Read Khumi Chin NEHEMIA 6 Bible Online

NEHEMIA 6 - Khumi Chin bible

NEHEMIA 6

¹Kaichi ly mary katheuchi tai y rai teu i py mary apai sa pajau nai satang py, mary apaichi khovau nai meingtymchi by y nai satang py Sanbala, Tobiah, Keshem hawi takhra paleung ka-echi thai u bo.

²Naibaly Sanbala hawi Keshem nini ly Ono adymra i avang hareira y nichi hawi ka-vum sa ai nai kai ai ang taviu; huna nai ang taviu nai ly kai ai rai naira tym hai ai nai ang tapawp nai ne.

³Kai ly nichi teng y khumi pato iy, “Kai ly hinira y aly len nai kalop kasa nai deaungkho y, huni meingtym y kang jeu pajau y; nangchi hawi avum ai nai aly harei khyh naira y ly hini kalop anawn vui iy khai su pajau y leang,” nanai pathang pi bo.

⁴Nichi ly tlen palyhrei typtyp ang taviu i, kai py hunai kamta tlen palyhrei typtyp pathang pi teang.

⁵Naibaly tlen pa-ngo Sanbala my savai leaungrei pato i, pajawp typ nai ka-ma-ra by y nai cha[3] ang syn.

⁶Cha i leu saichi ly “Nang hawi Juda chengchi ly tavai thau ai nai tau nai ka-dawn y mary apai sa u nai ne, nanai tengpang sahawi i khumichi my thui pi nai satang ai, Keshem teng i nai kai ly thai bo. Nang ly samrang sa ai nai ngai nai deaungkho y,

⁷Jerusalem mary y amy ai Juda samrang ne, nanai amthang hai ai nai amo phyreichi hawi ka-vo sa yb nai satang ly Keshem my kai teng y ang thui pi nai ne. Samrang ly hini satang thai takengkei ai; hunai deaungkho y arum ai nai jeu ba,” nanai cha theung y abawi nai ne.

⁸Kaimy py, “Nang i thui nai ngiereichi ly harei py teng y; nangmy pasym atyhtyh nai leu teu,” nanai kapathang pi.

⁹Mary apai sa nai kalop anawn hai vui ai nai nichi bawibawi ly kaichi ai pajei nai ne. Na i py, “Aw Tameuh, vai, kai teng y atho ham naira pei kyh ba,” nanai chiu kasa.

¹⁰Huni neng thym khala y Mehetabela i katu, Delaiah i chapo Shemaiah ly mymy yhm i nai theu pajau y nai deaungkho y, kai ly ni teng y chei i ni my, “Ani ly Achura yhm i meingtym kachai theung y aheu iy, katheuchi akho veng sina. Nichi ly nang ai padei ai nai ang jeu u ai. Mani dym py ne sy, ang jeu iy nang ai ang tleh ai,” nanai kai teng y ang thui pi bo.

¹¹Naibaly kaimy, “Kai ly preang iy aheu reng nai khumi ny y; deira i tleaung ai nai Achura yhm theung y aheu reng nai khumi, nanai nang athang khai a? Achura yhm mang y kachei y leang,” kanapi.

¹²Hini molam y kai adawn nai khala, hunai kamta Shemaiah my ang thui pi nai ly ni teng y Tameuh my leu taviu nai deaungkho y ny y; Tobiah hawi Sanbala nini my un pei i thui hai nai ne, nanai kapany veng bo.

¹³Nichi ly kai ai kamngo sa hai ai ngai nai molam y tahm anem iy, kangji nga hai ai nai nichi ly Shemaiah ai alai iy ang pajei nai ne.

¹⁴Aw Tameuh, Tobiah hawi Senbala i sa nai ly pany iy, nini ai pajeng kyh ba. Kai ai pajei ai nai atho sa nai keung neampachy amo Noadiah hawi takhra amochi ai pany jo ba.

¹⁵Kalop sa nai kani 52 rei awm nai khala y, Elula lo kani 25 rei kani y, mary apai sa nai anawn bo.

¹⁶Hini satang ly tengpang sahawi prichira y awm nai, kaichi i paleung ka-echi my thai nai khala ly mymychi tahm anem bo, nanai apany u bo. Ati mana nai mo na baly hini kalop amcheang vui nai ly Tameuh my sabawm nai saho y ne, nanai khumi luteng pany nai deaungkho y ne.

¹⁷Hini neng thym khala Juda cheng luchi ly Tobiah teng y cha hawi amtawn u nai ne.

¹⁸Ni ly Arah i chapo, Shekaniah i meaungcha ne i, Juda cheng neangneangchi malawn py, ni mang y abawi u bo. Naibaly ni i chapo Jehohanan ly Berekhia i chapo Meshulam i chaniu hawi yhmtheaung sa nai ne.

¹⁹Khumichi ly Tobiah i hawi nai satang kai teng y amti u reng; kai i leu py ni teng y amti pi reng teang. Tobiah ly kai ai pajei ai nai chachi avawrei ang pa jojo nai ne.