Read Khumi Chin THEU NAI 13 Bible Online

THEU NAI 13 - Khumi Chin bible

THEU NAI 13

¹ARENG ly Mosi teng y,

²“Chapo chalu ngierei ly kai i vui khai takhra ai nai tla; Israela chengchi i chapo chalu ngierei hawi tawnbawi cho chuluchi ngiereichi py kai i vui ne,” napi.

³Naibaly Mosi my Israela chengchi teng y, “ARENG ly pahen naira len parai nai hawimy, nangchi miseaung achei nai Aikupta pri i dengdairei, nangchi ai pahawi nai kani ai pany u; huni kani y angbo abawi nai tako cha ai nai tlo y.

⁴Nangchi ly Abiba napi nai angchei i lo theung i, hini kani y Aikupta pri i dengdairei theu u nai ne.

⁵ARENG ly Kanan cheng, Hiti cheng, Amori cheng, Hivit cheng hawi Jebusi chengchi awm nai pri nangchi teng y pei ai, nanai nangchi i amsi pajochi hawi leu adeu hai typ bo. Mymy pahawi iy nangchi ly cha nei ai nai takang y iy, paitiu khuta hawi nai pri y tym u nai khala, saneng tleirei angchei i lo tleaung y, hini ly sa u jojo ai nai tla.

⁶Kani saryh tym pa-rei angbo abawi y nai tako cha chum baly, saryh kani y ARENG ai tahm khai nai pawi sa ai nai tla.

⁷Kani saryh ryrei ly angbo abawi nai tako cha ai nai tlo y; nangchi i pri meingtym tleirei y angbo hawi angbo abawi nai tako awm moh sy.

⁸Huni Pawi sa amteaung nai kani y nangchi i chapochi teng y, ‘Aikupta pri i dengdairei achi theu nai khala, ARENG my rengrang tlai sa pi nai sai pany jo nai pawi ne,’ nanai thui pi pachai ai nai tla.

⁹ARENG ly sa thai naira len parai nai hawimy nangchi ai, Aikupta pri i dengdairei patheu nai deaungkho y, nangchi ly ARENG i reita leu pei nai ai thui aninau ai nai pawi ly nangchi i kiu, ti y baly nangchi i lukatira y akawm nai ka-ma-ra sai sairei kamta, nangchi ai pany hai jo ai.

¹⁰Saneng tleirei hini kani tym baly pawi sa u jojo ai nai tla.

¹¹“ARENG ly nangchi hawi nangmychi i amsi pajochi teng y, pei ai nai adeu kheng nai Kanan pri y kang pahawi ai. Huni pri y tym nai khala,

¹²nangchi i tapen nai chapo chalu ngierei ly ARENG teng y talam u ai nai tla. Nangchi i tawnbawi cho chalu katai ngierei py ARENG i vui talam ai nai tla;

¹³na i py keaungngo kano kasau cho chalu katai, beram cho katai hawi angtheung iy atleu ai nai tla. Huna nai sa ai nai ngai y baly keaungngo kano kasau cho kaneaung khei vui ai nai tla. Nangmychi i chapo chaluchi ai py vang hawi atleu teang ai nai tla.

¹⁴Khawnvai kani y nang i chapo my, ‘Ati mana nai y hina nai sa lawh mo?,’ nanai angdeng lawh baly, ‘ARENG ly sa thai naira len parai nai hawimy, achi ai Aikupta pri y miseaung achei naira i nai ang pahawi nai ne.

¹⁵Aikupta samrang ly paleung tang cheng iy achi ai theu ai nai pei y nai khala, ARENG ly Aikupta pri i khumichi hawi tawnbawichi i cho chalu ngierei ai padei pi pawn bo. Huni molam y tawnbawi cho chalu ngierei ai ly ARENG teng y apathyp nai ne; na i py achi chapo chalu ngierei ai ly vang hawi atleu teang nai ne.

¹⁶ARENG ly sa thai naira len parai nai hawimy, achi ai Aikupta pri i dengdairei ang pahawi nai deaungkho y, hini pawi ly nang i kiu y akhen nai, ti y baly lu kati y abyn nai ka-ma-ra kamta ne i, nangchi ai pany hai jo nai ne,’ nanai thui pi ai nai tla,” napi.

¹⁷Aikupta pri i samrang my Israela chengchi ai theu ai nai pei khala, Tameuh ly Philistin pri mang takoleu ai nai nichi ai pahawi y leang; huni lam ly kasa teu i py, Tameuh my, “Philistinchi hawi tavai atiu lawh baly paleung phra u ai i, nichi ly Aikupta pri mang y ali teang ai, nanai pany nai ne.

¹⁸Hunaibaly nichi ai daichi ka-vym lam mang dengdairei, pangli Kamsen ai ka-kawi ka-mi tako hai prei nai ne. Israela chengchi ly tavai atiu ai nai tavai ateaung kangym amthyp u bo.

¹⁹Josepha my Israela chengchi teng y leu taviu kheng nai kamta, Mosi ly Josepha i hiuchi syn nai ne; Josepha my, “Tameuh my nangchi ai atleu nai khala y, kai i hiuchi ai hi i nai syn u ai nai tla,” nanai leu taviu kheng bo.

²⁰Israela chengchi ly Sukkoth mary dengdairei khuleaung amsa u i, daichi ka-vym khujyh i Etham mary y tai u.

²¹Nichi ai pahawi nai thym y, ARENG my kani thun y ly tamai angjawi hawi nichi i mo y lam patei i, vum y ly maiteaung kangvang hawi mo mang y to pi bo. Huna nai kamta vum kani thun nichi ly khuleaung chei thai nai ne.

²²Kani thun y ly kani khengrei tamai angjawi my pahawi i, vum y ly maiteaung my nichi i mo mang lam patei pi jojo nai ne.