juda ly pa-nyh lu ne.

¹⁰Pathyp pi nai keungchi: Jojari i chapo Jedaiah hawi Jakhin ne.

¹¹Meshulam i katu, Hilkia i chapo Seraiah. Ni i amsi pajochi theung y Zadok, Meraitho hawi pathyp pi nai keung kalen keh Ahitubchi abawi nai ne.

¹²Hini nupai theung i khumi 822 reichi ly Achura yhm y kalop sa u. Pelaliah i katu, Jeroham i chapo Adaiah. Ni i amsi pajochi theung y Amazi, Zekhariah, Pashura hawi Malakhijahchi abawi nai ne.

¹³Hini nupai theung i khumi 242reichi ly yhm dengtheungchira y lu sa naichi ne. Ahazi i katu, Azarela i chapo Amasai. Ni i amsi pajochi theung y Meshelemo hawi Immera nini abawi.

¹⁴Hini nupaichi theung y atiu kawp keh nai sorai risa 128 rei awm. Nichi i lu ly yhm dengtheungchira y lu sa nai Zabadiel ne.[5]

¹⁵Levi theaungchi: Azarikam i katu, Hashu i chapo Shemaiah. Ni i amsi pajochi theung y Hashabiah hawi Bunni nini abawi.

¹⁶Achura yhm angam mang y kalop pacheang nai keung Levi theaung miteaung kehchi ly Shabethai hawi Jozaba nini ne.

¹⁷Zabdi i katu, Mika i chapo Mattniah, ni ly Asap i kangpreang ne. Ni ly kawn nai leu thui nai chiu sa achu khala khulym thui nai, Achura yhm khulym kamkawm ai lu sa nai keung ne. Mattniah i bangtang ly Bakabukiah ne. Kalala i katu, Shammua i chapo Abda, ni ly Jeduthun i kangpreang ne.

¹⁸Levi theaung 284reichi ly Jerusalem mary kachai theung y awm u nai ne.

¹⁹Achura yhm tamcheaung typ nai risachi: Akkub, Talamon hawi ni i amjo amnau bawibawi ly 172 rei awm nai ne.

²⁰Huni bo i Israela chengchi, pathyp pi nai keungchi hawi Levi theaungchi ly takhra Juda mary katheang kalenchi theung i, mymychi amtym nai khaileaung meingtymchira y awm u.

²¹Achura yhm y kalop sa nai khumichi ly Jerusalem mary Ophel, napi nai meingtym y awm iy, Ziha hawi Kisapa nini i lu sa nai anui y awm.

²²Jerusalem mary y awm nai Levi theaungchi ai lu sa nai keung ly Hashabiah i katu, Bani i chapo Uzi ne. Ni i amsi pajochi theung y Mattniah hawi Mika nini abawi. Ni ly Achura yhm y chiu sa nai khala, katyn kapau beu kawp naichi i lu Asap i nupai kangpreang ne.

²³Huni nupai kangpreangchi ly Achura yhm theung y katyn kapau beu ai nai kani tleirei ami my lu sa ai mo, nanai pany hai ai nai samrang my pacheang yb nai awm.

²⁴Juda theaung Zarah nupai Meshezabela i chapo Pethahiah ly Israela chengchi i vui molam y Pasia samrang teng y kalop sa pi nai ne.

²⁵Khumi neangneangchi ly mymychi li hlau sahawi i marychira y awm u bo. Juda theaungchi ly Kiria Araba mary, Dibon mary hawi Jekazela marychira y py, huni mary sahawi i avangchira py awm u.

²⁶Nichi ly Jeshua, Molada, Bethpelet,

²⁷Hazashuala, Berasheba mary hawi huni marychi sahawi i avangchira y py awm u nai ne.

²⁸Nichi ly Zikala mary, Mekona mary hawi huni mary sahawi i avangchira y py,

²⁹Enrimmon mary, Zorah mary, Jamuth mary,

³⁰Zanoah mary, Adulam mary hawi huni marychi sahawi i avangchira y py, Lakhisa mary hawi huni sahawi i li hlauchi, Azeka mary hawi huni sahawi i avangchira py awm u bo. Sangum y thui ai na baly Juda pri i khumichi ly tokalawi mang i Baraseba mary hawi, tosyh mang i Hinnom leaunghawi sala i khu ka-peang theung y awm u nai ne.

³¹Benjamin theaungchi ly Keba mary, A-i mary, Bethela mary hawi huni sahawi i avangchira y py,

³²Anatho mary, Noba mary, Ananiah mary,

³³Hazo mary, Ramah mary, Kittai mary,

³⁴Hadi mary, Zeboim mary, Nebalat mary,

³⁵Loda mary, Ono mary hawi kupe kakawp leaunghawira py awm u.

³⁶Juda khu ka-peang theung y awm u nai Levi theaung phyreichi ly Benjamin theaungchi hawi vanrei awm u nai ne.