Read Khumi Chin THEU NAI 18 Bible Online

THEU NAI 18 - Khumi Chin bible

THEU NAI 18

¹Midian pri i pathyp pi nai keung, Mosi i ampu Jethro ly Israela chengchi ai Aikupta pri i dengdairei nichi ai pahawi nai khala, Mosi hawi Israela chengchi tlang tleaung y ARENG my ati mana kry mo, nanai thai nai ne.

²Hunaibaly ni ly Mosi my daw jo nai aju Zipporah,

³chapo Kerashom hawi Elazachi ai py hawi teang. (Mosi my, “Kai ly pri takhrachi theung y angvyn ne,” nanai thui i, chapo leaungrei ai Kerahsom, [7]nanai amyn pathi.

⁴Naibaly, “Kai i ampo i Tameuh my Aikupta samrang kiu y dei ai naira i nai sabawm iy kai ai atleu bo,” nanai thui i, pa-nyh chapo ai Elaza [8]nanai pathi bo.)

⁵Jethro ly Mosi i aju hawi chapo leaung nyhrei ai daichi ka-vym ARENG i mawi kachaira tai nai Mosi teng y hawi bo.

⁶Jethro ly nichi tym ai nai satang Mosi teng y thai hai.

⁷Hunaibaly Mosi ly ni hawi avum ai nai chei i, ampu i mo y lu meung iy pachawm nai ne. Mychi tengtawi akawn u chum baly Mosi i tai theung y kun u bo,

⁸Mosi my ampu Jethro teng y, ARENG ly Israela chengchi ai atleu pi ai nai molam, Aikupta samrang hawi Aikupta chengchi tlang tleaung y atiti tym hai nai leaungsai bawibawichi amti pi nai ne. Huni bo y Israela chengchi lam sala y avum nai rai nairachi hawi vanrei, ARENG ly Israela chengchi ai atleu pi nai satang py amti pi bo.

⁹Jethro ly Israela chengchi ai Aikupta chengchi kiu i nai ARENG my atleu pi nai satang thai baly khri pa-rei amo theu nai ne.

¹⁰Jethro my, “Aikupta cheng hawi Aikupta samrang kiu i nai nangchi ai atleu nai keung ARENG ai ly palo u! Mymy i khumichi ai miseaung i nai atleu nai keung ARENG ai ly palo u!

¹¹ARENG ly Aikupta chengchi my Israela chengchi tlang tleaung y mei aniu y nai saichi sa nai molam y, ARENG ly tameuhchi bawibawi tleaung y sa thai naira len, nanai vai kai pany bo,” napi.

¹²Naibaly Tameuh teng y talam ai nai, Jethro ly bom leng patlum nai apathypra hawi takhra apathyprachi py syn; naibaly Aron hawi, Israela miteaung keh bawibawichi ly Jethro hawi vanrei, ARENG i mo y cha nei ai nai chei u bo.

¹³Pa-nyh kani y Mosi ly khumi mipuichi ai khawn mang dengdairei dym mang khrairei tara chih bo.

¹⁴Khumi luteng i vui Mosi i sa nai ngierei ampu Jethro my niu nai khala Mosi teng y, “Nang ly hini khumichi i vui ati alychi sa pi nai mo? Ati mana nai y nangmy tlairei sa khyh nai mo? Khumi bawibawichi ly nang teng y kani khengrei angdo naimy ajeng u na bo,” napi.

¹⁵Mosi my, “Nichi ly Tameuh i kangai pany ai nai ngai nai y kai teng y jeu u nai ne.

¹⁶Khumi leaung nyhrei a-ei hawi lawh baly, kai i pacheang pi nai leu tangai ai nai ang jeu u nai ne. Kai ly nichi ai Tameuh i leu pei naichi hawi, reitachi sa patawm ai nai thui pi nai ne,” nanai pathang.

¹⁷Huna nai khala Jethro my Mosi teng y, “Huna nai kamta nang i sa nai ly avo y leang!

¹⁸Nang hawi nang i khumichi ly paleung bi naira avum u ai; huni kalop ly nang my leaungrei sa bawi pajau nai kalop ny y.

¹⁹Kai ly nang ai tau kahawi kang pei ai; Tameuh ly nang hawi vanrei awm hai sy. Nang i kalop ly khumichi i ka-jo ka-thui kahmchi ai, nichi i jeng y Tameuh teng y tym hai nai ly hawi keh.

²⁰Nang ly nichi teng y Tameuh i leu pei nai hawi reitachi patiu pi iy nichi ati mana sa naimy heng u ai mo, nanai thui pi pachai ai nai tla.

²¹Huni bo y nang ly khumi leaung sangrei kamkawm, leaung chungvairei kamkawm, leaung vui pangrei kamkawm, leaung horei kamkawmchi ai lu sa pajau nai khumichi ai vawi takhra; huni khumichi ly Tameuh ai jei kaji iy, ka-ym awm nai, un cho y naichi lawm ai nai tla.

²²Nichi ly tara chih nai keungchi lawm iy mipuichi ai tara chih u sy; Khri pa-rei len nai tara leuchi na baly nang teng y tym hai sy; na i py tara leu katheangchi ne baly nichi my ka-vo dawn iy tara khawi ryp sy; huna nai kamta kalop paji baly nang i vui kalop ache kyh ai.

²³Tameuh my leu pei nai kamta nang sa baly nang i vui takeaung y ai; naibaly mipuichi py nichi i tara leu aki chum baly yhm y vawi u praw ai nai nga u ai,” nanai tau pei pi bo.

²⁴Mosi ly ampu Jethro i tau pachei nai kamta sa nai ne.

²⁵Israela chengchi theung i lu sa pajau naichi ai vawi takhra iy, khumi leaung sangrei kamkawm, leaung chungvairei kamkawm, leaung vui pangrei kamkawm, leaung horei kamkawmchira y lu sa ai nai khai bo.

²⁶Hunichi my ly khumichi ai tara chih pi ai nai tara chih nai keung tatangchi lawm u bo. Nichi ly tara leu kalenchi ai Mosi teng y tym hai iy, tara leu katheangchi ai ly mymychi naimy chih u nai ne.

²⁷Naibaly Mosi my leu kahawi pavum i, Jethro ly mymy i yhm y vawi jo bo.