Read Khumi Chin THEU NAI 24 Bible Online

THEU NAI 24 - Khumi Chin bible

THEU NAI 24

¹ARENG my Mosi teng y, “Nang ly Aron, Nadab, Abihu hawi Israela chengchi ai lu sa nai leaung vui saryhreichi ai hawi iy, kai teng y mawi saleung y lyn hai kalau; nangchi ly kamlo kyh mang dengdairei kai ai chiu u.

²Nang leaungrei naini kai sahawi y jeu ai nai tla. Takhra khumichi ly kai sahawi y ahai moh sy; khumi mipuichi ly mawi y py lyn u moh sy,” napi.

³Mosi ly Israela chengchi teng y vawi teang iy ARENG i leu pei nai ngierei hawi, reita bawibawichi amti pi. Khumi bawibawichi my, “Kaichi ly ARENG i leu pei nai ngirei tangai mang,” nanai vanrei pathang u krup bo.

⁴Mosi ly ARENG i leu pei naichi tajiu typ bo. Kani pa-nyh khawn angthodyh Mosi ly mawi kheutangra y maicham sa i, Israela cheng holai nyhreichi i vui leungcheng holai nyhrei leng bo.

⁵Naibaly ni ly Israela cheng thawndeangchi ai pacheang i, nichi ly sichi tleh iy ARENG teng y leng patlum nai kapathypra, leunghawi kapathyprachi talam u nai ne.

⁶Mosi ly tawnbawi thi ka-hyhrei ai rahumra kadeng iy, thi ka-hyhrei nai ly maicham tleaung y katheng bo.

⁷Naibaly ni ly ARENG i leu pei nai tajiu typ nai Leu Maikawm la iy, mipuichi thai pa-rei phain pi. Nichi ly “ARENG i leu pei nai ngiereichi tangai ai mang,” nanai pathang u.

⁸Naibaly Mosi my thi kadeng nai rahumchi la i ni my, “Hini thi ly ARENG my leu pei nai nangchi hawi Leu Maikawm khaw hai typ nai ne,” napi nai thui nai tarawi y mipuichi i tlang tleaung y katheng bo.

⁹Mosi, Aron, Nadab, Abihu hawi Israelachi ai lu sa nai leaung vui saryhreichi ly mawi saleung y lyn u bo.

¹⁰Nichi ly Israela chengchi i Tameuh ai niu u bo. Mymy i kheu keung y kani khusang kamta pangau nai saphire lengseaung padai nai atawm.

¹¹Tameuh my Israela cheng lu sa naichi ai patangra avum hai y, nichi ly Tameuh ai niu u chum baly vanrei cha nei ahawi u bo.

¹²ARENG my Mosi teng y, “Kai i awmra mawi salo y lyn kalau ly khumi mipuichi amtiu ai nai, kaimy tajiu pi yb iy reitachi abawi nai lengseaung phei nyhrei nang teng y kang au ai,” napi.

¹³Mosi ly my i bangtang Josua hawi mawi salo y lyn hawi kalau bo.

¹⁴Mosi my Israela cheng lu sa nai keungchi teng y, “Kaini tym teang y ryrei ly hini meingtym y ajeng u jo. Nangchi theung y ka-jo ka-thui sai sairei awm lawh baly, Aron hawi Hura nini teng y chei iy, nini i ka-vo sa nai tangai u,” napi.

¹⁵Mosi ly Sinai mawi saleung y lyn kalau nai khala, tamai ly mawi y khiu pup na.

¹⁶Mawi saleung y ly ARENG i nang parai nai sangso ly khri pa-rei angvang teaung bo. Israela chengchi ly huni nang parai nai kangvang ly mawi salo y mai kangveaung kamta niu u nai ne. Tamai ly mawi y kani tariu ryrei khiu cheng i, saryh kani y ly ARENG my tamai theung mang Mosi ai palau bo.

¹⁸Huna nai khala Mosi ly tamai my khiu pup nai mawi saleung y lyn jo bo. Ni ly mawi saleung y kani y kani vui palyhrei, vum y vum vui palyhrei awm nai ne.