Read Khumi Chin THEU NAI 2 Bible Online

THEU NAI 2 - Khumi Chin bible

THEU NAI 2

¹Huni neng khala y Levi theaung theung i khumi leaungrei ly mychi cheng theaung i neampachy leaungrei hawi yhmtheaung sa i,

²chapo leaungrei tapen nai ne. Huni deaungdi ly khri pa-rei mo cha hawi parai nai deaungkho y amhm my lo thomrei heu bo.

³Na i py heu pajau mailai y nai deaungkho y japang eu mui hawi kachui akeaung i tui kun y pa-rei dengkeaung katli pajui, khym sa iy deaungdi cho ai ly paseaung naimy tavo peang samji theung y heu bo.

⁴Naibaly mymy i tuicho ly ka-deng mang angdo iy ati so hai na mo, nanai khen patawm nai ne.

⁵Samrang i chaniu ly miseaung anglochi hawi tui ahiu ai nai tuivum y satla i, miseaung nuchi ly tavo peang y aleaung u. Samrang i chaniu ly samji kabeng theung y kachui niu i anglo leaungrei ai la hai.

⁶Samrang i chaniu ly paeaung iy khen nai khala, deaungdi cho ai vo naimy niu. Naibaly khri pa-rei pahen i, “Hini ly Hebrai deaungdi ngaw khyh bo,” napi.

⁷Huna nai khala deaungdi i tuicho ly samrang chaniu teng y chei i, “Hini deaungdi ai kry ai nai Hebrai neampachy leaungrei palau pi ai ngai a?” nanai deng.

⁸Naibaly nimy ly “Chei ly palau pi,” napi. Naibaly chei i amhm kypkyp ai palau pi.

⁹Amhm tym bo na baly samrang i chaniu my, “Nang ly hini deaungdi ai lo ly kry ba, vang kang pei ai mang,” napi. Naibaly amhm my deaungdi ai yhm y la iy kry bo.

¹⁰Naibaly deaungdi tleaungri cheang nai khala y samrang i chaniu teng y chei hai i, chapo kypkyp kamta palawn iy pacho bo, amyn ly “Mosi” nanai pathi; huni ly “Kai ly deaungdi ai tui theung i kanga nai,” nanai sai ne.

¹¹Naibaly neng kra kyh nai bo y Mosi ly tleaungri acheang i, mymy i amjo amnau Hebrai chengchi teng y de ai nai chei bo. Hebrai chengchi ai ana nai, patang hai nai, miseaung kalop sa hai nai hawi, Aikupta khumi leaungrei my mymy i khumi Hebrai cheng leaungrei ai pakhau nai niu.

¹²Mosi ly khen amki prei i, khumi ka-vym y Aikupta khumi ai ly pakhau ka; veu ai ly speung han iy up vui bo.

¹³Kani pa-nyh y py kalop sa naira y amki bi i, Hebrai cheng leaung nyhrei myni tengtawi ani nai niu. Naibaly Mosi my ka-jo ngai nai khumi teng y, “Nangni ly Hebrai cheng tengtawi ny y a? Ati mana nai ani hawi lawh mo? nanai deng.

¹⁴Ka-jo ngai nai khumi my ly “Nang ai ly kaini i tlang tleaung y tara chih ai nai ami my ang khai mo? Jangdyh Aikupta khumi ai padei nai kamta kai ai padei ai tau nai sai a?” napi lawh. Naibaly Mosi ly “Kai i sa nai kalop ly amichi my pany pawn bo ngaw khyh,” nanai thui i kaso theu nai ne.

¹⁵Samrang Pharao ly huni satangchi thai i, Mosi ai padei ai nai hau, na i py Mosi ly Midian pri y preang vui bo. Kanirei nai khala y Mosi ly tuikan ahawi y ateh i, Midian pri y awm nai pathyp pi nai keung Jethro i chaniu leaung saryhreichi ly ampo i beram hawi mi-ichi tui panei ai nai molam tui deu ai nai tym u.

¹⁷Na i py beram typ nai phyrei neampachochi ly Jethro i chaniuchi ai paryh pawn nai ne. Huna nai khala Mosi ly huni neampachychi ai sabawm nai tawnbawichi ai tui panei pi.

¹⁸Huni neampachychi ly ampo Jethro teng y tym u nai khala ampo my, “Ati mana nai vaini ly vawi u kasada na mo?” nanai deng.

¹⁹Nichi my, “Aikupta khumi leaungrei my kaichi ai ama hai i, kaichi i tawnbawichi ai tui panei ai nai py nimy tui ang deu pi,” nanai pathang u bo.

²⁰Ampo my, “Huni khumi ly vai ma mang y mo? Mymy ai ly ati mana nai khai u su lawh mo? Chei! Palau u, achi hawi vanrei biu cho na sy,” napi

²¹Hunaibaly Mosi ly hu y awm ryp ai nai dawn i, Jethro ly my i chaniu Zipporah hawi apom hai,

²²chapo tapen pi i, amyn Kershom,” nanai pathi bo; huni ly “Kai ly cheng takhrachi theung y angvyn ne,” nanai sai ne.

²³Saneng kra parai nai bo y Aikupta samrang ly dei bo. Na i py Israela chengchi ly khri pa-rei patang parai naimy miseaung alaw u y jojo rai i, alawra nga ai nai vo tangam u. Nichi i vo nai raawi ly Tameuh teng y tym nai ne.

²⁴Tameuh my Abraham, Isaka, Jakob hawi Leu Maikawm sa nai ly pany pi bo.

²⁵Naibaly mymy i khumi Israela chengchi ly miseaung achei nai, patang nai, niu i adawn pi nai ne.