Read Khumi Chin ESTHER 1 Bible Online

ESTHER 1 - Khumi Chin bible

ESTHER 1

¹Samrang Ahasuru ly Pasia pri Susa mary pui samrang i atehra bailang tleaung y ateh iy, India pri dengdairei Ethiopia pri tym pa-rei, pri khu ka-peang 127 reichi ai peang nai ne.

³Ni ly peang nai pa-thom saneng y mymy i bangtangchi hawi, peang nai miteaungkeh bawibawichi ai palau iy cha nei pawi pui sa i, pacho panei bo. Huni pawira y Pasia hawi Medi pri i tavaimichi, samrang i khu ka-peang bangtang kalenchi hawi, samrang i bangtangchi py jeu u nai ne.

⁴Ni ly mymy yhm i nang chawn nai hawi nang parai naira ai lo tariurei patei pi bo.

⁵Naibaly samrang ly kamawn, kanang patleh takhra y naimy, Susa mary i khumi mipuichi ai py cha nei pawi pui sa pi i, pacho panei nai ne. Huni cha nei pawi pui ly samrang i yhm akho apai theung y kani saryhrei sa pi.

⁶Huni akho apai theung y tangka sengtleng tai nai leungtau kangleung yhmmawmchi ra y, kanih mai ka-syn kangleung kamngauchi ly kalang kangdauchi hawi thang iy ka-pu sa nai ne. Naibaly leungtau kangleung, leungtau kamsen, khawisaleng lengseaung, lengseaung kamngau-achi hawi mawi sa iy padai; samrang i akho apai theung y muku tangkachi hawi sa nai jawnrachi py khai pi.

⁷Samrang ly kreip hang ai muku khauchi hawi tleng iy panei hai bo. Huni khauchi ly ha harei atawm y. Kreip hang ly ngai nai ryrei nei hai.

⁸Khumi luteng ngai nai ryrei nei pajau thai ai nai samrang yhm i miseaungchi teng y leu pei yb bo.

⁹Huna nai thym khala y samrangnu Vasati py, samrang yhm theung y neampachychi ai cha nei pawi pui sa pi iy pacho panei nai ne.

¹⁰Pawi sa nai saryh kani tym nai khala samrang ly kreip hang nei nai amo theu nai thym y, mymy i sahawi y awm nai tli chum nai leaung saryhrei Mehuman, Bizatha, Habona, Abakatha, Zetha hawi Kakachi ai palau i,

¹¹samrangnu Vasati ai areng lukhym amyn hai iy, mymy i mo y tym ai nai leu pei bo. Samrangnu ly mo-cha hawi parai nai neampachy ne nai deaungkho y, samrang ly ni i mo hawi nai ly samrang i bangtangchi hawi angvyn bawibawichi teng y patei ai nai ngai.

¹²Na i py samrangnu Vasati ly tli chum naichi my thui pi nai samrang i leu pei nai tangai y i, mymy i mo y tym pi y nai deaungkho y samrang ly khri pa-rei kado theu bo.

¹³Samrangchi nanai ly ka-jo ka-thui by y, amrip sup ai nai molam y reita leaungsai pany kawp nai khumichi teng y leu khulym deng reng nai awm i, samrang ly huni molam y mana sa ai nai avo ai mo, nanai tau pei nai miteaungkehchi ai palau bo.

¹⁴Samrang i adeng ahui nai nawikeh naichi ly Pasia hawi Medi bangtang leaung saryhreichi napi nai Kashina, Shetha, Adamatha, Tarshish, Miret, Masena hawi Mamukanchi ne. Nichi ly pri theung y tahm asangkeh nai meingtym nga nai khumichi ne.

¹⁵Samrang my nichi teng y, “Kai, Ahasuru samrang ly kai i miseaungchi ai samrangnu Vasati teng y kapato iy kai i leu pei nai thui hai i, ni ly kai i leu tangai y! Hunai deaungkho y kai ly ni i tlang tleaung y reita kamta mana sa ai nai avo mo?” nanai deng.

¹⁶Naibaly Mamukan ly samrang hawi bangtangchi teng y, “Samrangnu Vasati ly samrang ai mei anui y nai khyh ny y; samrang i bangtang kalenchi ai py mei aniu y nai tla. Meitang khyp thui ai na baly, ni ly empara pri verei y awm nai neampacho bawibawichi ai py mei aniu y nai ne.

¹⁷Empara pri verei y awm nai neampachy bawibawichi ly samrangnu i sa nai sai thai u nai khala y, mymychi i juvochi tlang tleaung y tahm khai u y ai. Nichi my, ‘Samrang Ahasuru ly samrangnu jeu ai nai palau teu i py samrangnu my tangai pi y, ‘nanai thui u ai.

¹⁸Samrangnu i sa nai sai thai u nai Pasia hawi Medi bangtangchi i ajuchi ly kani dym y naimy juvochi teng y, huni satang amti pi ai. Naibaly neampachychi ly mymychi i juvochi tlang tleaung y tahm khai u y ai i, neampachochi ly mymychi i ajuchi tlang tleaung y kado theu u ai.

¹⁹Samrang nangmy ngai na baly, samrangnu Vasati ai mo mang y mana khala py nang i mo y kun ai nai pei y, nanai leu pei ba. Huni leu pei nai ai mo mang y mana khala py alie vui y na pa-rei, Pasia hawi Medi pri i reita cha-iu theung y tajiu typ iy khai ba. Naibaly samrangnu i meingtym y, ni tleaung y hawikeh nai neampachy leaungrei ai palyn ba.

²⁰Samrang nang i leu pei nai ai, hini kau parai nai empara pri verei y thai hai nai khala y neampachy bawibawichi ly mymychi i juvochi tlang tleaung y kamawn py ne sy, kanang py ne sy, tahm khai u ai,” napi.

²¹Samrang hawi mymy i bangtangchi ly huni leu ngai u bawibawi nai ne. Huna nai y samrang ly Mamukan i tau pei nai kamta sa bo.

²²Ni ly mymy i khu ka-peang tleirei y savaichi pato iy, meingtym tleirei i cheng leu hawi satang thai hai nai ly “Juvo napi nai ly mymy i yhm dengtheungra y lu sa nai keung lawm ai nai tla. Ni i leu ei vui pajau y,” napi.