Read Khumi Chin THEU NAI 29 Bible Online

THEU NAI 29 - Khumi Chin bible

THEU NAI 29

¹“Pathyp pi nai keung y kai i kalop sa ai nai Aron hawi ni i chapochi ai, hina nai kamta au ai nai tla. No-na by y nai si katai beaungjeaung harei hawi beram katai nyhrei syn.

²Asitui taheang nai tako, asitui katlen nai takochi syn, huni takochi ai angbo abawi y nai chajai tako dei hawi sa ai nai tla.

³Huni takochi ai takhu theung y pavei ly si hawi beram nyhrei apathyp nai khala, takochi py kai teng y talam.

⁴“Aron hawi ni i chapochi ai kai i awmra Tabynako katheu pa-kho mang y hawi iy, nichi ai tui pahiu hai ai nai tla.

⁵Naibaly Aron ai ly pathyp pi nai keung ateaungchi napi nai baichu, baichu kangjiu, ephod hawi tangtaang adangrachi amthyp hai iy, tangtaang akawmra pei pi ai nai tla.

⁶Lupeu ajeng hai iy, ‘ARENG teng aau patyp bo,’ nanai tajiu typ nai muku phei ai lupeu salo y suichi ai nai tla.

⁷Hunaibaly ni i lu tleaung y asitui lei iy, tahm palyn pi ai nai tla.

⁸“Ni i chapochi ai py palau iy baichuchi amchiu hai.

⁹Khobaichi py akawm hai ly lukhym kasauchi py adeung hai; nang ly hina nai kamta Aron hawi ni i chapochi ai tahm palyn ai nai tla. Nichi hawi nichi i kangpreangchi ly pathyp pi nai keung y, kai i kalop sa u jojo ai nai tla.

¹⁰“Naibaly si katai ly kai i awmra Tabynako mo mang pahawi iy, Aron hawi ni i chapochi ai, hunichi i lu tleaung y kiu khai hai ai nai tla.

¹¹Kai awmra Tabynako i katheu pa-kho kai i mo y, huni si tleh ai nai tla.

¹²Maicham kachawn taki kamsuichira y si thi maidanrei ai kiu pajeung hawi kaleu ai nai tla. Huni bo i thi bawibawi ly maicham kheutang y lei ai nai tla.

¹³Naibaly si takutara i thau ngierei, pathymra i thau, pakawi seaungru nyhrei hawi vanrei, thauchi ai maicham tleaung y leng patlum ai nai tla.

¹⁴Na i py si katai i ngan bawi, peih hawi takuta tivichi ly tai i angam mang y mai hawi patawi pawn ai nai tla. Huni kapathypra ly pathyp pi nai keungchi i vui kamngo pachai pi nai kapathypra ne.

¹⁵“Aron hawi ni i chapochi ly beram katai harei la iy, lu tleaung y kiu khai ai nai tla.

¹⁶Naibaly beram tleh iy thi ly maicham makeng palyhreira y katheng ai nai tla.

¹⁷Beram mawi ly abai piu ly takuta tivi hawi kheuchi paju pan iy, lu hawi takhra nganbawichi salo y khai chum baly,

¹⁸beram katai bom verei ly maicham salo y leng patlum ai nai tla; huna nai leng patlum nai mui kahawi ly ARENG my kawn pi nai ne.

¹⁹Naibaly Aron hawi ni i chapochi ai pa-nyh beram katai lu tleaung y kiu khai hai ai nai tla. Huni beram ly pathyp pi nai keung y aau nai khala talam nai beram ne.

²⁰Beram katai tleh iy thi maidenrei lo ly Aron hawi ni i chapochi i lamtang mang kano sampumchi, lamtang kiupui hawi lamtang kheupuichira y kaleu ai nai tla. Huni bo i thi ly maicham taki palyhreichira katheng prei ai nai tla.

²¹Maicham salo i thi maidenrei hawi tahm palyn nai asitui maidenrei la iy, Aron hawi ni i baichuchi salo y py, ni i chapochi hawi nichi i baichuchi salo y py katheng ai nai tla. Hina nai kamta Aron hawi ni i baichuchi py, ni i chapochi hawi nichi i baichuchi py, kai i vui aau patyp ai nai tla.

²²“Beram katai thau, thau awm nai tamai, taku tivi thau, pathymra i thau, pakawi seaungru nyhrei hawi, hunichi ai bam nai thau hawi lamtang phai leng vui ai nai tla.

²³Kai teng y talam nai tako takhu theung i angbo abawi y nai tako harei, olive asitui hawi taheang nai tako harei, tako phirei py syn ai nai tla.

²⁴Huni teicha teinei katalamra bawibawichi ly Aron hawi ni i chapochi i kiu y pei iy, nichi my talam patyp nai kapathypra kamta, kai teng y talam ai nai tla.

