Read Khumi Chin THEU NAI 26 Bible Online

THEU NAI 26 - Khumi Chin bible

THEU NAI 26

¹“Kai i awm naira Tabynako ly kanih mai ka-syn, beram mui kamsen, an kamlengchi hawi kanih ali hang nai horei aneng ai nai tla. Huni kanih alichira y kheruben mynchi thun ai nai tla.

²Huni kanih alichi ly jeung kasau miu apom phai tajarei, ka kangdai ly miu palyhrei awm riri ai nai tla.

³Huni kanih ali hang nai pangrei y kanih ngan harei kamta hui tabi ai nai tla; takhra ali pangrei py huna nai kamta sa ai nai tla.

⁴Hui tabi nai kanih ali hang nai jeung jeungreichi i teng mang y, kalang kamngau tlahachi sa ai nai tla.

⁵Kanih ali pangrei hui tabi nai angchei kanih jeungrei i teng mang y tlaha vui pangrei, kanih ali hang nai pangrei hui tabi nai pa-nyh i kanih jeungrei i teng mang py, tlaha vui pangrei ka-tli thai ai nai tla.

⁶Huni kanih ali hang nai jeung nyhrei ai kanih jeungrei palawn thai ai nai muku sengtleng vui pangrei so.

⁷“Tabynako tabiu ai nai kanih jeung holai harei ly mi-i mui hawi aneng.

⁸Kanih jeungrei y jeng kasau miu phairei, ka ly miu palyhrei awm ai nai tla.

⁹Huni kanih jeung pangrei y kanih jeungrei hawi, kanih jeung tariurei y jeungrei palawn nai hawi hui tabi ai nai tla. Pa-nyh i hui tabi nai kanih jeung ai ly Tabynako i mo mang y tlip typ iy khai ai nai tla.

¹⁰Angchei i hui tabi nai kanih jeungra i kangkhym kanih ali thang nai tengra y tlaha vui pangrei, pa-nyh i hui tabi nai kanih jeungra i kangkhym kanih ali thang nai tengra y tlaha vui pangrei tai ai nai tla.

¹¹Huni kanih jeung nyhrei tabi mei iy Tabynako tabiura lawm ai nai kheupaja leangkhawn vui pangrei sa pajau baly, tlahachira y vawn ai nai tla.

¹²Tabynako tabiu nai kanih tawm kamlai ly nithun mang y palajai ai nai tla.

¹³Kanih jeung jeng kasau tabiu nai kamlai miurei nai ly Tabynako i kup mang y pala kathiu ai nai tla.

¹⁴“Amphu sambeu tabiu bi ai nai tla; angchei i nai ly an kamsen pathym nai beram katai peih hawi tabiu iy, salo keh i tabiu nai ly suirei nai mawi peih hawi sa ai nai tla.

¹⁵Huni Tabynako khaw typ ai nai, thaneaung pjeng hawi pado ai nai tla.

¹⁶Huni kangdo ly miu horei, ka ly miurei bo ka-rei awm riri iy,

¹⁷huni pjeng tengtawi tabi thai ai nai pjeng dawn tleirei, makeng mang ly palai, makeng mang ly leaungkeu sa ai nai tla.

¹⁸Tabynako tokalawi ngan mang i kavui pado ai nai dawn apomrei sa ai nai tla.

¹⁹Pjeng dawn ha harei i anui mang y awm nai kheu nyh nyhreichi i vui, tangka phainai vui palyhrei sa ai nai tla.

²⁰Tabynako tosyh ngan mang i kavui pjeng dawn apomrei hawi,

²¹pjeng dawn ha harei anui y, tangka panuira phainai vui palyhrei sa ai nai tla.

²²Huni Tabynako nidym ngan mang i kavui padora dawn tariurei sa ai nai tla.

²³Tabynako nidym ngan takichi i kavui padora nyhrei sa ai nai tla.

²⁴Huni taki padorachi ai kheutang dengdai salo mang khrairei, sengtleng hawi vawn typ ai nai tla. Taki nyhrei i vui py padora dawn nyhrei ai, hunai kamta sa teang ai nai tla.

²⁵Hunaibaly padora dawn tajarei hawi, ha harei i vui tangka panuira phainai nyh nyhrei, tangka phainai holai tajarei awm ai nai tla.

²⁶Tabynako i vui lengteaung holai pangrei ly thaneaung pjeng hawi so; Tabynako tokalawi ngan mang i kavui lengteaung pangrei,

²⁷tosyh ngan mang i kavui lengteaung pangrei hawi nidym ngan amtu mang i kavui pangrei sa ai nai tla.

²⁸Padorachi i umtang y khanglang nai lengteaungchi ly Tabynako mang katem y tym khrai ai nai tla.

²⁹Chengheng pjengchira y muku an paleaung ai nai tla; lengteaungchi py muku an paleaung ai nai tla; lengteaungchi thawi ai nai muku sengtlengchi tai ai nai tla.

³⁰Kaimy mawi salo y kang patei nai kamta Tabynako sa ai nai tla.

³¹“An kamngau, an kamleng, beram mui kamsen, kanih mai ka-syn hawi aneng nai kanih ali so. Kanih alira y kheruben myn thun ai nai tla.

³²Kanih ali ai thaneaung yhmmawm palyhreichira y vawn ai nai tla; yhmmawmchi ai muku paleaung iy tangka phainai palyhreira y panui ai nai tla.

³³Kanih ali ai leangkhawn hawi jang chum baly, kanih ali hang nai nithun mang y lengseaung phei nyhrei awm nai Leu Maikawm Pawm khai. Kanih ali ly meingtym kachai hawi chai keh nai meingtym ai patleh takhra ai.

³⁴Leu Maikawm Pawmra y khym tai ai nai tla.

³⁵Sabawi hawi maisi yhm ly kanih ali hang nai angam mang y khai ai nai tla; sabawi ly tosyh ngan mang y, maisi yhm ly tokalawi ngan mang y khai ai nai tla.

³⁶“Tabynako katheu pa-kho y jang ai nai beram mui kamsen, an kamleng, an kamngau, kalang kangleung amai ka-syn hawi aneng iy, kaseaung pau mawi ka-pu sa nai kanih ali hang nai harei py aneng ai nai tla.

³⁷Huni kanih ali jang ai nai i vui y thaneaung yhmmawm pangrei sa iy, muku leangkhawnchi tai ai nai tla; yhmmawmchi ai muku paleaung iy yhmmawm panuira pangrei ai py, kheupaja ngan hawi sa ai nai tla.