Read Khumi Chin ESTHER 9 Bible Online

ESTHER 9 - Khumi Chin bible

ESTHER 9

¹Adar lo kani holai thomrei kani tym bo; huni kani ly samrang i leu pei nai sa amteaung ai nai kani ne i, paleung ka-echi ly mymychi i kiu tleaung y Juda chengchi tym ai nai nichi ajeng nai kani py ne. Na i py nichi i athang khai nai kamta ny y i, Juda chengchi my nichi ai pajau vui lawh bo.

²Empara pri theung i mary tleirei y Juda chengchi ly mychi ai khrukhra hai ai nai khumichi ai tiu ai nai, mymychi i saleaungchira y angym u bo. Meingtym tleirei i khumichi ly nichi ai jei u nai ne; amimi py nichi ai amtang vam y.

³Thui khyp ai na baly peang nai keungchi, samrang i bangtang kalenchi hawi samrang i kalop sa nai pri khu ka-peang miteaung keh bawibawichi ly Modekai ai jei u nai deaungkho y, Juda chengchi ai sabawm u bo.

⁴Vai ly Modekai ly samrang yhm y sa thai naira awm nai khumi leaungrei ne nai hawi, ni i sa thai naira ly kani tleaung kanirei lenra nai py, empara pri y amthang nai ne.

⁵Hunai deaungkho y Juda chengchi ly paleung ka-echi i tlang tleaung y ngai nai kamta sa pajau; huna nai y nichi ly paleung ka-echi ai haisau hawi tleh u bo.

⁶Susa mary puira y malawn py Juda chengchi ly khumi leaung chungvai pangreichi ai padei u bo.

⁷Hunichi theung y Juda chengchi i paleung ka-e, Hamedatha i chapo Haman i chapo leaung horei, Parshandatha, Dalaphon, Asapatha, Poratha, Adalia, Aridatha, Pamashta, Arisai, Aridai hawi Vaizathachi py abawi nai ne. Na i py nichi teng i vawnsaichi lawm pi y.

¹¹Huni kani y Susa mary theung y padei nai khumi vuikanai ly samrang teng y tym hai nai ne.

¹²Naibaly samrang ly samrangnu Esther teng y, “Susa mary hareira y my Juda chengchi ly Haman i chapo leaung horei abawi rau nai khumi leaung chungvai pangreichi ai padei u bo. Hini pri khu ka-peangchi ra y leaung majirei padei u ai moh! vai nang ly ati ngai rai mo? kang pei ai; ati amjy hnei ai nai ngai rai moh, kang pei ai,” napi.

¹³Esther my, “Samrang nangmy ngai ai na baly vaini Susa mary theung y Juda chengchi i sa nai kamta, khawndam py sa bi ai nai pei rai ba. Naibaly Haman i chapo leaung horeichi i veu py, akaeura yhmmawmchi salora y banghau ai nai leu pei ba,” napi.

¹⁴Samrang ly Esther i hnei nai kamta Susa mary theung y satang thai hai iy, Haman i chapo leaung horeichi ai akaeura yhmmawmra y bang hai bo.

¹⁵Adar lo kani holai palyhrei kani y Susa mary y awm nai Juda chengchi ly akachu u iy, khumi leaung chungvai thomreichi ai padei u bi nai ne. Na i py huni tlenrei py, nichi i vawnsaichi lawm pi u y leang.

¹⁶Pri khu ka-peangchira y awm u nai Juda chengchi py, mymychi dei y ai nai amtang u bo. Nichi ly mymychi ai niu ngai y nai khumi leaung sang saryh taja chungvai pangreichi ai padei nai hawimy, paleung ka-echi ai tamyh u nai ne. Na i py vawnsaichi ly lawm pi y.

¹⁷Huni kani ly Adar lo kani holai thomrei kani ne. Kani holai palyhrei kani y nichi ly khumi ai padei u y naimy, amo theu nai cha nei pawi sa u bo.

