Read Khumi Chin THEU NAI 16 Bible Online

THEU NAI 16 - Khumi Chin bible

THEU NAI 16

¹Israela chang bawibawichi ly Elim dengdairei tako u bi i, Aikupta pri i theu nai bo y lo nyhrei kani holai pangrei khala Sinai mawi hawi Elim sala i Sin daichi ka-vym y tym u bo.

²Huni daichi ka-vym y, nichi ly Mosi nini Aron teng y,

³“ARENG ly kaichi ai Aikupta pri y dei hai khyly hawi keh alam ai; kaichi ly huni pri y mawi hawi tako kajeu kawi pa-rei cha ai nai nga; vai ly kaichi ai kajeu ka-lam y dei hai ai nai, hini daichi ka-vym y ang pahawi nai na a hi ly” nanai josei u lengleang bo.

⁴Huna nai khala ARENG my Mosi teng y, “Vai kai ly nangchi bawibawi i vui kani mang dengdairei tako pala pi ai. Nichi ly kani tleirei theu iy kanirei ka-cho pakym u ai nai tla; hunai kamta kai i leu pei naichi tangai mo, tangai y mo, kapany ai.

⁵Tariu kani y ly kani tleirei pakym nai kamta ny y naimy, kani nyhrei i ka-cho pakym u ai nai tla,” napi.

⁶Naibaly Mosi nini Aron my Israela cheng bawibawichi teng y, “Vaidym ly nangchi ai Aikupta pri i theu hai nai keung ARENG ne, nanai pany u ai.

⁷Khawn khutawi baly ARENG i nang parai nai sangso kangvang ly angvang teaung nai nangchi niu u ai. Mymy ly nangchi i josei nai thai bo, achi ly mymy i leu pei naichi naini sa ai nai tla khyh,” napi.

⁸Mosi my thui pi bi nai ly “ARENG ly nangchi i josei nai raawi thai nai deaungkho y, nangchi dym mang cha ai nai mawi hawi khawn mang cha ai nai ngai nai ryrei tako ang pei ai. Nangchi ly kaini ai josei u nai ly ARENG ai josei tatang nai ne,” napi.

⁹Mosi my Aron teng y, “Khumi mipuichi ly ARENG i mo y jeu u ai nai leu pei; ati mana nai mo na baly mymy ly nichi i josei naichi thai bo,” napi.

¹⁰Naibaly Aron ly mipui bawibawichi teng y Mosi my leu taviu nai kamta thui pi nai thym y, nichi ly daichi ka-vym mang y khen tapai nai i, tlenrei khyhmy tamai dengdairei ARENG i kangvang sangso ly alaukau nanai niu u bo.

¹¹ARENG my Mosi teng y,

¹²“Kai ly Israela chengchi i josei nai kathai bo. Nichi ly dym mang y mawi cha u ai; khawndam mang y ly nichi i ngai nai ryrei tako cha ai nai nga u ai; huna nai khala Kai, ARENG ly nichi i Tameuh ne, nanai pany u ai tapi,” napi.

¹³Huni kani dym y thengmyn kanghu akheang hai i, tai nai meingtym verei y kawi hai mang bo; khawn mang y ly tai ka-ki kadam tla hai.

¹⁴Kadam aheang nai khala y daichi verei, khaileaung y angporyp nai phichychi awm ma mang bo; huni phichychi ly kadam tanrei naudyp tlai nai ne.

¹⁵Israela chengchi ly huni ai niu nai khala, nichi ly pany vai y, niu py niu vai y i, “Hini ly ati kha?” nanai adeng u leungtang. Naibaly Mosi my nichi teng y, “Hini ly nangchi cha ai nai ARENG my pei nai tako ne.

¹⁶ARENG my khumi leaung leaungrei ly amy i dengtheung kanirei cha ai nai ka-leu khyp sie nyhrei akhui khyh sy, ang napi,” napi.

