Read Khumi Chin THEU NAI 28 Bible Online

THEU NAI 28 - Khumi Chin bible

THEU NAI 28

¹“Nang i amjo Aron hawi ni i chapo Nadab, Abihu, Eleaza hawi Ithamachi ai palau. Nichi ly pathyp pi nai keung kalop sa u ai nai Israela chengchi theung i nai vawi takhra.

²Nang i amjo Aron, pathyp pi nai keung i vui rym-ah awm iy apu parai nai ateaungchi sa pi ai nai tla.

³Aron ly kai teng y pathyp pi nai keung lawm iy Kai i kalop sa pi thai ai nai, kaimy sa thai naira pei nai kupe kakawpchi ai palau iy, Aron i vui ateaungchi sa pi ai nai tla.

⁴Huni khumichi my sa pi ai nai ateaung alangchi ly tang taang adangra ephod, baichu kangjiu, mawi-en thun nai baichu, lupeu hawi khobaichi ne. Huni ateaung alangchi ly nang i ngamjo Aron hawi ni i chapochi ai pathyp pi nai keung y, kai i kalop sa nai khala amthyp nai pathyp pi nai keung ateaungchi ne.

⁵Kupe kawp nai keungchi ly aneng nai khala beram mui an kamngau, an kamleng, an kamsen, muku kalang, kanih mai ka-synchi tabawi ai nai tla.

⁶“Ephod ai ly beram mui an kamngau, an kamleng, an kamsen, muku kalang, kanih mai ka-synchi hawi mawi-en sa ai nai tla.

⁷Ephod taki kachawn nyhrei sui ai nai asavan nai vui nyhrei awm ai nai tla.

⁸Tangtaang akawmra py, huni amjychi hawi sa iy ephod hawi patawm mei ai nai tla.

⁹Vang kateng Mahura lengseaung nyhrei la iy, hunira y Jakob i chapo leaung holai nyhreichi i amyn tajiu ai nai tla.

¹⁰Lengseaung harei y chapo leaung tariurei, katheang kalen ka-thui amynchi hawi, vai lengseaung hareira y huni bo i chapo leaung tariureichi i amyn tajiu ai nai tla.

¹¹Muku paitheng i kupe hawi lengseaung holai nyhreira y Jakob i chapo leaung holai nyhrei amyn tajiu typ iy, huni lengseaungchi ai ly muku kriu theung y khai ai nai tla.

¹²Israela cheng holai nyhreichi ai pany jo ai nai, huni vang kateng lengseaung nyhrei ly paleang asavan nai ephod vuira y tai ai nai tla. Huna nai kamta Aron ly nichi i amyn ai paleang tleaung atheng nai deaungkho y, Kai, ARENG ly kaimy i khumichi ai kang pany pi jo ai.

¹³Muku kriu nyhrei sa iy,

¹⁴muku jyn tavawi nai nyhrei ai ly muku kriu hawi hui tabi typ ai tla.

¹⁵“Tameuh i kangai pany ai nai teaung nai tangtaang adangra ly pathyp pi nai keung kalen keh i vui so pi; tangtaang adangra ai ephod sa nai vawnsaichi hawi sa iy, huni ka-tawm mawi-en sa ai nai tla.

¹⁶Tangtaang adangra ly tlip typ nai khala, jeng ka ka-meaung ka-rei awm ai nai tla.

¹⁷Tangtaang adangra salo y vang kateng lengseaung lam palyhrei pajyn ai nai tla; angchei i lamra ly amia, topazi lengseaung hawi karnet lengseaung,

¹⁸pa-nyh i lamra ly emerald, lengseaung, saphire lengseaung, diamond;

¹⁹pa-thom i lamra ly huakintho lengseaung, kalkidon lengseaung, amethusto lengseaung;

²⁰palyh i lamra ly birula lengseaung, karnelian lengseaung, Jasper lengseaungchi ne. Hunichi ai ly muku kriu theung y khai typ ai nai tla.

²¹Israela theaung holai nyhrei amyn ai, lengseaung holai nyhreira, ha harei y Jakob i chapo leaung leaungrei i amyn tajiu ai nai tla.

²²Tangtaang adangra i vui y muku vui leangchi so.

