Read Khumi Chin NEHEMIA 4 Bible Online

NEHEMIA 4 - Khumi Chin bible

NEHEMIA 4

¹Mary apai ly kaichi Juda chengchi my sa palum teang bo, nanai Sanbala my thai nai khala y khri pa-rei kado theu i, kaichi ai panui hai nai ne.

²My i ahawichi hawi Samari risachi mo y ni my, “Hini ati sai py sa thai naira by y nai Juda chengchi ly ati sa u nai mo? Nichi ly Jerusalem mary palum teang ai nai tau u nai a? Apathyp nai saho y hini kalop ai kanirei naimy pajau vui ai, nanai athang khai u nai sai a?,” napi.

³Ni i sahawi y angdo nai Tobiah my, “Nichi ly mana nai mary apai sa u pajau ai mo? Nichi i apai ly khiva ajijaw nai hawimy anawi ryp ai!,” nanai leu pajeaung bo.

⁴Kaimy, “Aw Tameuh! nichi my kaichi ai panui hai nai ly tangai ba. Nichi ly mychi i panui hai nai leu my ly mychi teng y vawitheung tha ali teang na sy. Nichi ly mychi teng y awm nai vawnsaichi ai lawm pi pawn nai avum iy, mychi ai py pri takhra mang y patiu iy hawi vui nai tym hai sy.

⁵Mary apai sa nai kaichi ai nichi my mei aniu y nai sa nai deaungkho y, nichi i sa tamang naichi ai pahen pi moh kyh ba. Nichi i kamngochi tami pi veng moh kyh ba,” nanai chiu sa bo.

⁶Naibaly kaichi ly mary apai sa patawm veangveang nai ne i, sa nai khumichi ly paleung apei parai nai deaungkho y, kra y nai sala y my mary apai ka-sang ka-hyhrei pajau vui bo.

⁷Sanbala, Tobiah hawi Arab cheng, Ammon cheng, Asadod chengchi ly Jerusalem mary sa palum nai kalop amcheang nai satang hawi, mary apai phra nairachi pathyp dudu nai satang py, thai u nai deaungkho y khri pa-rei kado theu u.

⁸Hunai deaungkho y nichi ly Jerusalem mary y tiu iy mary i khumichi ahei phrophra na pa-rei sa ai nai arum u bo;

⁹na i py kaichi ly kaimychi i Tameuh teng y chiu sa hnei takeng naimy paleung ka-echi ai paka ai nai, vum kanithun tamcheaungchi ai typ hai nai ne.

¹⁰Juda mipuichi my, “Kaichi ly kalop kasa u nai akawm parai bo; pasym pan ai nai anyn angsochi py awm ma mang rai nai deaungkho y, ati mana nai kaichi ly vainimy mary apai kasa u pajau ai mo?” nanai khulym thui u bo.

¹¹Kaichi i paleung ka-echi ly kaichi dawndan y nai khala, kaichi ai padei iy mary apai sa nai kalop anawn hai vui ai nai tau u nai ne.

¹²Paleung ka-echi theung y ateaung nai Juda chengchi ly kaichi teng y ang jeu iy, kaichi ai paleung ka-echi my mana ang tiu mo, nanai avaw avawrei satang ang thai hai.

¹³Hunai deaungkho y kai ly khumi mipuichi teng y haisau, tivi hawi thailihochi syn hai iy, pajau be y rai nai mary apaichi nithun mang y, nupai ka-thui meingtym la hai bo.

¹⁴Kai ly mipuichi paleung bi paleung mawn nai sai kaniu i, nichi hawi vanrei, nichi i miteaung kehchi hawi peang nai keungchi teng y, “Achi i paleung ka-echi ai jei u moh; ARENG ly nang parai nai hawi ka-jei hawi parai, nanai pany u ly nangchi i amjo amnau, aju chanau, yhm hlauchi i vui atiu u,” napi.

¹⁵Paleung ka-echi ly mychi i tau nai saichi ai achi my pany pi veng bo, nanai thai u nai khala y, nichi i tau nai saichi ai Tameuh my taphra pi veng bo, nanai pany u nai ne. Naibaly kaichi bawibawi ly mary apai sa nai kalop sa veangveang bo.

¹⁶Huni neng dengdairei kai i khumi ka-hyhrei ly kalop sa iy ka-hyhrei ly tivi, khupui, thailihochi syn naimy tamo baichuchi amthyp iy tamcheaung typ ai nai tla. Kaichi i lu sa naichi ly mary apai sa palum nai Juda khumichi ai atho pei u.

¹⁷Naibaly yhm sa nai ateaungchi tawn nai khumichi malawn py, kiu makengrei mang vawnsai tawn iy makengrei mang ly tavai ateaung syn u bo.

¹⁸Kalop sa nai khumichi py mychi i akeng keung y haisau aneng iy kalop sa u; ka-jeira satang thai hai ai nai baw eng nai khumi ly kai i sahawi y angdo nai ne.

¹⁹Kai ly mipuichi, nichi ai peang nai keungchi hawi lu sa naichi teng y, “Achi i kalop ly kau parai nai deaungkho y achi ly mary apai salo y leaung leaungrei kalop sa nai ly palo parai nai ne.

²⁰Ka-jeira satang pei nai baw katyn thai baly, nangchi ly kai teng y jeu u achu; achi i Tameuh ly achi mang y awm iy tiu pi ai,” nanai thui pi yb bo.

²¹Hunai deaungkho y kani tleirei khawn kani si nai dengdai dym mang ka-si theu nai ryrei, kai i khumi ka-hyhreichi ly mary apai sa iy, ka-hyhrei ly tivichi syn naimy tamcheaung typ u nai ne.

²²Naibaly kaimy, “Achi ly vum y mary typ iy kanithun y ly kalop sa thai ai nai, nangchi hawi nangchi ai sabawm nai khumichi ly vum baly Jerusalem mary y i u ai nai tla,” napi.

²³Kai ly vum y kaimy i ateaungchi aleng y; kai i ahawichi, kalop amsi naichi hawi kai ai typ nai risachi py, mychi i ateaungchi aleng ai nai ngo y. Kaichi bawibawi ly amy i tavai ateaungchi amy sahawi y khai ryhryh nai ne.