¹⁷Israela chengchi ly leu pei nai kamta pakym u i, phyrei ly nawi pakym, phyrei ly maidenrei pakym u khyh.

¹⁸Nichi neh cham nai khala, nawi pakym naichi py nawime y, di pakym naichi py dime y; khumi luteng ngai nai ryrei nga u bawibawi nai ne.

¹⁹Mosi my nichi teng y, “Ami py ne sy, khawndam i vui pakhaw mai moh sy,” napi.

²⁰Na i py phyrei khumichi ly leu tangai y, pasyh u lawh; khawn mang y ly huni takochi ly ui i mui eung na; naibaly Mosi ly khri pa-rei kado theu bo.

²¹Khawn tleirei leaung leaungrei ka-leu pakym u i, kani bi ango nai khala khaileaung y awm nai takochi ly tlawn pan veng nai ne.

²²Tariu kani y ly leaungrei y kani nyhrei ka-cho sie palyhrei pakym u bo. Mipuichi ai lu sa nai keungchi ly Mosi teng y huni satang amti pi nai khala,

²³Mosi ly nichi teng y, “ARENG my leu pei nai ly vaini ly nangchi i ngai nai kamta tako paawp py paawp pajau, byh py byh pajau, kamlaichi ly khawn mang i vui khai u; khawndam ly ARENG teng y aau patyp ai nai anawn nai kani kachai ne,” napi.

²⁴Nichi ly Mosi i leu pei nai kamta khawn mang i kavui kamlai khai u i, takochi ly phra py phra y, ui py ui y nai ne.

²⁵Mosi my ly “Vaini ly nangchi kalop anawn nai kani, ARENG i vui khai takhra nai Anawn Kani ne i, jangdyh i teicha kamlai cho u; tai angam mang y ly teicha teinei avum ai ny y.

²⁶Nangchi ly kani tariurei sala y kani tleirei tako pakym u ai nai tla; na i py Saryh kani ly Anawn kani ne i, huni kani y ly ati sai py nga ai ny y,” napi.

²⁷Saryh kani y phyrei khumichi ly tako pakym ai nai theu u, na i py ati sai py niu u y bo.

²⁸Huna nai khala ARENG my Mosi teng y, “Nang i khumichi ly kai i leu tangai y ai nai mana tanrei awm u jo rai na mo?

²⁹Kai ARENG ly nangchi ai anawn ai nai kani kang pei bo; Huna nai y tariu kani y ly tako kani nyhrei ka-cho nangchi ai kang pei ai. Saryh kani y ly khumi luteng amy i awm naira y awm ai nai tla; ami py yhm angam mang y theu ai nai tlo y,” napi.

³⁰Hunaibaly khumichi ly saryh kani y kalop so y i, anawn u nai ne.

³¹Israela chengchi my huni teicha teinei ai, “Manna tako,” [5]nanai palau u bo; huni tako ly maheu hm ka-tawm abawi nai tako ne. Huni ly kaleung iy khawi hang katlen nai tako kamta cha nai hawi parai.

³²Mosi my, “ARENG ly achi ai Aikupta pri i dengdairei pahawi iy, daichi ka-vymra y achi ai pacho nai manna tako ai, achi i deung kangthauchi my niu ai nai manna tako maidenrei reume ai nai tla, nanai ARENG my leu pei nai ne,” napi.

³³Mosi ly Aron teng y, “Laawm harei lo ly Manna tako sie nyhrei khai, achi i deung kangthauchi i vui reume ai nai ARENG i mo y khai ai nai tla,” napi.

³⁴ARENG my Mosi teng y leu pei nai kamta, Aron ly manna tako khai nai laawm ai ly ARENG i Leu Maikawm Pawm mo y khai bo.

³⁵Israela chengchi ly nichi khuteng sa u ai nai Kanan pri y tym nai ryrei, manna tako ai saneng vui palyhrei cha u nai ne.

³⁶(Huni neng khala teaung nai sie 20 rei nai ly avang teaung hawi ahyh nai ne.)