Read Khumi Chin ESTHER 8 Bible Online

ESTHER 8 - Khumi Chin bible

ESTHER 8

¹Huni kani y my samrang Ahasuru ly Juda chengchi i paleung ka-e Haman i peang nai yhm hlau hawi vawnsai bawibawichi ai Esther teng y pei pi nai ne. Esther my, mymy ly Modekai hawi amjo amnau ne, nanai samrang teng y thui pi nai deaungkho y, Modekai ly huni kani dengdairei samrang i mo y kun ai nai nga bo.

²Samrang ly Haman teng i la teang nai pajawp typ nai ka-ma-ra kiusabyh aleng iy Modekai teng y pei pi; Esther my py Haman i yhm hlau hawi vawnsaichi Modekai ai kry hai bo.

³Naibaly Esther ly samrang i kheu keung angbeu iy vo naimy samrang teng y, Juda chengchi ai padei ai nai molam, Aka i kangpreang Haman i dawn tau nai ka-jeira paka pi ai nai takeng bo.

⁴Samrang ly ni teng y muku tivi talam pi nai deaungkho y, Esther ly ang thau iy angdo naimy,

⁵“Samrang nangmy ngai na baly, kai ai paleung tuinem ai na baly, nangmy avo napi baly, empara pri theung y awm nai Juda cheng bawibawichi ai padei ai nai Aka i kangpreang Hamedatha i chapo Haman i sa nai molam y, leu pei nai chachi taphra teang nai cha patheu pi ba.

⁶Kai i chengchi ly hini ka-jeira avum nai deaungkho y, kai i amjo amnau ka-bi kypkypchi py dei u be ai na baly, kai ly mana khen jo thai ai mo?” napi.

⁷Naibaly samrang Ahasuru ly Esther hawi Juda cheng Modekai teng y, “Kai ly Haman i Juda chengchi ai padei ai nai dawn tau nai molam y, mymy ai akaeura y padei hai veng bo. Ni i yhm hlau hawi vawnsaichi py Esther teng y kapei veng bo.

⁸Na i py samrang amyn hawi tajiu nai, kiusabyh pajawp typ nai ka-ma-ra nip typ iy patheu nai cha ly taphra pajau y; na teu i py nangchi i ngai nai kamta Juda chengchi teng y kai i amyn hawi cha tajiu iy samrang i kiusabyh pajawp typ nai ka-ma-ra nip u typ,” napi.

⁹Huna nai kamta tym nai ly Sivan napi nai pa-thom lo, 23 rei kani y ne. Modekai ly samrang i secretarychi ai palau iy, India pri dengdairei Ethiopia pri y tym pa-rei, pri khu ka-peang 127 reita i samrang i bangtang kalenchi, peang nai keungchi hawi samrang i miteaung kehchi teng y leu taviu nai chachi tajiu ai nai labeaung mang thui pi bo. Huni chachi ai pri khu ka-peang tleireira y teaung nai cheng leuchi hawi py, Juda chengchi i vui Juda cheng leu hawi py tajiu pi nai ne.

¹⁰Modekai ly huni chachi ai samrang Ahasuru i amyn hawi tajiu nai, samrang i kiusabyh pajawp typ nai ka-ma-ra nip typ iy, cha tha nai keungchi ai samrang i keaungngo hai theung i, rang keh nai keaungngochi hawi tha hai bo.

¹¹Huni leu pei nai chachi theung y samrang ly Juda chengchi ai, mymychi i vui amtang ai nai molam y akachu ai nga nai leaungsaichi abawi; mani pri khu ka-peangra py ne sy, Juda neampacho hawi aju chanauchi ai hai syn iy tiu nai mani khumi cheng ai py ne sy, tiu ali teang pajau nai ne. Huni khumichi ai tiu be pajau baly nichi i vawnsaichi lawm vui pajau bo.

¹²Huni leu pei nai cha ly Pasia empara pri verei y, Juda chengchi ai padei ai nai khai yb nai Adar napi nai lo holai nyhrei, kani holai thomrei dengdairei amteaung iy khaw ai nai tla.

¹³Naibaly huni kani tym nai khala y Juda chengchi ly paleung ka-echi ai vawitheung tha ai nai molam, angvei u rym thai ai nai huni leu pei nai cha ai reita palawn iy teaung ai nai, pri khu ka-peang tleirei y awm nai khumi bawibawichi teng y tha hai nai ne.

¹⁴Hunaibaly keaungngo atang iy cha tha nai khumichi ly samrang i leu pei nai kamta, samrang i keaungngochi atang iy khuleaung amsa u kaliki bo. Susa mary pui y py huni leu pei nai ahei hai bo.

¹⁵Naibaly Modekai ly samrang i ateaungchi, napi nai ateaung kangleung hawi kamngau py, kanih kamsenjeaung py amthyp naimy tahm awm parai nai muku areng lukhym amym iy, samrang yhm i dengdairei theu bo. Huna nai khala y Susa mary verei ly palo nai raawi hawi, amo theu aeu nai raawichi hawimy amsau taw na.

¹⁶Juda chengchi ly paleung savairu nai y, amo theu naimy tahm asang u bo.

¹⁷Samrang i leu pei nai satang tym nai pri khu ka-peang hawi mary neangneangchira y Juda chengchi ly amo theu parai naimy cha nei u i, amo theu nai pawichi sa u nai ne. Cheng takhra neangneangchi ly Juda chengchi ai jei u nai deaungkho y Juda reita y kun u bo.