Read Khumi Chin THEU NAI 14 Bible Online

THEU NAI 14 - Khumi Chin bible

THEU NAI 14

¹Naibaly ARENG my Mosi teng y,

²“Israela chengchi ly anaw ali teang iy Bala Zephon mary sahawi Pangli Kamsen hawi Mikadol mary sala i, Phihahiro mary ka-do y tai ai nai thui pi.

³Aikupta samrang my, Israela chengchi ly daichi ka-vym lam tamang nai awm u ajangtang ngaw khyh, nanai dawn ai.

⁴Kaimy samrang i paleung tang hai cheng nai deaungkho y, ni ly nangchi ai ang hui ai; naibaly samrang ly kai i eaung naira niu ai i, ni i tavaimichi py kai i nang parai nai saichi niu u ai. Huna nai khala Aikupta chengchi py, kai ly ARENG ne, nanai pany u ai,” napi. Israela chengchi ly ARENG my leu pei nai kamta sa u bo.

⁵Aikupta samrang ly Israela chengchi preang pan nai thai nai khala, ni hawi ni i bangtangchi ly paleung ali vui i, “Achi ly achi i miseaungchi ai tleaung hai vui lawh ly!,” nanai thui u bo.

⁶Naibaly samrang ly mymy i tavai ka-ri hawi tavaimichi ai angvei hai rym bo.

⁷Ni ly tavailuchi my lu sa nai hawi keh nai ka-ri chungvai tariureichi hawi tavaimichi ai leu pei i tavai thau hai bo.

⁸ARENG ly samrang i paleung tang hai iy Israela chengchi ai hui u bo; Israela chengchi ly amo theu sau[3] naimy theu u nai ne.

⁹Aikupta tavaimichi, tavai keaungngochi, tavai ka-richi Israela chengchi ai hui u i, Bala Zephon mary hawi Phihahiro mary sahawi i Pangli Kamsen peang jei naira y nichi ai kai bo.

¹⁰Israela chengchi ly samrang i tavaimichi my hui nai niu u baly, khri pa-rei jei u i, sabawmra nga ai nai ARENG teng y aeu naimy takeng u.

¹¹Nichi ly Mosi teng y, “Aikupta pri y tapreaung meingtym by y nai deaungkho y nang ly kaichi ai hini daichi ka-vym y dei hai ai nai pahawi nai a? Dawn cham, kaichi ai Aikupta pri i pahawi nai ly ati mana sa nai kha!

¹²Hina nai kamta awm lawh na, nanai Aikupta pri i theu y rai khala y, kaichi ly nang ai kang thui pi y nai sai a? Aikupta pri y miseaung achei py khere i khyly hawi alam chybo. Hini daichi ka-vym y dei nai tleaung y ly miseaung achei nai hawi keh alam,” nanai josei u bo.

¹³Huna nai khala Mosi my, “Jeih u moh, Vam parai nai awm u; vaini ARENG my atleu nai nangchi niu u ai; Aikupta chengchi ai vaini nangchi niu nai ly vai mo mang y nangchi niu u ali bi ai ny y leang bo mang.

¹⁴ARENG my ang tiu hai ai i, nangchi paleung bi u moh; nangchi ati sai py sa ai nai ngai y leang,” napi.

¹⁵ARENG my Mosi teng y, “Ati mana nai y nangchi aeu u nai mo? Khumi mipuichi ly mo mang y tako phai tako u sy.

¹⁶Nang ly cheaungvawi syn iy, pangli salo y pheu; Tui ly akhawi thla iy teng teng mang y akalym pawn ai i, Israela chengchi ly pangli paichi khaileaung kaphui mang tako ai nai nga u ai.

¹⁷Kai ly Aikupta chengchi ai paleung tang hai nai deaungkho y, nichi ly Israela chengchi nithun hui u kathiu ai. Kai ly samrang hawi vanrei ni i tavaimichi, keaungngo ka-richi ai eaung nai khala ly kai i nang parai nai saichi niu u ai.

¹⁸Huna nai samrang hawi ni i tavaimichi ai eaung nai deaungkho y, kai ly ARENG ne, nanai Aikupta chengchi pany u ai,” napi.

¹⁹Israela chengchi i mo mang y pahawi nai Tameuh i angel ly nithun mang y asyh vui iy awm pi khyp bo. Nichi i mo mang y awm nai tamai angjawi py nithun mang y asyh vui nai deaungkho y,

²⁰Aikupta tavaimichi hawi Israela tavaimichi sala y awm pi khyp nai ne. Tamai angjawi ly Aikupta chengchi mang y veng hai cheng iy, Israela chengchi mang y angvang hai phang bo. Hunai deaungkho y nichi ly mang mang akai thai y nai ne.

²¹Mosi ly pangli salo y kiu pheu nai khala, ARENG my nisi ali vumtorei aho hai nai deaungkho y, pangli tui ly akhawi thla i akalym pawn iy, tuili paichi ly phui hai rawm veng bo.

²²Naibaly Israela chengchi ly pangli paichi phui rawm nai tui atapang tawp nai sala mang tako u prei bo.

²³Aikupta samrang i tavaimichi, keaungngo ka-richi ly Israela chengchi i nithun y hui u kathiu nai ne.

²⁴Khutawi en khala ARENG ly tamai angjawi hawi maiteaung mang dengdai, Aikupta tavaimichi ai khen kathiu i, nichi ai ahei hai phro bo.

²⁵Mymy ly Aikupta tavaimichi i tavai ka-ri kheuchi phra hai nai deaungkho y, raira avum u bo. Hunaibaly Aikupta chengchi ly “Israela chengchi i jeng y ARENG my achi ai tavai ang tiu nai bo, hi i nai athawn u ali sina bo he!” nanai thui u.

²⁶ARENG my Mosi teng y, “Pangli salo y nang i kiu pheu ly Aikupta tavaimichi, tavai ka-richi hawi ka-ri lu sa naichi salo y pangli tui ly tlenrei khyhmy avum hai tawp teang ai,” napi.

²⁷Hunaibaly Mosi ly pangli salo y kiu pheu i, khawn khutawi nai khala pangli tui ly angchei i kari kamta awm teang. Aikupta chengchi ly tui theung i lawi ai nai atho sa u; na i py ARENG my ly nichi ai tui y anum hai chauchau bo.

²⁸Pangli theung mang Israela chengchi ai hui u nai Aikupta tavai michi, ka-ri lu sa naichi, tavai ka-richi ai py um hai chauchau i, leaungrei py tleaung y dei be nai ne.

²⁹Israela chengchi ly tui akalym nai sala pangli paichi kaphui mang angpeang prei ai nai nga bo.

³⁰Huni kani y ARENG my Israela chengchi ai Aikupta chengchi kiu i lawi hai bo; naibaly Israela chengchi ly pangli peang y Aikupta khumi kadei veuchi ahei tliutla nai niu u.

³¹Naibaly ARENG ly mymy i nang parai nai sa thai naira hawimy Aikupta chengchi ai pasum naichi, Israela chengchi ly niu nai khala y, nichi ly ARENG ai jei kaji naimy tahm khai u; naibaly ARENG ai py, mymy i miseaung Mosi ai py ym u bo.