Read Khumi Chin THEU NAI 1 Bible Online

THEU NAI 1 - Khumi Chin bible

THEU NAI 1

¹Aikupta pri y Jakob hawi vanrei tym nai chapochi i amynchi ly

²Ruben, Simeon, Levi, Juda,

³Isakhar, Zebulun, Benjamin,

⁴Dan, Naphtali, Kad hawi Aser ne i, nichi i yhm dengtheungchi py abawi nai ne.

⁵Jakob i kangpreang ly leaung vui saryhrei awm; Josepha ly Aikupta pri y awm yb veng bo.

⁶Neng tym baly Josepha hawi amjo amnauchi hawi vanrei, huni deung i amjo amnauchi py dei be bo.

⁷Na i py Israela cheng kangpreangchi ly cho chanau neangneang tapen iy, khri pa-rei peung nai deaungkho y, Aikupta pri verei y kawi na bo.

⁸Naibaly Aikupta pri y Josepha ai pany vai y nai samrang kangtha leaungrei samrang lyn bo.

⁹Huni samrang ly mymy i chengchi teng y, “Hini Israela chengchi ly khri pa-rei peung i, atho awm nai ly achi i vui ka-mawn awm nai ne.

¹⁰Nichi ly achi i paleung ka-echi hawi amkawm iy achi ai ang tiu lawh baly, hini pri theung i nai achi theu pawn ai nai tlo lawh na. Nichi ai ana iy patang hai ai nai lam hau u sina,” napi.

¹¹Hunai deaungkho y Aikupta chengchi ly Israela chengchi tlang tleaung y miseaung lu kalenchi khai iy, paleung phra na pa-rei atho no kalopchi sa hai akhikan bo. Hunaibaly samrang Pharao i cha nei vawn kachurachi kachu ai nai Pithom mary hawi Ramese mary sa hai nai ne.

¹²Na i py Aikupta chengchi my Israela chengchi ai ana ra, peung ra i, pri verei y kawi na bo. Aikupta chengchi ly Israela chengchi ai jei u nai ne.

¹³Naibaly Israela chengchi ai miseaung kalop sa hai akhikan iy ana u bi bo.

¹⁴Yhm pui savang pui sa naira y py, li hlau sa naira y py, pahyp y naimy kho-bai na pa-rei sa hai nai ne.

¹⁵Aikupta samrang ly Hebrai neampachychi ai deaungdi syn pi keung Shiphrah hawi Puah teng y,

¹⁶“Nangni ly Hebrai neampachychi chanau tapen nai khala y neampacho ka-so ngierei ai ly padei ryp padei ryp ai nai tla; na i py neampachy ka-so ai ly kang heng khai,” nanai leu pei bo.

¹⁷Na i py Shiphrah hawi Puah ly Tameuh ai jei kaji nai deaungkho y samrang i leu pei nai kamta so hawi vam y i, nini ly neampacho deaungdichi ai padei y bo.

¹⁸Hunai deaungkho y samrang ly deaungdi syn pi keung ni ai palau hai i nini teng y, “Ati mana nai kai i leu pei nai kamta so hawi y lawh? Ati mana nai y neampacho ka-so ngiereichi ai padei hawi y lawh mo?” nanai deng.

¹⁹Huna nai khala Shiphrah hawi Puah nimy, “Hebrai neampachychi ly Aikupta neampachychi atawm y; nichi ly tapen rai y i, kaichi tym y rai khala my tapen pajau veng bo,” nanai pathang.

²⁰Deaungdi syn nai keung nini ly Tameuh ai tahm khai nai deaungkho y Tameuh my nichi ai yhm dengtheung cho chanauchi amtheaung hai. Naibaly Hebrai chengchi py peung ryh peung ryh i, haiho py len ra nai ne.

²²Naibaly samrang my mymy i chengchi teng y kangkhym kangtem leu pei nai ly “Hebrai neampachychi i tapen nai neampacho ka-so ngierei ai ly Naing tavo y aphi u; na i py neampachy ne lawh baly kang heng khai u,” napi.