Read Khumi Chin THEU NAI 22 Bible Online

THEU NAI 22 - Khumi Chin bible

THEU NAI 22

¹“Khumi leaungrei ly si mo, beram mo, paviu iy padei nai mo py ne sy, jo vui nai mo py ne sy, si harei jeng y si pangrei, beram harei jeng y beram palyhrei, peh ai nai tla.

²Ni ly paviu nai deaungkho y peh ai tla nai ne. Ni ly peh pajau y lawh baly amymy ai ajo iy peh ai nai tla. Paviu nai si, beram, keaungngo kano kasauchi ni teng y kangheng avum lawh baly, ni ly nucho peh ai nai tla. “Kangviu leaungrei ly vum y yhm ateng vau iy paviu nai thym khala, kangviu ai padei nai khumi ly kamngo tlo y leang. Na i py kani thun y paviu nai molam y kangviu ai padei lawh baly, padei nai keung ly kamngo tla.

⁵“Khumi leaungrei ly tawnbawichi ai li y, ti y baly kreip akho theung y teicha patlai iy, ami i li theung y teicha cha hai lawh baly, mymy i li, ti y baly kreip akho theung i hawi keh nai amti amjang hawi jeng peh teang ai nai tla.

⁶“Khumi leaungrei ly my i li mo, hlau mo, mai leng nai khala, kamru mai my ami i li, hlaura i chohlengchi, choh keungchi kang lawh baly, mai leng nai keung ly phra hai nai deaungkho y peh ai nai tla.

⁷“Khumi leaungrei my takhra khumi leaungrei teng y tangka, ti y baly vang kateng vawnsaichi au nai khala, kangviu my paviu veng iy, huni kangviu ai avum lawh baly, paviu nai keung ly nucho peh ai nai tla.

⁸Na i py kangviu ai avum y lawh baly, vawn kry nai keung ai Tameuh ai chiu nai meingtym y pahawi iy, khumi takhra i yhmtheaung paviu y, nanai vaineng abeu hai ai nai tla.

⁹“Si, beram, keaungngo kano kasau hawi ateaungchi tama nai molam y, khumi leaung nyhrei a-ei hawi lawh baly, nini leaung nyhrei ai Tameuh i mo y chih nai khala, paviu nai khumi ly nucho peh ai nai tla.

¹⁰“Khumi leaungrei my keaungngo kano kasau, si, beram hawi takhra tawnbawichi kry pi ai nai au nai khala, huni tawnbawi ly dei nai, ti y baly no nga nai, ti y baly paviu vui nai awm iy huni molam y pany nai keungchi py by y baly,

¹¹Tameuh ai chiu nai meingtym y chei iy tawnbawichi um paviu y, nanai tawnbawi kry nai keung ly vaineng abeu ai nai tla; huna nai sa baly tawnbawi yhmkeung ly sum ai nai tla, peh ai nai tlo y.

¹²Na i py tawnbawi ai paviu nai keung ne lawh baly, paviu nai khumi ly tawnbawi keung ai peh teang sy.

¹³Kasui takai my kei nai ne baly, pany ai nai kadei veu patei pajau ai nai tla. Mawi kasi my kei nai ne baly peh ai nai tlo y.

¹⁴“Khumi leaungrei ly takhra khumi leaungrei teng i tawnbawi alai iy, yhmkeung nengniu y huni tawnbawi ly no nga, ti y baly dei vui ai na baly, alai nai keung ly peh teang ai nai tla.

¹⁵Na i py yhmkeung mei ka-niu y tamo nga nai dei lawh baly, alai nai keung ly peh ai nai tlo y; huni tawnbawi ai vang hawi alai nai ne lawh baly, alai nai vang naini pei ai nai tla.

¹⁶“Khumi leaungrei ly anglo leaungrei ai pom ai nai, amhm ampo teng y deng y naimy preang hai vui lawh baly, tamo muvang pei iy huni anglo ai pom ai nai tla.

¹⁷Na i py huni anglo i ampo my, huni neampacho hawi apom hai ai nai ngai hai y lawh baly, pajanglai tangka hawi ampo teng y peh pi ai nai tla.

¹⁸“Uimiu khawn nai neampachy ai ly padei takengkei ai tla.

¹⁹“Tawnbawi ai pajang nai khumi ai ly padei ai nai tla.

²⁰“Kai, ARENG ai ny y naimy tameuh takhra teng y apathyp lawh baly, huni khumi ai ly padei ai tla.

²¹“Cheng takhra ai ana ai nai tlo y; ati mana nai mo na baly nangchi py Aikupta pri y cheng takhra kamta awm reng nai deaungkho y ne.

²²Neampachy lumai hawi nurochi ai ana ai nai tlo y.

²³Nangchi ly huni khumichi ai ana nai deaungkho y, nichimy kai teng y kasabawmra hnei lawh baly, Kai ARENG my pathang pi ai.

²⁴Kai ly kado theu nai deaungkho y, nangchi ai tavai keung y dei hai ai. Naibaly nangchi i ajuchi ly neampachy lumai lawm ai i, nangchi i chanauchi py nuro nukai cho lawm u ai.

²⁵“Nangchi ly kai i khumichi theung i mawn keh nai khumichi ai tangka alai ai nai pei baly, tangka paseng nai keung kamta ly ty cho moh.

²⁶Nang teng y khumi leaungrei ly ka-ym sa nai kanih khai baly, nang ly kani dym hai y naimy ni teng y pei pi teang ai nai tla.

²⁷Ati mana nai mo na baly ni ly akhiu ai nai kanih harei awm khyh nai deaungkho y, ni ly mana i pajau ai mo? Ni ly sabawm ai nai kai teng y hnei takeng baly, kai ly pahen nai keung ne i kapathang pi ai.

²⁸“Nangchi ly Tameuh [9] ai thui tamawn rumrang moh; nangchi i cheng lu sa nai keung ai pasawi moh.

²⁹“Nang i amti amjang hawi thengthai chaluchi py, kreip hang py, olive asitui py, kai teng y talam ai nai tla. Nangchi i chapo chaluchi py kai teng y talam ai nai tla.

³⁰Nang i tawnbawi cho chalu katai hawi beram cho katai chalu py kai teng y talam ai nai tla. Kani saryhrei ly amhm hawi khai iy tajarei kani y ly kai teng y talam ai nai tla.

³¹“Nangchi ly kai i chengchi ne; nangchi ly kasui takaichi my kei nai amso tawnbawi mawi ly cho u moh. Uichi ai phai pacho u.