Read Khumi Chin THEU NAI 23 Bible Online

THEU NAI 23 - Khumi Chin bible

THEU NAI 23

¹Nangchi ly teng y nai satang kamngo sa nai khumi mang y, teng y nai pany hai nai keung lawm moh.

²Khumi kanawichi i tamang naira y abang moh; khumi kanawichi mang y abang iy leu meitang ali hai vui ai nai, teng y nai pany hai nai keung lawm moh.

³Tara chih nai khala y khumi kamawn nai deaungkho y, khumi kamawn mang y teng y nai pany hai nai keung lawm moh.

⁴“Nang ly nangmy i paleung ka-e i si mo, keaungngo kano kasau mo, kanghu theung i preang jo nai niu baly, yhmkeung teng y tha pi teang ai nai tla.

⁵Nang i paleung ka-e i keaungngo kano kasau ly vawn kaji deaungkho y atlym jo baly, en vui y naimy tako teang pajau pa-rei sabawm ai nai tla.

⁶“Khumi kamawn ai tara chih nai khala y, tara lam teng y nai chih pi moh.

⁷Khumi leaungrei ai ka-chawi naimy seu moh; kamngo so y nai khumi ai tara pasum moh; Huna nai kateng chih y nai khumi ai ly kaimy pasum ai.

⁸Un cha nai khumi ly tara lam kateng niu y i, khumi kahawi ai phra hai pajau deaungkho y, un cho moh.

⁹“Nangchi ly Aikupta pri y angvyn kamta awm u reng nai deaungkho y, angvyn i ka-dawn pany iy nangchi i pri y angvyn lawm nai cheng takhrachi ai ano moh.

¹⁰“Nangchi ly saneng tariurei sala y li, hlau amti amjangchi pakym achu ai nai tla.

¹¹Na i py saryh saneng y ly li, hlau so y naimy khau u jo; hunira prau nai amti amjangchi py pakym u moh. Khumi kamawnchi cho u sy ly huni bo i nai ly daichi mawichi i vui khai pi ai nai tla. Nangchi i kreip akho hawi olive akhochi ai py, huna nai kamta sa teang ai nai tla.

¹²“Nangchi ly kani tariurei sala kalop sa iy, saryh kani y ly anawn ai nai tla; Hunai kamta teang, nang i kalop sa pi nai miseaungchi, nang i angvynchi hawi tawnbawichi ai py anawn hai ai nai tla.

¹³“Kai ARENG my nangchi ai kang thui pi nai ngiereichi tangai u; tameuh takhrachi ai chiu u moh; huni tameuhchi i amyn malawn py thui u moh.

¹⁴“Nangchi ly kai ai tahm khai ai nai, sanengrei y pawi kalen tlen thomrei sa ai nai tla.

¹⁵Tako angbo abawi y nai pawi sa ai nai tla. Kaimy leu pei nai kamta Aikupta pri i dengdairei theu nai Abiba lo y kani saryhrei angbo abawi y nai tako cha ai nai tla. Ami py katalamra syn y naimy, kai teng y ahi hawi iy chiu ai nai so moh.

¹⁶“Nangchi li hlaura i choh tyn nai neng tym baly, nangchi i amti amjangchi hawi changtha la pawi sa ai nai tla. “Saneng dym baly nangmychi thengthai baichira i, thengthai athaichi pakym achu nai khala, chohboleh nai pawi sa ai nai tla.

¹⁷Saneng tleirei hini pawi tlen thomrei sa nai khala y, neampacho bawibawichi ly ARENG Tameuh teng y ahi hawi iy chiu ai nai tla.

¹⁸“Kai teng y tawnbawi hawi apathyp nai khala y, angbo abawi nai tako hawi talam moh; kai teng y apathyp nai tawnbawi thau ly khawn mang khrairei kamlai khai ai nai tlo y.

¹⁹“Saneng tleirei nang i li hlauchira i amti amjang chaluchi ly nang i ARENG Tameuh i yhm y tym hai iy talam ai nai tla. “Beram cho, ti y baly mi-i cho ai ly amhm i kanutui hawi byh ai nai tlo y.

²⁰“Nangchi i khuleaung lam jeungrei ang kry ai nai hawi Kaimy sa pi yb nai pri y nangchi ai pahawi ai nai nangchi i mo mang y angel pato pi ai.

²¹Ni ai tahm khai iy ni i leu tangai u. Ni ai kaimy pato nai ne i, ni ai tiu u moh; ni ly huna nai tiu nai ai ly pahen pi ai ny y.

²²Na i py nangchi ly ni i leu tangai iy kai i leu pei nai kamta sa u baly, kai ly nangchi i paleung ka-e bawibawi hawi, nang ai ka-awi sa nai khumichi ai kaimy tiu ai.

²³Kai i angel ly nangchi i mo mang lu sa iy tako hai ai i, Amori cheng, Hiti cheng, Perizi cheng, Kanan cheng, Hevit cheng, Jebusi chengchi awm nai pri y tym pa-rei ang pahawi ai; huni pri i chengchi ai ly kaimy tamyh pawn ai.

²⁴Nangchi ly nichi i tameuhchi ai lu meung iy chiu u moh; nichi i reitachi kamta teaung u moh; nichi i tameuhchi taphra iy, nichi i khai takhra nai leungchengchi py pakhau pi pawn ai nai tla.

²⁵Nangchi ly nangchi i Tameuh, kai ARENG ai chiu khyh baly, kai ly nangchi ai teicha teinei amtheaung hai iy noso aho hai ai.

²⁶Nangchi i pri y cho deaungdi pahaw vui nai, teng vui nai neampachy awm ai ny y; nangchi ai deung sau hai ai.

²⁷Nangchi ai tiu nai khumichi ly kai ai jei u ai; nangchi ai tiu nai pri i khumichi ly khrukhra iy ahei u phro ai.

²⁸Hivit cheng, kanan cheng hawi Hiti chengchi ly athengra naimy preang u bawn ai.

²⁹Kai ly huni khumi cheng bawibawichi ai sanengrei sala y my, kapatheu be ai ny y; huna nai kapatheu be lawh baly, huni pri ly daichi mawichi khri pa-rei hyn ai i, khumeung khuram lawm vui na.

³⁰Nangchi ly huni pri peang pajau ai nai khumi vuikanai peung nai ryrei, kaimy huni pri i chengchi ai maiden maidenrei kapatheu ai.

³¹Kaimy nangchi i khujyh ly pangli kamsen dengdai mrethe pangli ryrei, daichi ka-vym dengdai Euphrat tavo ryrei kau hai ai. Kai ly huni pri i khumichi ai nangchi kiu y kang au ai i, nichi ai nangchi my patheu u pajau ai.

³²Huni khumichi hawi py, huni khumichi i tameuhchi hawi py, Leu Maikawm aso u moh.

³³Nangchi i pri y nichi ai awm ai nai pei moh; nichi ai awm ai nai pei lawh baly, nichi ly nangchi ai kai i tlang tleaung y kamngo so hai lawh na. Nangchi ly nichi i tameuhchi ai chiu u lawh baly, phra hai angchi khyp nai deaung y man u ai.