Read Khumi Chin THEU NAI 25 Bible Online

THEU NAI 25 - Khumi Chin bible

THEU NAI 25

¹ARENG my Mosi teng y,

²“Israela chengchi ly kai teng y talam nai atitichi talam ai nai tla, nanai thui pi. Nang ly khumi lutengchi my, ngai parai naimy pei nai katalamrachi ly kawn pi ai nai tla.

³Talam ai nai atitichi ly; muku, tangka, kheupaja,

⁴kanih mai ka-syn, an kamngau, an kamsen jeaung, beram mui kamleng, mi-i mui hawi aneng nai kanih,

⁵an kamleng pathym nai beram katai peihchi, mawi peih kangleung, thaneaung keung,

⁶maisi hang, tahm palyn ai nai asitui hawi veang ai nai rimui mui kahawichi py,

⁷pathyp pi nai keung kalen keh i pachiu nai ephod [10]hawi tangtaang adangra y pathi ai nai vang kateng mahura hawi takhra vang kateng lengseaungchi ne.

⁸Khumi mipuichi ly kai i vui Tabynako sa ai nai tla. Naibaly kai ly nichi theung y kaawm hai ai.

⁹Nang ai kang patei nai kamta Tabynako hawi ateaung alangchi sa ai nai tla.

¹⁰“Pawm ly jeng miu nyh pa-thom ka-rei, ka kalen ly miurei bo ka-rei, ka-sang ly miurei bo ka-rei awm nai ai thaneaung keung hawi so u.

¹¹Huni ly theung mang py, angam mang py muku an paleaung hai iy teng ka-ki muku mawm hai typ ai nai tla.

¹²Huni Pawm ajeaung ai nai muku sengtleng palyhrei sa iy taki palyhrei i kheuchira y, makengrei y sengtleng nyhrei sa bawi ai nai tla.

¹³Thaneaung keung hawi ajeaungra samtleangchi sa iy muku mawm typ ai nai tla.

¹⁴Pawm angjeaung ai nai samtleangchi ly Pawm y tai nai sengtlengchira y thawi yb ai nai tla.

¹⁵Samtleangchi ai sengtlengchira i nai ajiu vui moh; thawi jo ai nai tla.

¹⁶Reita leu pei naichi tajiu typ nai lengseaung phei nyhrei kang pei ai. Huni lengseaung phei nyhrei ai ly huni Pawm theung y khai ai nai tla.

¹⁷Jeng miu nyh pa-thom ka-rei, ka ly miurei bo ka-rei awm nai Pawm khym ly muku tangcheng hawi sa ai nai tla.

¹⁸Khym i mang mang kachawn y Kheruben[11]myn nyhrei ai muku tangcheng hawi sa ai nai tla.

¹⁹Huni myn ly khym i kachawn nyhreira khym ngan y sa ai nai tla.

²⁰kheruben nyhrei i kadai nai pakhichi ly Pawm khymra y khiu ai nai tla; mo atha leungtang iy huni khym ai khen hai ai nai tla.

²¹Lengseaung phei nyhrei ly Pawm theung y khai iy, khym typ ai nai tla.

²²Hunira y kai ly nangchi hawi avum ai; kai ly kheruben nyhrei khym salo y awm iy, Israela chengchi teng y leu pei ai nai ngiereichi ly nang teng y kang thui pi ai.

²³“Thaneaung keung hawi jeng miu nyhrei, ka miurei, ka-sang miurei bo ka-rei awm nai sabawi harei so.

²⁴Huni sabawi ly muku tangcheng hawi paleaung iy, sabawi teng kamki ly muku hawi mawm typ ai nai tla.

²⁵Sabawi ka-ki kangdai peurei awm nai hawi mawm prei iy muku paleaung ai nai tla.

²⁶Sabawi taki palyhreichira i kheuchira y, muku sengtleng palyhrei tai ai nai tla.

²⁷Samtleang thawi ai nai sengtlengchi ly sabawi teng mawm nai anui y tai ai nai tla.

²⁸Samtleangchi ly thaneaung keung hawi sa iy, muku an paleaung ai nai tla.

²⁹Kreip hang talam nai khala y teaung ai nai, samtang, sora, chy-ychy hawi rahumchi ai ly muku tangcheng hawi sa ai nai tla.

³⁰Huni sabawi ly Leu Maikawm Pawm i mo mang y khai ai nai tla; kai teng y talam nai tako kachaichi py, sabawi salo y avaw y pa-rei khai ai nai tla.

³¹“Maisi yhm khaira ly muku hawi sa iy, maisi yhm kateang hawi kateang panuira ly muku hawi so; Huni maisi yhm kateangra y kaseaung paumyn, pau kangdai napi nai pau ka-puchi ly maisi yhm kateangra y sa tabi ryp ai nai tla.

³²Huni maisi yhm kateang phei pheirei mang y, kateangchy thom thomrei, bawibawi tariurei sa ai nai tla.

³³Kateangchy tariureichi ra i ha hareira y, kaseaung paumyn, pau kangdai abawi nai baden pau ka-pu pau thomrei awm ai nai tla.

³⁴Maisi yhm kateang meaungra y, paumyn, pau kangdaichi awm nai baden pau palyhrei awm ai nai tla.

³⁵Kateangchy thom thomrei sala y, kaseaung paumyn ha harei awm ai nai tla.

³⁶Kaseaung paumyn seangreang hawi maisi yhm kateangchi ai muku hawi sa patawm ai nai tla.

³⁷Maisi yhm panuira y maisi yhm saryhrei sa ai nai tla. Huni maisi yhmchira i kangvang ly mo mang y ko thai ai nai so.

³⁸Tangkeih hawi maidym khauchi py, muku tangcheng hawi sa ai nai tla.

³⁹Maisi yhm kateang hawi ateaung alangchi ai ly nai muku tangcheng sie horei hawi sa ai nai tla.

⁴⁰Kaimy mawi salo y kang patei nai ka-tawm khyp, sa ai nai dawn patyp ba.