²⁵Naibaly nichi kiu i kapathyprachi ly maicham salo i leng patlum nai tawnbawi salo y khai iy, leng patlum ai nai tla. Huna nai leng patlum nai mui kahawi ly kai ai kawn hai nai ne.

²⁶“Hini beram katai i amsei la iy talam patyp nai kapathypra kamta, kai teng y talam ai nai tla. Hini amsei ly nang i vui ne.

²⁷“Pathyp pi nai keung y tahm palyn naira y talam nai beram katai i amsei hawi phai ly talam patyp nai kapathypra kamta kai teng y talam nai khala, huni nganbawichi ly pathyp pi nai keungchi i vui phy pi ai nai tla.

²⁸Kai i khumichi ly leunghawi kapathyprachi talam nai khala, tawnbawi amsei hawi phai ly pathyp pi nai keungchi i vui mawi phy ne, nanai reita leu ai teaung patawm jo ai nai tla. Hini ly khumichi my kai ARENG ai talam nai kapathypra ne.

²⁹“Pathyp pi nai keung kalen keh Aron i ateaungchi ly ni dei nai bo y ni i chapochi my amtym ai nai tla; nichi ly pathyp pi nai keung y tahm palyn nai khala amtym hai ai nai tla.

³⁰Pathyp pi nai keung Aron meingtym y amtym iy Meingtym Kachaira kalop sa ai nai kai i awmra Tabynako theung y kun nai chapo ly Aron i ateaung kani saryhrei amthyp ai nai tla.

³¹“Aron hawi ni i chapochi ai pathyp pi nai keung y tahm palyn nai khala, talam nai beram katai i nganbawi ly khai takhra nai meingtymra y byh ai nai tla.

³²Kai i awmra Tabynako katheu pa-khora y Aron hawi ni i chapochi ly huni nganbawi hawi takhu theung y awm rai nai tako cha u ai nai tla.

³³Nichi ly pathyp pi nai keung y tahm palyn nai khala, kamngo ahui nai kapathypra y talam nai teicha teineichi cha u ai nai tla. Huni teicha teineichi ly chai nai deaungkho y, pathyp pi nai keungchi naini cha pajau khyh nai ne.

³⁴Huni mawi hawi takochi ly khawn mang khrairei awm asai lawh baly, mai y patawi ai nai tla. Huni teicha teineichi ly kachai ne nai deaungkho y, ami py cho ngau y.

³⁵“Kaimy leu pei nai kamta Aron hawi ni i chapochi ai pathyp pi nai keung y tahm palyn nai pawi ly kani saryh ryrei sa ai nai tla.

³⁶Kamngo pahenra nga ai nai molam y si katai harei hawi kani tleirei apathyp ai tla; huna nai hawi maicham ai chai hai nai ne. Naibaly maicham y olive asitui hawi lei iy kachai sa ai nai tla.

³⁷Huni ly kani tleirei, kani saryh ryrei sa ai nai tla. Huna nai khala maicham ly khri pa-rei chai ai i, maicham y abi nai khumi hawi atitichi ly pajeng naira avum ai.

³⁸“Maicham salo y sanengrei awm khyh nai beram cho nyhrei hawi, kani tleirei apathyp ai nai tla.

³⁹Khawn mang y harei, dym mang y harei apathyp ai tla.

⁴⁰Angchei i talam nai beram cho ly chajai tako dei sierei hawi olive asitui palang nyhrei katlen nai kapathypra talam ai nai tla. Kreip hang palang nyhrei py katalamra palawn iy leih ai nai tla.

⁴¹Dym mang y pa-nyh i beram cho talam; khawn mang y talam nai tako dei, olive asitui, kreip hang neh nai jirei, dym mang py talam; Hini ly kai ARENG ai kawn hai nai mui kahawi katalamra ne.

⁴²Kai i awmra Tabynako katheu pa-khora, hini leng patlum nai katalamra ly kai i mo y, katu chanau deung khrairei talam ai nai tla. Kai ly huni meingtym y kai i khumichi hawi avum iy leu arum ai.

⁴³Kai ly huni meingtym y Israelachi hawi ka-vum sa iy, kai i nang parai nai kangvang, hini meingtym y kachai lawm hai ai.

⁴⁴Kai ly kai i awmra Tabynako hawi maicham ai chai hai iy, Aron hawi ni i chapochi ai kai i kalop sa ai nai pathyp pi nai keung y khai takhra ai.

⁴⁵Kai ly Israela cheng theung y kaawm hai ai i, kai ly nichi i Tameuh lawm ai.

⁴⁶Kai ly nichi ai Aikupta pri i dengdairei theu hai nai keung nichi i ARENGTameuh ne, nanai pany u ai i, kai ly nichi theung y kaawm ai; kai ly nichi i ARENG Tameuh ne ai.