Read Khumi Chin THEU NAI 27 Bible Online

THEU NAI 27 - Khumi Chin bible

THEU NAI 27

¹“Maicham ly Akasia dengkeaung ngan hawi sa ai tla. Huni maicham ly jeng miu pangrei, ka miu pangrei, ka-sang ly miu thomrei awm ai nai tla.

²Maicham taki palyhreira y, taki ka-tawm kamsui palyhrei sa ai nai tla. Huni takichi ly maicham hawi amtawn iy, hinichi ai ly kheupaja hawi mawm ai nai tla.

³Maidym hawi thau patengra laawm, khaileaung chawn, rahum, leangkhawn, mai-ai patengra laawm napi nai maicham ateaung ngierei ly kheupaja hawi sa bawibawi ai nai tla.

⁴Maicham i vui kheupaja rumryh sa ai nai tla; huni rumryh takichira y ly kheupaja sengtleng palyhrei tai ai nai tla.

⁵Maicham ka-sang laileaungra y rumryh tai ai nai tla.

⁶Maicham ajeaung ai nai Akasia dengkeaung ngan hawi samtleang sa iy, huni samtleang ai ly kheupaja hawi mawm ai nai tla.

⁷Maicham ajeaung ai nai samtleang ly maicham takira tai yb nai sengtlengra thawi prei yb ai nai tla.

⁸Kaimy nang ai mawi saleung y kang patei yb nai kamta, maicham ly palauhau pa-rei dengkeaung ngan hawi sa ai nai tla.

⁹“Kai i awmra Tabynako ai kalang mai ka-syn kanih hawi jang ai nai tla; tokalawi ngan mang y jang ai nai kanih ali hang nai ly miu chungvairei awm ai nai tla.

¹⁰Huni kanih ali hang nai jang ai nai yhmmawm apomrei, panuira apomrei ai py, Kheupaja hawi sa iy leangkhawn hawi katlangchi py tangka hawi sa ai tla.

¹¹Tosyh ngan mang y py, hunai kamta kanih ali jang ai nai tla.

¹²Tabynako nidym ngan mang i apai ly miu vui pangrei sau nai kanih ali jang ai nai chengheng horei hawi panuira horei py sa ai nai tla.

¹³Tabynako kunra nisi ngan mang tapang nai ly miu vui pangrei awm awm ai nai tla.

¹⁴Kunra pa-kho i mang mang py, miu holai pangrei sau nai kanih ali hang nai hawi chengheng thomrei, panuira thomrei awm ai nai tla.

¹⁶Tabynako apai katheu pa-kho i vui y kanih ali jang nai ly jeng miu apomrei awm iy beram mui an kamngau, an kamleng, an kamsen, kalang amai ka-synchi hawi aneng iy, kaseaung pau myn thun ai nai tla. Huni kanih ali hang nai ai panuira palyhreira y leng nai chengheng palyhreira y jang ai nai tla.

¹⁷Tabynako ka-kira i chenghengchi ai tangka katlangchi patawm prei iy, leangkhawnchi ai tangka hawi py, panuirachi ai tangka hawi py sa ai nai tla.

¹⁸Tabynako apai ly jeng miu chungvairei, ka miu vui pangrei, ka-sang ly miu pangrei awm ai nai tla. Kanih alichi ai kanih mai ka-syn hawi py, panuirachi ai kheupaja hawi py sa ai nai tla.

¹⁹Tabynako i vui ateaung alang bawibawichi py, Tabynako hawi huni ai tapang ai nai khangmui ngiereichi py, kheupaja hawi sa ai nai tla.

²⁰“Dym tleirei maisi yhm thawn pajau ai nai molam, hawi keh nai olive asitui syn u ai nai Israela chengchi teng y thui pi.

²¹Aron hawi ni i chapochi ly ARENG i awmra Tabynako theung i Leu Maikawm Pawm y tapang nai kanih ali hang nai angam mang y, huni maisi yhm ly dym mang dengdai khawn mang khrairei, ARENG i mo y thawn ai nai tla. Israela chengchi hawi nichi i kangpreangchi ly huni reita patawm jojo ai nai tla.