Read Khumi Chin ESTHER 6 Bible Online

ESTHER 6 - Khumi Chin bible

ESTHER 6

¹Huni vum y samrang ly i kamhm pei y nai deaungkho y empara pri peang nai cha-iu hnei i, phain hai bo.

² Huni pri peang nai cha-iu theung y samrang yhm typ nai tli chum nai Bikathana hawi Teresh nini ly kangviu y samrang ai padei ai nai tau nai sai ai Modekai my pany nai satang abawi nai ne.

³Naibaly samrang my, “Hini molam y Modekai ai achi my ati tahm pasang iy ati langseaungchi pei pi mo?” nanai deng. Samrang i miseaungchi my, “Huni khumi i vui ati sai py so pi y leang rai,” nanai pathang u.

⁴Samrang my, “Samrang yhm theung y kai i bangtang leaung leaungrei awm a?” nanai deng. Hunai thym khala Haman ly samrang yhm theung y kun nai ne. Ni ly mymy i pado nai akaeura yhmmawmra y Modekai ai padei ai nai molam, samrang teng y hnei ai nai katau hawi jeu nai ne.

⁵Naibaly samrang yhm i miseaungchi my, “Haman awm, ni ly nang i mo y kun ai nai ajeng jo,” napi u. Samrang my, “Ni ai kun sy,” napi.

⁶Hunaibaly Haman ly samrang teng y kun bo; huna nai khala samrang my ni teng y, “Kai ly tahm pasang ai ngai nai khumi leaungrei awm; huni khumi ai ati mana tahm kapasang ai mo?” nanai deng. Haman ly samrang my ami ai tahm pasang ai ngai nai mo, kai ai naini ne ngaw khyh,” nanai adawn.

⁷Hunaibaly Haman my samrang teng y, “Samrang nang i amthyp nai ateaung alangchi, atang nai keaungngo hawi nang i adeung nai areng lukhym lo hai ba.

⁹Naibaly nang i bangtang leaungrei my huni khumi ai huni ateaungchi amthyp hai; keaungngo tleaung y atang hai ly keaungngo ai ryh naimy mary amki hai iy, ‘samrang ly mymy i tahm pasang ai ngai nai khumi i tlang tleaung y mana tahm pasang mo, nanai khen u,’ nanai aeu hai ba!” napi.

¹⁰Naibaly samrang my Haman teng y, “Ateaung alang hawi keaungngo lo kaliki ly Juda cheng Modekai ai tahm pasang ba, nang i thui nai kamta so; ni ly samrang yhm katheu pa-khora ateh nai nang niu ai mang,” napi.

¹¹Hunaibaly Haman ly ateaung alang hawi keaungngo la iy Modekai ai ateaung alang amthyp hai i, keaungngo tleaung y atang hai bo. “Samrang ly mymy i tahm pasang ai ngai nai khumi ai mana tahm pasang mo, nanai khen u,” nanai aeu naimy keaungngo ai ryh iy mary theung y amki ai nai tla bo.

¹²Naibaly Modekai ly samrang yhm katheu pa-khora y tym teang. Haman ly tangam i lu amyn iy, paleung hawi y parai naimy yhm y vawi bo.

¹³Mymy i aju hawi ahawichi teng y my i avum nai leaungsai bawibawichi amti pi. Huna nai khala y aju hawi mymy i ahawi kachengchi my, “Nang ly Modekai teng y sum amteaung bo; ni ly Juda cheng ne khyp lawh baly nang ly ni ai pajau y leang; ni ly nang i tlang tleaung y pajau takengkei ai,” napi u bo.

¹⁴Nichi hina nai kamta katheu u nai thym khala y my, samrang yhm i tli chum naichi ly Haman ai Esther i dym biu cha pawira palau nai tym u tamang tang bo.