¹⁸Susa mary i Juda chengchi ly kani holai thomrei kani hawi kani holai palyhrei kani y khumichi ai padei u iy kani holai pangrei kani y anawn u i, huni kani y amo theu nai cha nei pawi sa u.

¹⁹Apai by y nai mary katheangchira y awm nai Juda chengchi ly Adar lo kani holai palyhrei kani y amo theu nai kani hawi, leaung leaungrei teicha teinei langseaungchi apei leungtang nai kani, nanai palawn iy sa u bo.

²⁰Modekai ly hini satangchi tajiu hai typ bo. Ni ly Paisia empara pri theung i kamlo kang sa y awm nai Juda cheng bawibawichi teng y,

²¹Adar lo kani holai palyhrei hawi kani holai pangrei kani y ly amo theu nai kani palawn iy, pawi sa u ai nai leu pei nai chachi ahei hai bo.

²²Huni kanichi ly paleung ka-echi ai Juda chengchi my tamyh nai kanichi ne. Huni lo ly nichi paleung si paleung mawn naira i nai paleung amo theu naira mang y amtlau vui nai lo ne. Hunai deaungkho y nichi ly huni kanichi tleirei y amo theu nai pawichi sa u iy, mymychi tengtawi py, khumi kamawnchi ai py, teicha teinei langseaungchi pei pi u ai nai ne.

²³Hunai deaungkho y Juda chengchi ly Modekai i leu pei naichi tangai u nai molam y, huni pawi ai saneng tleirei sa nai reita kamta lawm bo.

²⁴ Aka i kangpreang Hamedatha i chapo, Juda chengchi i paleung ka-e Haman ly Purim napi nai tambe va iy Juda chengchi ai padei ai nai kani vawi takhra bo. Nichi chengvui jeungrei ai tamyh vui ai nai ka-vo dawn nai ne.

²⁵Na i py Esther ly samrang teng y kun iy hnei takeng nai khala, samrang my leu pei nai cha patheu pi nai deaungkho y, Haman ly Juda chengchi i vui dawn yb nai deira y, mymy naimy avum nai ne. Mymy hawi mymy i chapo leaung horeichi ly akaeu nai yhmmawmra y dei naira avum u.

²⁶Naibaly huni pawi kanichi ai tambe, napi nai Purim amyn pathi nai deaungkho y Purim pawi, nanai palau u nai ne. Modekai pei nai cha molam py,

²⁷Juda chengchi ly mymychi khyh ny y i, katu chanau hawi Juda reita mang y angpeang nai khumichi i vui py, reita tanyn harei kamta saneng tlei tleirei, huni neng tym nai khala y thui yb nai kani nyhrei ly Modekai i leu pei nai kamta pawi sa u ai nai tla.

²⁸Pri khu ka-peang tlei tleirei hawi mary tlei tleirei ra y Juda yhm dengtheung ngiereichi ly huni Purim pawi ai katu chanau deung khrairei pany jo iy, pawi sa ai nai leu pacheang u bo.

²⁹Naibaly Abihela i chaniu samrangnu Esther hawi Modekai nini ly Purim pawi molam y, Modekai i tajiu nai cha ai Esther i sa thai naira my khaw hai ai nai cha tajiu u nai ne.

³⁰Huni cha ai ly Pasia empara pri theung i pri khu ka-peang 127 reichira y awm nai Juda chengchi teng y pei pi bo. Huni cha theung y Juda chengchi ly patang naira avum u y naimy tlamsa hai ai nai chiu sa pi chum baly,

³¹neng tym nai khala y mymychi paleung ka-dyh dawn yb nai kamta mymychi hawi mymychi i katu chanauchi ly biu hai nai hawi paleung si vo tangam naichi sa chum baly Purim pawi kanichi sa ai nai leu pei nai ne. Hini leu pei nai ly samrangnu Esther hawi Juda cheng Modekai nini my patheu nai cha ne.

³²Purim pawi molam leu pacheang naichi ai Esther i leu pei nai kamta, khaw ai nai cha aengra y tajiu pi typ bo.