Read Khumi Chin THEU NAI 11 Bible Online

THEU NAI 11 - Khumi Chin bible

THEU NAI 11

¹Naibaly ARENG ly Mosi teng y, Aikupta samrang hawi ni i chengchi i tlang tleaung y, “Kaimy hini pajeng naira kang tym hai ai. Huna khala naini ni ly nangchi ai chei ai nai ang pei ai. Angchi khyp nangchi bawibawi ai hini pri i nai ang patheu ai.

²Israela cheng bawibawichi ly mymychi i yhm deaungpachi teng y muku, tangka hawi ateaungchi hnei ai nai thui pi,” napi.

³Aikupta chengchi ly Israela chengchi ai tahm khai ai nai ARENG my sa pi. Angchi khyp samrang i bangtangchi hawi khumi mipuichi my Mosi ai ly khumi kalen ne, nanai dawn u nai ne.

⁴Naibaly Mosi ly samrang teng y, “ARENG my thui nai ly ‘Anenghyh khala y Aikupta pri verei y kai amki ai i,

⁵Aikupta pri theung i chapo chalu ngierei ai kapadei ai; samrang i yhmtheaung kamtym chapo chalu dengdairei, choh nip nai miseaung nu chapo chalu py, tawnbawi bawibawichi i cho chalu py padei ai.

⁶Paleung mawn paleung bi nai deaungkho y huni vum y ly pri verei vo u lengleang ai; huna nai kamta ka-jei awm parai nai ly jangni py awm vai y nai, vai mo mang py awm ali bi y ai.

⁷Na i py Israela chengchi teng y ly khumi hawi, tawnbawichi ai ui malawn py nang ai ny y. Hina nai hawimy kai ARENG ly Israela chengchi hawi Aikupta chengchi sala patleh takhra hai nai ly nangchi pany u ai tapi,’ ” napi.

⁸Mosi my, “Nang i bangtangchi ly kai teng y ang jeu u ai i, “Kai i mo y lu meung u ai; naibaly nichi ly nang i chengchi ai theu hai veng jau, nanai ang takeng u ai. Huni bo y kaimy theu hai ai,” nanai thui pi chum baly Mosi ly khri pa-rei kado theu naimy samrang teng i nai leh vui bo.

⁹ARENG my Mosi teng y, “Samrang ly Aikupta pri theung y kaimy rengrang tlai sa pi naichi sa pi tleaung y sa pi ra ai nai deaungkho y, nang i leu py tangai pi ai ny y,” napi.

¹⁰Naibaly Mosi nini Aron my samrang i mo y rengrang naichi sa pi i py, ARENG my samrang i paleung tang hai cheng i Israela chengchi ai, my i pri theung i nai theu ai nai pei y bo.