Read Khumi Chin THEU NAI 15 Bible Online

THEU NAI 15 - Khumi Chin bible

THEU NAI 15

¹Naibaly Mosi hawi Israela chengchi ly ARENG ai palo nai khulym thui u bo; “Kai ly ARENG ai palo ai, ati mana nai mo na baly mymy ly nang parai nai hawimy eaung naira nga hai bo; mymy ly tavaimichi, keaungngo atang nai tavaimichi ai pangli tui y anum hai chauchau nai deaungkho y ne.

²ARENG ly kai i atho hawi ama hai nai keung, mymy leaungrei naini kai ai atleu nai keung ne; kai ly mymy ai palo ai. Mymy ly kai i ampo i Tameuh ne iy, mymy i nang parai nai sai ai kapalo ai.

³ARENG ly tavailu ne; mymy i amyn ly ARENG ne.

⁴“Mymy ly Aikupta tavaimichi hawi tavai ka-richi ai pangli tui y anum hai chauchau bo; ni i hawi keh nai tavailuchi ai ly pangli kamsen y anum hai be bo.

⁵Pangli tui kathiu my nichi ai um be iy, nichi ly lengseaung kamta tuili paichi y tup be nai ne.

⁶“Aw ARENG, nang i lamtang kiu i sa thai naira ly rengrang iy jei hyn ai nai hawi parai; sa thai naira hawimy paleung ka-echi ai pasum be bo.

⁷Nangmy i sa thai naira nang parai naimy ly paleung ka-echi ai sum hai bo; nang i kado theu naira ly mai kamta angveaung iy, chohphi kang nai kamta nichi ai kang hai be bo.

⁸Nang ly pangli tui ai hm nai khala, tui ly saleung asa iy apang kamta tawteng na bo. Pangli paichi py tang nai ne.

⁹Paleung ka-ei my, ‘Kai ly nichi ai kai pa-rei hui iy katiu ai; nichi teng i nga nai yhmtheaung katuichi ly amji iy, kaimy i ngai nai ngierei kala ai; kai i haisau aphiu iy nichi ai katamyh pawn ai,’ nanai thui nai ne.

¹⁰Na i py ARENG nang ly tlenrei khyhmy ali hm nai deaungkho y, Aikupta chengchi ai pangli tui my um biu vui bo; nichi ly tui sampyh kalen theung y kima kamta tup nai ne.

¹¹“Aw ARENG, tameuhchi theung y nang hawi atawm nai ami awm vai mo? Nang kamta chai parai iy lyh ai awm nai ly ami awm mo? Nang kamta rengrang naichi hawi nang parai naichi sa thai nai ami awm mo?

¹²Nang ly lamtang kiu pheu nai deaungkho y, khaileaung my kaichi i paleung ka-echi ai pajawn pawn nai ne.

¹³Nang i leu adeu nai ly ym ai nai hawi; nang ly nangmy i vawi takhra nai khumichi ai pahawi nai ne. Nang i sa thai naira hawi pri kachai mang y nichi ai lam patei bo.

¹⁴Khumi cheng cheaungkhangchi ly huni satang thai i jei hyn u; Philistin chengchi ly kaso theu nai ne.

¹⁵Edom pri lu sa nai keungchi ly khri pa-rei kaso theu u; Moba pri miteaung kehchi ly jei hyn u; Kanan khumichi ly sorai paleung tama u bo.

¹⁶Huni khumi bawibawichi ly jei hyn u nai ne. Aw ARENG, nichi ly nang i sa thai naira niu i, miseaung i nai nangmy alaw hai nai nang i khumichi tako prei nai thym khala, nichi ly jei hyn i khuma phau u na bo.

¹⁷Aw ARENG, nang ly nichi ai pahawi iy nang i awm ai nai vawi takhra nai mawi salo y, meingtym tahyh pi ai; nangmy kypkyp my sa nai Achura yhm y awm hai ai.

¹⁸ARENG nang ly deungtasarei peang jojo ai,” napi

¹⁹Samrang Pharao i keaungngo atang nai risachi hawi keaungngo ka-richi ly pangli theung y satla u nai khala, ARENG my tui um hai ali i, tui ly nichi ai um be bo. Israela chengchi naini khaileaung kaphui mang tako u i, pangli angpeang u prei bo.

²⁰Aron i tuicho amo Miriam ly atym tava iy beu bo; takhra neampachy bawibawichi py atym beu iy lam naimy, ni i nithun abang u nai ne.

²¹Mariam my, “ARENG ai ly palo u, ati mana nai mo nabaly mymy i nang parai nai hawi eaung naira nga hai nai ne; mymy ly tavai keaungngochi hawi keaungngo atang nai risachi ai pangli tui y anum hai chauchau bo,” nanai khulym adi iy thui nai ne.

²²Naibaly Mosi my Israela chengchi ai Pangli Kamsen dengdairei Shura daichi ka-vym y tym hai bo. Nichi ly kani thomrei daichi ka-vym y tako u veangveang i py tui avum y.

²³Naibaly nichi ly Marah napi nai meingtym y tym u, na i py tui ly kho parai nai deaungkho y nei pajau y. Huni ai ly Marah, [4]nanai amyn pathi nai ne.

²⁴Nichimy Mosi ai josei u nai ly “Kaichi ati tui kanei u ai mo?” napi.

²⁵Mosi ly ARENG teng y chiu sa i, ARENG my ni ai dengkeaung beang harei patei i, ni ly tui theung y dengkeaung beang aphi; naibaly tui ly nei ai nai nga bo. ARENG ly huni meingtym y nichi teaung ai nai reitachi pei i, hu y my nichi leu tangai mo, tangai y mo, nanai cham bo.

²⁶Nangchi ly “Kai i leu tangai iy, kai i leu pei naichi takhawi y pa-rei patawm u baly, Aikupta chengchi teng y katym hai nai no michi nangchi teng y kang tym hai y leang mang. Kai ly nangchi ai no-na hawi sa pi nai ARENG ne,” napi.

²⁷Hu i dengdairei Elim napi nai meingtym y tym u. Hu y ly tui sampum holai nyhrei hawi chamleaung keung vui saryhrei py awm i, tui sampum ahawi y meingtym sa u bo.