Read Khumi Chin THEU NAI 21 Bible Online

THEU NAI 21 - Khumi Chin bible

THEU NAI 21

¹“Israela chengchi i vui anui mang i reitachi pei pi bo;

²nang ly Hebrai cheng miseaung leaungrei ai van lawh baly ni ly nang teng y saneng tariurei miseaung achei sy. Saryh saneng y ni ly vang pei y naimy miseaung alaw ai nai tla.

³Khumi ami py miseaung achei nai thym y yhmtheaung sa baly, miseaung alawi nai khala, huni aju ai hawi ai nai ngo y. Na i py ni ly yhmtheaung sa nai bo y miseaung lawm nai ne baly, ni lawi nai khala ni i aju py lawi ai nai tla.

⁴Yhm keung my ni ai aju la hai iy cho chanau sa lawh baly, huni neampachy hawi cho chanauchi ai ly yhmkeung my peang nai ne. Hunaibaly ni leaungrei naini lawi ai nai tla.

⁵Na i py huni miseaung ly yhmkeung ai py, aju ai py, cho chanauchi ai py tamen iy miseaung alawi ai nai ngai y lawh baly,

⁶huni miseaung ai ly ni i yhmkeung my Tameuh ai chiu nai meingtym y hawi ai nai tla. Huni miseaung ai katheu, ti y baly katheu laibeaung y angdo hai iy, ni i kano kho pheu ai nai tla. Naibaly ni ly yhmkeung teng y mymy deungrei miseaung achei ai nai tla.

⁷Khumi ami py amy i chaniu ai miseaung y jo lawh baly, huni miseaung neampachy ly miseaung neampacho kamta, miseaung alaw ai nai ngo y.

⁸Yhmkeung my khrei y nai deaungkho y aju palawn ai nai ngai y lawh baly, ni i ampo ai atleu hai teang ai nai tla. Yhmkeung my kry y nai deaungkho y huni miseaung nu ai takhra neampachochi teng y jo vui pajau y.

⁹Khumi leaungrei ly mymy i van nai miseaung neampachy ai, my i chapo hawi apom hai lawh baly, huni neampachy ai chaniu kamta palawn ai nai tla.

¹⁰Khumi leaungrei ly aju kangtha la lawh teu i py, aju kangngym ai ly angchei i kamta teicha teinei hawi ateaung alangchi dawn hai pi jojo ai nai tla.

¹¹Huna nai kamta dawn hai pi y lawh baly, miseaung vang hnei teang y naimy huni neampachy ai palawi pi ai nai tla.

¹²“Ami py ne sy, khumi leaungrei ai padei ka lawh baly, huni khumi ai ly padei teang ai nai tla.

¹³Na i py padei ai nai dawn yb y naimy dei hai vui lawh baly, padei nai keung ly kaimy khai pi yb nai meingtym y aheu pajau nai ne.

¹⁴Na i py kado katheu y padei ai nai ym iy khumi ai padei nai keung ly kai i maichamra y abyh lawh teu i py, ni ai ryh vui iy padei ai nai tla.

¹⁵“Khumi ami py ne sy, my i amhm, ampo ai khyh pakhau nai khumi ai ly padei takengkei ai nai tla.

¹⁶“Khumi ami py ne sy, khumi leaungrei ai jo vui ai nai py ne sy, mymy teng y miseaung palawn ai nai py ne sy, atho y patiu nai khumi ai ly padei takengkei ai nai tla.

¹⁷“Khumi ami py ne sy, amhm ampo ai pasawi lawh baly ni ai ly padei takengkei ai nai tla.

¹⁸“Khumi tengtawi ajo ani iy leaungrei my takhra leaungrei ai lengseaung hawi mo, kiu kheu hawi mo, no pei i py, dei y lawh baly, no nga nai khumi ly ira tleaung y jawn jo na i py, ami py ne sy,

¹⁹cheaungvawi atawi iy tako cheaung-ang pajau lawh teu i py, no pei nai khumi ai pajeng ai nai tlo y. No nga nai khumi kalop phra nai molam y, no pei nai khumi my peh iy no hawi nai pa-rei khen kry ai nai tla.

²⁰“Yhmkeung ly miseaung neampacho ai mo, miseaung neampachy ai mo, thengbeang hawi pakhau nai deaungkho y huni miseaung dei lawh baly, huni yhmkeung ai ly pajeng ai nai tla.

²¹Na i py huni miseaung ly kanirei, kani nyhrei no khyh iy dei y lawh baly, huni yhmkeung ly miseaung ai peang nai keung ne nai deaungkho y pajeng ai nai tlo y.

²²“Khumi phyreichi ajo ani nai khala y, neampachy jeubom ai chawm lawh iy deaungdi pahaw vui i py, tamo ngo hai y lawh baly, tara chih nai khala y juvo i hnei nai ryrei peh takengkei ai nai tla.

²³Na i py huni neampachy ai no nga hai nai ne baly, hengra i vui hengra,

²⁴mei i vui mei, ho i vui ho, kiu i vui kiu, kheu i vui kheu,

²⁵mai kang hai baly mai kang hai, tamo nga hai baly tamo ngo hai, bawp hai baly bawp hai teang nai pajengra tym hai ai nai tla.

²⁶“Yhmkeung my miseaung neampacho, ti y baly neampachy ai mei y pakhau nai deaungkho y, mei phra lawh baly, mei i vui peh nai kamta huni miseaung ly miseaung i nai alaw sy.

²⁷Yhmkeung my miseaung ai pakhau iy miseaung i ho tleu lawh baly, ho i vui vang pei nai kamta, huni miseaung ly miseaung i nai alaw sy.

²⁸“Si katai my deng nai khumi leaungrei dei lawh baly, huni si ai lengseaung hawi aphi ka ai nai tla; huni mawi ly cho ngau y; na i py si yhmkeung ai ly pajeng moh.

²⁹Na i py si katai ly khumi ai deng reng nai yhmkeung ly pany, pany py pany hai iy, hai theung y hawihai kry y nai y deng i, khumi dei lawh baly, huni si ai ly lengseaung hawi aphi ka ai nai tla; si yhmkeung ai py padei ai nai tla.

³⁰Na i py si yhmkeung ai ly mymy i tlang areu y ai nai peh vui ai nai nga lawh baly, hnei nai ryrei peh ai nai tla.

³¹Si katai my deaungdi neampacho, ti y baly neampachy ai deng ka lawh baly, hini khai pi yb nai reita kamta sa ai nai tla.

³²Si katai ly miseaung neampacho, ti y baly neampachy ai deng ka lawh baly, huni si yhmkeung ly miseaung i yhmkeung ai tangka chang phairei peh ai nai tla; si katai ai ly lengseaung hawi aphi ka ai nai tla.

³³“Khumi ami mo ly angawm tai iy taphum y naimy khai su nai deaungkho y, angawm y si katai, ti y baly keaungngo kano kasau tla lawh baly,

³⁴“ni ly yhmkeung teng y huni tawnbawi dei nai i vui tangka hawi peh iy, huni tawnbawi veu ai ly peang ryp sy.

³⁵Khumi leaungrei i si my takhra khumi leaungrei i si ai deng ka lawh baly, heng nai si katai ai nini ly jo iy vang amji hawi ai nai tla; si kadei mawi py amji hawi ai nai tla.

³⁶Na i py si yhmkeung ly my i si ly deng reng nai pany teu i py hai theung y hawihai pakheng y nai deaungkho y, si dei nai yhmkeung ai si katai kangtheung peh teang iy, si kadei veu ai py peang ryp sy.