Read Khumi Chin NEHEMIA 7 Bible Online

NEHEMIA 7 - Khumi Chin bible

NEHEMIA 7

¹Vai ly mary apai palum teang nai ly pajau bo i, apai katheuchi py my i meingtym y tai be pajau bo. Naibaly Achura yhm tamcheaung typ naichi, khulym kamkawmchi hawi Levi theaungchi teng y, mymychi sa ai nai kalopchi phy paji pi chum bo.

²Naibaly kai ly Jerusalem mary y peang ai nai kaimy i amjo amnau Hanani hawi yhm ka-sang kry nai keung Hananiah nini teng y kalop au nai ne. Hananiah ly ka-ym awm nai khumi, Tameuh ai khri pa-rei jei kaji nai khumi ne.

³Kai ly nichi teng y, “Khawn mang kani achaw deaung y ryrei ly Jerusalem mary apai katheuchi paeaung hai moh. Kani dymmo katheu pa-kho typ naichi kalop anawn nai neng ny y rai nai khala y, katheu pa-khochi akho iy katheu lengteaungchi atleang u typ na sy,” nanai leu taviu typ bo. Jerusalem mary y awm naichi theung i tamcheaung typ naichi khai takhra iy, phyreichi ai ly ka-vo sa yb nai meingtymra y typ hai i, phyreichi ai ly mymychi i yhm tengpang y tamcheaung typ hai ai nai py, leu pei patyp nai ne.

⁴Jerusalem mary ly kau parai teu i py, mary theung y awm nai khumichi ly di parai; yhmchi py neangneang so u y leang rai.

⁵Mipuichi, nichi i luchi hawi peang nai keungchi ai angym hai iy, yhmdeaung charangchi la ai nai Tameuh my kai i paleung y pacheang bo. Naibaly langheng hawi nai khumichi theung i, vawi ali manme nai khumi charangchi hina nai kamta kaniu nai ne.

⁶Babulon samrang Nebukhadnezar my langheng hawi nai dengdairei, Babulon pri y awm naira i vawi ali teang naichi ly mymychi i saleaung khuteng Jerusalem mary hawi, Juda pri i mymychi i marychi mang y vawi u nai ne.

⁷Nichi ai lu sa nai keungchi ly Zerubabela, Joshua, Nehemia, Azariah, Raamiah, Nahamani, Moradekai, Bilashan, Misaperet, Bikavai, Nehum hawi Baanachi ne,

⁸Pri palara i vawi u ali teang nai Israela nupai vuikanai ly anui mang i naichi ne. Parosh nupai--2,172 Shephatiah nupai--372 Arah nupai--652 Pahat Moba nupai (Jeshua hawi Joaba nini i kangpreangchi) -- 2,818 Elam nupai -- 1,254 Zattu nupai -- 845 Zakai nupai -- 760 Binnui nupai -- 648 Behai nupai -- 628 Azaka nupai -- 2,322 Adonikam nupai -- 667 Bikavai nupai -- 2,067 Adin nupai -- 655 Ater nupai (Hezekia, nanai py amyn nga) -- 98 Hashum nupai -- 328 Bezai nupai -- 324 Harip nupai -- 112 Kibeon nupai -- 95

²⁶Anui mang i marychi theung y awm u nai, amsi pajochi dengdairei angpreng naichi py vawi u teang nai ne. Bethlehem mary hawi Netopha mary i -- 188 Anatho mary i -- 128 Beth Azamaveth mary i -- 42 Kiria Jarim mary, Khephirah mary hawi Beroth mary i -- 743 Ramah mary hawi Keba mary i -- 621 Mimash mary i -- 122 Bethela mary hawi Ai mary i -- 123 Takhra Nebo mary i -- 52 Takhra Elam mary i -- 1,254 Harim mary i -- 320 Jeriko mary i -- 345 Loda mary, Hadi mary hawi Ono mary i -- 721 Senaah mary i -- 3,930

³⁹Pri palara i vawi teang nai pathyp pi nai keungchi i nupaichi ly anui mang i naichi ne. Jedaiah nupai (Jeshua i kangpreangchi) -- 973 Immera nupai -- 1,052 Pashura nupai -- 1,247 Harim nupai -- 1,017

