Read Khumi Chin NEHEMIA 5 Bible Online

NEHEMIA 5 - Khumi Chin bible

NEHEMIA 5

¹Neng kra kyh nai bo y Juda neampacho hawi neampachy neangneangchi ly mymychi tengtawi athui apreaung iy tangam u bo.

²Phyreichi my, “Kaichi ly yhm dengtheung tahu nai deaungkho y kaichi heng thai ai nai choh ngai,” napi.

³Phyreichi my ly “Kaichi kajeu alam y ai nai choh nga ai nai molam lichi, kreip akhochi hawi yhmchi ka-peaung khai ai nai tla bo,” napi.

⁴Takhra khumichi my, “Kaichi ly li kahm hawi kreip akho kahm pei pajau ai nai, tangka kalai kala u bo.

⁵Kaichi ly Juda chengchi ny y a? Kaichi i cho chanauchi py nichi i cho chanauchi tleaung y tahm theang y leang. Na i py kaichi ly kaimychi i cho chanauchi ai miseaung lawm hai bo. Chaniu phyreichi ai py miseaung y jo vui bo. Kaichi ly ati sai py so thai y. Kaichi i li hawi kreip akhochi py ami i kiu theung y tym be veng bo ly!” napi u.

⁶Kai ly nichi i tangam nai raawi thai nai khala y kado theu i,

⁷bawi la pi ai nai dawn nai ne. Kaichi ly mipui luchi hawi peang nai keungchi teng y, “Nangchi ly nangmychi i amjo amnauchi ai ana u lawh ly!” nanai kapreng bo. Kai ly hini khrukhra nai paju pachai ai nai mipuichi ai pangym iy nichi teng y,

⁸“Amymychi ai cheng takhrachi teng y jo vui nai Juda cheng amjo amnauchi ai kamjau ryrei achi my atleu teang chum nai bo y, vai nangchi ly amy amjo amnau tengtawi ka-jo ka-van sa u teang lawh ly!” nanai thui nai khala, lu sa naichi ly tlau teang thai y nai y, leu sairei py katheu u y bo.

⁹Naibaly kai ly nichi teng y, “Nangchi i sa nai kalop ly hawi y lawh ly! Cheng takhra paleung ka-echi my achi ai ang panui hai naira i nai lawi ai nai, Tameuh ai jei kaji naimy nangchi kateng sa u ai nai avo.

¹⁰Kai ly mipuichi teng y choh hawi tangka alai pi bo. Kai i ahawichi hawi kalop sa nai keungchi py, hina nai kamta so u. Vai, achi ly huni kalaichi hnei ali y naimy awm sina.

¹¹Nichi pe ai awm nai tangka, choh, kreip hang hawi olive asitui kalai bawibawichi pe hai y naimy pahen pi vui sina. Nichi i lichi, kreip akhochi, olive akhochi hawi yhmchi ai vaimy pei pi u teang sina,” napi.

¹²Lu sa naichi my, “Kaichi ly nang i thui nai kamta sa ai; nichi i vawnsaichi kapei pi u li teang ai; kalaichi py kahnei u ai ny y leang bo,” napi u. Kai ly pathyp pi nai keungchi ai kapalau i, nichi i mo y luchi teng y mychi adeu nai kamta sa u ai nai vaineng asa hai bo.

¹³Naibaly kaimy i akeng akawmra[1] [2] Nangchi i yhm hawi nangchi i vawnsai bawibawichi ai Tameuh my la pi vui ai i, nangchi i vui ati sai py awm ai ny y,” napi. Huni meingtym y awm nai khumichi my, “Amen!” nanai thui u chum baly ARENG ai palo u bo. Naibaly luchi ly mymychi i leu adeu nai kamta sa u nai ne.

¹⁴Kai ly Juda pri y samrang i bangtang kalen lawm nai saneng holai nyhrei sala y, empara samrang Artazeret i peang nai saneng apomrei dengdai saneng phai palyh nyhrei saneng tym pa-rei, kai hawi vanrei kai i amjo amnauchi ly samrang i bangtang kalen i nga ai avo nai cha nei vawnchi kalo y.

¹⁵Kai ny y rai khala i peang nai samrang i bangtang kalenchi ly mipuichi ai myn ji hai bo. Nichi teng i cha nei vawn hawi kreip hang i vui kanirei y tangka chang vui palyhrei hnei nai ne. Huni samrang i bangtang kalenchi i miseaungchi malawn py, mipuichi ai pahyp y naimy ana u bo. Na i py kai ly Tameuh ai jei kaji naimy tahm khai nai deaungkho y, huna nai kamta kaso y.

¹⁶Kaimy teng y awm nai atho ham naira ai ly mary apai sa naira y kapasum nai ne. Kai ly mani li py van y; kai i kalop sa nai khumi ngiereichi py mary apai sa naira y abawi u bo.

¹⁷Pri deaungpa mang i kai teng y jeu nai khumichi khyh chang y naimy, Juda chengchi hawi nichi i lu leaung 150 reichi ai, kai ly kaimy i sabawira y avawrei kapacho nai ne.

¹⁸Huna nai kamta kapacho ai nai molam kani tlei tleirei si harei, khai patyp nai beram tariurei hawi a neangneang tleh hai bo. Huni bo y kani horei y tlenrei kreip hang kapanei; na i py kai ly mipuichi pho ai nai mynji, nanai kapany nai deaungkho y, samrang i bangtang kalen i vui nga ai avo nai cha nei vawnchi kahnei y nai ne.

¹⁹Aw Tameuh, hini khumichi i vui kasa pi nai cheaungkhangchi pany pi ly kai i chiu sa nai tangai pi kyh ba.