Read Khumi Chin THEU NAI 17 Bible Online

THEU NAI 17 - Khumi Chin bible

THEU NAI 17

¹Israela cheng bawibawichi ly ARENG i leu pei nai kamta, Sin daichi ka-vym i dengdairei meingtym takhra mang y asyh bi, asyh u bi nai ne; naibaly nichi Rephidim y tym i, hu y tai u bo; na i py huni meingtym y ly tui by y.

²Huna nai khala nichi ly Mosi teng y, “Kaichi ai tui nei ai nai pei,” nanai josei u bo. Mosi my, “Ati mana nai josei u lawh mo? Ati mana nai ARENG ai cham u lawh mo?” napi.

³Na i py khumi mipuichi ly khri pa-rei tui ahai nai deaungkho y, Mosi ai josei u veangveang i ni teng y, “Ati mana nai kaichi ai Aikupta pri i nai theu hai mo? Kaichi hawi kaichi i cho chanauchi hawi tawnbawichi raurei tui kanghai y padei ai tau nai a?” napi u.

⁴Mosi ly ARENG teng y chiu sa praw i, “Hini khumichi i vui kai mana kasa pi pajau ai mo? Nichi ly kai ai lengseaung hawi aphi ka ai nai tau u dudu bo,” napi.

⁵ARENG my Mosi teng y, “Nang hawi Israela chengchi theung i lu sa nai phyreichi ai nang teng palau ly khumi mipuichi ai pahawi iy mo mang y tako u man; Naing tavo tui y pakhau nai cheaungvawi py syn.

⁶Kai ly Sinai mawi i lengseaung saleung nang i mo y angdo ai. Nang ly lengseaung y pakhau; huni lengseaung mang khumichi nei ai nai tui theu ai,” napi. Naibaly Mosi ly Israela chengchi i luchi mo y leu pei nai kamta huni lengseaung y pakhau bo.

⁷Israela chengchi my, “ARENG ly achi hawi vanrei awm a?” nanai deng naimy Mosi ai josei iy ARENG ai cham u nai deaungkho y, huni meingtym ai,” Massah” nanai py, “Meriba” [6]nanai py pathi u nai ne.

⁸Amalek chengchi ly Rephidim meingtym y chei iy Israela chengchi ai tiu u nai ne.

⁹Mosi my Josua teng y, “Nang ly khawndam Amalek chengchi ai tavai tiu ai nai khumi phyreichi ai vawi takhra; kai ly Tameuh my syn hai nai cheaungvawi hawi mawi saleung y angdo ai,” napi.

¹⁰Josua ly Mosi my leu pei nai kamta sa i, Amalek chengchi ai tavai tiu ai nai amsa bo. Hunai thym khala Mosi, Aron hawi Hurachi ly mawi saleung y lyn u kalau.

¹¹Mosi i kiuban pheu nai khala Israela chengchi my pajau; na i py ni i kiuban pala vui baly, Amalek chengchi my pajau nai ne.

¹²Mosi ly kiuban khohai nai deaungkho y Aron nini Hura my lengseaung pali pi i, Mosi ai ateh hai; nini ly Mosi i kiuban y kani dym pa-rei dawmkhawn pi bo.

¹³Hunai kamta sa nai deaungkho y Josua ly Amalek chengchi tavai sum pa-rei tiu pajau nai ne.

¹⁴Naibaly ARENG my Mosi teng y, “Hini eaung nai ly pany jo ai nai tajiu typ; kaimy Amalek chengchi ai tavai kasum hai ai nai Josua teng y thui pi,” napi.

¹⁵Mosi ly maicham sa i, “ARENG ly kai i tamkhawn ne,” nanai amyn pathi bo.

¹⁶Naibaly Mosi ly “ARENG i tamkhawn theaung u! ARENG ly Amalek chengchi ai tavai tiu jojo ai!” nanai aeu bo.