Read Khumi Chin ESTHER 2 Bible Online

ESTHER 2 - Khumi Chin bible

ESTHER 2

¹Naibaly samrang ly kado theu nai rym bo na baly, Vasati i sa nai saichi py, mymy i ahei hai nai leu ai py adawn nai ne.

²Hunaibaly mymy hawi amrawi nai tau pei nai miteaungkehchi my samrang teng y, “Ati mana nai y samrang nang ly mo hawi nai anglochi ai hau hai y lawh mo?

³Empara pri theung i khu ka-peang neangneang theung y miteaungkehchi khai takhra iy, mo hawi nai anglo bawibawichi ai Susa mary pui, samrang nangmy i anglo i-savangra y pangym achu hai. Nichi ai nang i tli chum nai Hekai teng y au iy anglo aso hai ba.

⁴Naibaly samrang nangmy khreikeh nai anglo ai vawi takhra iy Vasati i jeng y samrangnu palyn ba,” nanai tau pei u nai ne. Samrang ly huna nai tau pei nai ngai i, hunai kamta sa bo.

⁵Naibaly Susa mary pui theung y Ja-ira i chapo Modekai napi nai Juda cheng leaungrei awm. Ni ly Benjamin nupai theung i ne i, Kisha hawi Shimei nini i kangpreang ne.

⁶Babulon samrang Nebukhadnezar ly Juda samrang Jehojakhin ai patiu iy, Jerusalem mary i dengdairei hawi vui nai khala y, Modekai py langheng hawi nai theung y abawi nai ne.

⁷Ni teng y Esther napi nai tuicho lengsang awm. Esther i Juda cheng amyn ly Hadasa ne. Ni i amhm ampo dei vui nai khala y Modekai ly ni ai pacho i, my i chaniu kypkyp kamta kry. Naibaly Esther ly mo cha hawi i, tlum tlang apheung hawi nai neampachy leaungrei ne.

⁸Naibaly samrang my patheu nai satang kangtha kamta, anglo neangneangchi ai Susa mary y hawi u nai khala y, Esther py abawi nai ne. Ni ai py samrang yhm y kha i, tli chum nai Hekai teng y au u bo.

⁹Hekai ly Esther i tlang tleaung y paleung abi nai deaungkho y meimai nga. Tlang panem pi nai hawi teicha teinei pacho patyp nai amteaung kaliki bo. Anglo savangra y hawikeh nai meingtym pei iy, samrang yhm i neampachy leaung saryhreichi ai vawi patyp i, Esther ai kry hai nai ne.

¹⁰Esther ly Modekai my tau pei nai kamta, mymy i Juda cheng ai ly apha typ vui bo.

¹¹Modekai ly kani tleirei Esther i awm nai sai py, ni i tlang tleaung y ati mana so u na mo, nanai py pany pajau ai nai anglo savang yhm mo y avawrei aleaung ali nai ne.

¹²Anglochi i vui y reita kamta anglo asa hai nai ly sanengrei awm na bo. Nichi i tlang tleaung y Mura asitui hawi lo tariurei, thengmui keung asitui hawi lo tariurei tlang panem pi nai ne. Naibaly neampachychi ly ka-thui ka-thui samrang Ahasuru teng y kun u.

¹³Samrang teng y kun ai tla nai neampachy ly anglo savang dengdairei samrang yhm mang y chei nai khala y, amy i ngai nai ateaungchi amthyp pajau.

¹⁴Neampachy ly dym mang samrang yhm y kun ai nai nga iy khawn mang baly samrang i tli chum nai Shasakaz my kry nai i-savang mang y vawi hai teang ai nai tla. Samrang my khrei nai amyn palau y lawh baly, samrang teng y kun bi ai nai ngo y.

¹⁵Abihaila i chaniu, Modekai i tuicho lengsang, pacho nai chaniu, niu nai ngiereichi my lyh riri nai Esther ly samrang teng y kun ai nai neng tym nai khala y, anglo i-savang kry nai keung tli chum nai Hekai my pateaung pi nai ateaungchi amthyp iy chei bo.

¹⁶Hunaibaly Esther ly Ahasuru i samrang lyn nai saryh saneng, Tabeth napi nai lo horei khala y samrang yhm Ahasuru i mo y tym nai ne.

¹⁷Samrang ly takhra neampachychi tleaung y ni ai khreikeh nai deaungkho y, ni ly samrang teng y meimai nga i, samrang my khrei nai ne. Naibaly samrang my ni ai samrang i areng lukhym amym hai chum baly, Vasati i meingtym samrangnu ra y palyn bo.

¹⁸Naibaly mymy i bangtangchi hawi miteaungkeh bawibawichi ai palau iy, Esther ai tahm pasang nai cha nei pawi pui sa nai ne. Ni ly empara pri verei y huni kani ai ly kalop amdaw nai kani, nanai khai takhra iy thai hai i, samrang i tahm hawi amlau nai langseaungchi py pei pi bo.

¹⁹Huna nai neng thym khala y samrang ly Modekai ai samrang i yhm y kry nai miteaungkeh meingtym hareira y khai bo.

²⁰Esther ly Modekai my taviu yb nai kamta, mymy i Juda cheng ai vai khrairei ami ai py pany hai y bo. Ni ly deaungdi khala y Modekai i leu tangai nai kamta, hini molam y py leu tangai nai ne.

²¹Modekai ly samrang i yhm y kry nai kalop sa nai thym khala y, samrang i yhm katheu pa-kho typ nai samrang i tli chum nai leaung nyhrei Bithana hawi Teresh nini ly samrang Ahasuru i tlang tleaung y kado theu nai deaungkho y, padei vui ai nai kangviu y dawn hawi nai ne.

²²Modekai ly huni satang thai nai deaungkho y samrangnu Esther teng y amti pi. Naibaly Esther ly samrang teng y Modekai i pany nai sai thui pi.

²³Huni molam chih nai khala, Modekai my pei nai satang ly teng, nanai pany nai deaungkho y, huni leaung nyhrei ai akaeu naira y padei vui nai ne. Samrang ly hini molam y empara pri cha-iu theung y tajiu hai typ bo.