²³Tangtaang adangra tleng mang i taki nyhreira y leangkhawn tai nai muku sengtleng nyhrei tai ai nai tla.

²⁴Muku vui nyhrei ai sengtleng nyhreira y tai ai nai tla.

²⁵Takhra muku vui nyhrei ai muku kriu nyhreira tai nai deaungkho y, tangtaang adangra ai ephod asavan nai vuinawnchi hawi suichi ai nai tla.

²⁶Naibaly muku sengtleng nyhrei sa iy ephod hawi abira nai, tangtaang anui i takira y suichi ai nai tla.

²⁷Muku sengtleng nyhrei sa bi iy apu parai pa-rei aneng nai, tangtaang akawmra ka-neang, ephod mo i teng hyn nai sahawi y suichi ai nai tla.

²⁸Tangtaang adangra i sengtlengchi ai ephod i sengtlengchi, Kalang kamngau hawi suichi nai deaungkho y, tangtaang adangra ly ahaw y pa-rei tangtaang akawmra ka-neang y awm jo ai.

²⁹“Aron ly Meingtym Kachaira y kun nai khala, tangtaang adangra asavan ai nai tla. Tangtaang adangra y Israela theaungchi i amyn abawi nai deaungkho y Kai, ARENG ly kai i khumichi ai kang pany pi jojo ai.

³⁰Aron ly kai i mo y jeu nai khala, Urim hawi Thummim[12] amthyp iy kun pajau ai nai, ni i tangtaang adangra y huni Urim hawi Thummim ai pacheang ai nai tla. Israela chengchi ly kai i kangai pany thai ai nai, Aron ly kai i mo y kun nai tleirei, huni tangtaang adangra amthyp ai nai tla.

³¹“Ephod anui y amchiu nai baichu kangjiu ly beram mui an kamngau hawi aneng ai nai tla.

³²Lu apaen ai nai kho awm ai nai tla; huni kho teng aphrai y ai nai aneng takhra nai kanih ngan hawi mawm typ ai nai tla.

³³Huni baichu kangjiu anui mang teng kamkira y an kamngau, an kamleng, an kamsen pathym nai beram mui, thaisi athai mynchi hawi muku syhryhchi pakhe iy tai ai nai tla.

³⁵Aron ly pathyp pi nai kalop sa nai khala y hini baichu kangjiu amthyp ai nai tla; Ni ly meingtym kachai kai i mo y kun nai khala py, hu i nai theu teang nai khala py, muku syhryh katyn kathai ai i, ni ly deira i nai law tleaung ai.

³⁶Muku phei harei sa iy, ‘ARENG i vui aau patyp ai,’ nanai tajiu typ ai nai tla.

³⁷Lupeu ajeng nai salo y, huni muku phei ai vui kamngau hawi suichi ai nai tla.

³⁸Israela chengchi ly Kai, ARENG teng y kapathypra talam nai molam y, jawi tamang nai awm lawh teu i py, huni katalamra ai kaimy kawn pi ai nai Aron ly lu kati y muku phei thangchi ai nai tla.

³⁹“Baichu hawi lupeu ai kalang mai ka-syn hawi aneng iy, khobai ly mawi ka-pu thun ai nai tla.

⁴⁰“Aron i chapochi ateaung ai nai rym-ah awm iy apu parai nai baichuchi, khobaichi hawi lukhym kasauchi aneng pi ai nai tla.

⁴¹Huni baichu ateaung alangchi ai nang i amjo Aron hawi ni i chapochi ai hini ateaungchi amthyp hai; naibaly nichi ly kai i kalop sa nai keungchi lawm ai nai olive asitui leih iy, tahm palyn pi ai nai tla.

⁴²Nichi kangji ngo y ai nai akeng i ka-so phaibeung ryrei, phangphi kadawichi sa pi ai nai tla.

⁴³Aron hawi my i chapochi ly kai i awmra Tabynako theung y kun nai khala py, meingtym Kachaira y pathyp pi nai keungchi i kalop sa ai nai maicham sahawi y ahai nai kha y py, kangji nga iy dei y ai nai, huni phangphi kadawichi amchiu ai nai tla. Hini reita ly Aron hawi ni i kangpreangchi teaung patawm jojo ai nai tla.