⁴³Pri palara i vawi teang nai Levi theaung i nupaichi ly anui mang i naichi ne. Jeshua hawi Kadamiela nupai (Hodaviah i kangpreangchi) -- 74 Achura yhm i katyn kapau beu kawp nai Asaph i kangpreangchi -- 148 Achura yhm tamcheaung typ nai risachi (Shalum, Ata, Talamon, Akub, Hatita hawi Shobai kangpreangchi) -- 138

⁴⁶Pri palara i vawi teang nai theung i, Achura yhm y kalop sa nai nupai amynchi ly anui mang naichi ne. Ziha, Hasupha, Tabaoth, Keros, Sia, Padon, Lebanah, Hakaba, Shalmai, Hanan, Kidela, Kaha, Reaiah, Rezin, Nekoda, Kazam, Uz, Paseah, Besai, Meunim, Nephushesim, Bakabu, Hakupha, Harahu, Bazalith, Mehida, Harasha, Barakos, Sisera, Temah, Neziah hawi Hatipha.

⁵⁷Pri palara i vawi teang nai theung i Solomon i miseaung nupai amynchi ly anui mang i naichi ne. Sotai, Sophereth, Perida, Jaalah, Darakon, Kidela, Shephatiah, Hatila, Pokhereth Hazebim hawi Ammon.

⁶⁰Pri palara i vawi teang nai theung i Achura yhm y kalop sa naichi hawi Solomon i miseaungchi dengdairei angpreng nai khumi vuikanai ly 392 rei awm nai ne.

⁶¹Tel Melah mary, Tel Harsha mary, Kheru mary, Adon mary hawi Immera marychi mang i vawi teang nai Delaiah, Tobiah, hawi Nekoda nupaichi ly 642 rei ne. Na i py nichi ly Israela cheng kangpreangchi ne, nanai ami py thui khyp pajau y.

⁶³Anui mang i pathyp pi nai keung nupaichi ly mymychi i amsi pajochi ami mo, nanai thui khyp pajau y. Hobaiah, Hakoza hawi Bazilai (Bazilai nupai pathyp pi nai keung i amsi pajo ly Kilead pri i khumi Bazilai nupai theung i neampachy hawi apom iy, my i ampu nupai amyn y angam nai ne.) Nichi ly mymychi i amsi pajochi ami mo, nanai thui khyp pajau y nai deaungkho y, pathyp pi nai keung kalop sa ai nai ngo u y.

⁶⁵Juda samrang i bangtang kalen my nichi teng y, “Nangchi ly Urim hawi Thummim ai teaung iy leu pacheang pajau nai pathyp pi nai keung leaungrei py by y nai ryrei ly Tameuh teng y talam nai teicha teineichi cho ngau y,” napi.

⁶⁶Pri palara i vawi teang nai khumi bawibawi ly — 42,360 Nichi i miseaung neampacho, neampachychi — 7,337 Katyn kapau beu kawp nai neampacho, neampachychi — 245 Keaungngo — 736 Keaungngo kaneaung kasau — 245 Kula-iu — 435 Keaungngo kano kasau — 6,720

⁷⁰Khumi mipuichi my Achura yhm palum teang naira y pei talam nai kasabawmrachi ly anui mang i naichi ne. Samrang i bangtang kalen my muku — sie — 12 — Achura yhm y teaung nai rahum — 50 — Pathyp pi nai keungchi i ateaung — 530 Nupai lu sa naichi my muku — sie — 235 Tangka — sie — 2,235 Huni bo y khumi mipuichi my muku — sie — 235 Tangka — sie — 2,030 — Pathyp pi nai keungchi i vui ateaung — 67

⁷³Pathyp pi nai keungchi, Levi theaungchi, Achura yhm tamcheaung typ nai risachi, katyn kapau beu kawp naichi, mipui neangneangchi, Achura yhm y kalop sa nai khumichi, napi nai Israela cheng bawibawichi ly mary katheang kalenchira y khuteng chah u nai ne.