Read Khumi Chin NEHEMIA 8 Bible Online

NEHEMIA 8 - Khumi Chin bible

NEHEMIA 8

¹Saryh lo tym nai khala y Israela chengchi ly mymychi i mary katheang kalenchira y khuteng chah u bo. Huni lo kani harei kani y nichi ly Jerusalem mary tuilam pa-kho theung mang i meingtymchyra y angym u. Nichi ly Israela chengchi teng y Mosi i dengdairei, ARENG my pei nai Reita leuchi pany keh nai pathyp pi nai keung Ezara teng y, huni Reita leu cha-iu syn ai nai takeng u bo.

²Hunaibaly Ezara ly pany thai kawp nai neampacho, neampachy mipui akachu nai meingtym y, huni Reita cha-iu syn iy,

³tuilam pa-kho sahawi meingtymchyra y, khawn khutawi khyp kala i dengdai kani thunteng nai neng ryrei phain pi. Khumi bawibawichi ly paleung apei parai naimy tangai u.

⁴Ezara ly huni neng i vui dengkeaung hawi sa yb nai chang salo y angdo iy Reita leu cha-iu phain pi nai ne. Abang nai Matithia, Shem, Anaiah, Uriah, Hilikiah hawi Maaseiahchi ly ni i lamtang mang y angdo u; Pedaiah, Mishaela, Malakhijah, Hashum, Hasabadana, Zekhariah hawi Meshulamchi ly ni i langvawi mang y angdo u nai ne.

⁵Ezara ly huni khumichi salo chang tleaung mang angdo nai thym khala y, khumi mipuichi ly nichi ai khen ripati na; cha-iu paeaung nai khala, nichi ly angdo u nai ne.

⁶Ezara my, “Nang parai nai ARENG Tameuh ai ly kawn naimy palo nai awm sy!,” napi. Khumi mipuichi ly kani mang y kiu pado u naimy, “Amen!, Amen!” nanai thui u chum baly kheukhu di iy meimai khaileaung y abi vi na pa-rei chiu u bo.

⁷Naibaly khumichi ly mymychi meingtym i nai ang thau iy angdo u. Hunaibaly nichi teng y Levi theaung Jeshua, Bani, Sherebiah, Jamin, Akub, Shabethai, Hodiah, Maaseiah, Kelita, Azariah, Jozaba, Hanan hawi Pelaiahchi my Reita leu cha-iu i awm nai sai thui pi pachai.

⁸Nichi ly Tameuh i Reita leu pei nai khumichi pany thai ai nai leu tapeang[4]iy thui pi pachai bo.

⁹Nichi ly Reita leu pei nai theung i dawn hai naichi thai nai khala y, paleung ama nai vo u bo. Naibaly samrang i bangtang kalen Nehemia, Reita leu kawp nai pathyp pi nai keung Ezara hawi Reita leu pei nai cha-iu i awm nai sai thui pachai nai Levi theaungchi my, “Vaini ly nangchi i ARENG Tameuh i kani kachai ne. Hunai deaungkho y nangchi ly paleung ama nai vo tangam u moh.

¹⁰Vai ly yhm y vawi u iy amo theu naimy cho nei u. Nangchi i teicha teinei hawi kreip hang ly khumi kamawnchi teng y paji pi u. Vaini ly achi i Areng i kani kachai ne nai deaungkho y, paleung mawn u moh. ARENG teng i nga nai amo theu naira ly nangchi ai atho angym hai ai,” nanai thui u nai ne.

¹¹Levi theaungchi ly amki iy huni kani kachai y paleung si y naimy, paleung awmnem u ai nai khumichi teng y thui pi bo.

¹²Hunai deaungkho y khumi bawibawichi ly thai nai Reita leu pany thai nai y, amymy i yhm y vawi u i, amo theu parai naimy cha nei u iy, takhra khumichi ai paji pi sei nai ne.

¹³Huni bo i kani y nupai lu sa naichi ly pathyp pi nai keungchi, Levi theaungchi hawi vanrei, Reita leu amtiu ai nai Ezara teng y chei u nai ne.

¹⁴Nichi ly Mosi dengdairei ARENG my pei nai Reita leu theung y Taichy pawi neng, na baly Israela chengchi ly awmdaw nai taichira y awm u ai nai tla, nanai leu pei kheng nai avum u bo.

¹⁵Hunaibaly nichi my, “Reita leu cha-iura y tajiu nai kamta, mawichi mang y chei u iy Olive changpi, maicha keung changpi, Murtu keung changpi, chamleaung keung changpi hawi takhra dengkeaung changpichi la iy, taichy sa u ai nai tla,” nanai Jerusalem mary hawi mary katheang kalen tleirei y satang ahei hai bo.

¹⁶Naibaly khumichi ly dengkeaung changpichi la iy, mymychi i yhm amphu sambeura y, yhm apai theung y, Achura yhm apai theung y, tuilam pa-khora y hawi Ephraim katheu pa-kho sahawi i meingtym chychira y taichychi sa u bo.

¹⁷Langheng hawira i vawi teang nai khumi bawibawichi ly dengkeaung changpichi hawi sa nai taichychira y awm u nai ne. Hini ly Nun i chapo Josua deung i dengdai vaini ryrei y angchei i Taichy pawi sa nai ne i, khumi luteng amo theu u.

¹⁸Nichi ly pawi angchei kani dengdai kangkhym i kani tym pa-rei, kani tleirei Tameuh i Reita leu phain u bo. Nichi ly huni pawi ai kani saryhrei sa u i, kani tajarei kani y ly Reita leura y thui yb nai kamta pawi sa u nai ne.