Read Khumi Chin THEU NAI 3 Bible Online

THEU NAI 3 - Khumi Chin bible

THEU NAI 3

¹Kanirei nai khala y Mosi ly Midian chengchi i pathyp pi nai keung, ampu Jethro i beram kanghu, mi-i kanghu typ nai tarawi y, daichi ka-vym y tako prei i, Sinai mawi kachaira y tym.

²Naibaly Mosi teng y ARENG i kani pri amtaw thau nai ly lymlo kangpho mang dengdairei, mai kadeu kangveaung amteng hai bo. Mosi ly lymlo kangpho kang y naimy mai angveaung pa-lun nai niu.

³Hini ly rengrang tlai na ly! Ati mana nai mai ly lymlo kangpho kang y lawh mo? Kai ly sahawi y chei iy khen cham ai,” nanai dawn.

⁴Mosi chei nai thym y ARENG my lymlo kangpho theung mang, “Mosi! Mosi!” nanai palau. Huna nai khala Mosi my, “ARENG, Kai hi y awm,” nanai pathang.

⁵Tameuh my, “Sahawi y jeu moh; nang angdo nai meingtym ly kachai ne i, phainai aleng la.”

⁶Kai ly nang i amsi pajochi i Tameuh, Abraham i Tameuh, Isaka i Tameuh, Jakob i Tameuh ne,” napi. Mosi ly Tameuh ai khen vam y i, mymy i mei atamym cheng vui bo.

⁷Naibaly ARENG my, “Kai i khumichi ly Aikupta pri y ngari kamtang avum nai kaniu khyp bo. Nichi ai kalop sa hai nai keungchi my ana patang hai nai kham pajau y nai deaungkho y, nichi vo hang iy, kasabawmra hnei nai raawi kai ly thai bo. Kai ly nichi i patang nai kaniu angchi khyp bo.

⁸Aikupta chengchi kiu i nai nichi ai atleu chum baly, huni pri i nai kapahawi iy paitiu khuta hawi nai, meingtym kau parai nai pri mang y pahawi ai nai kang jeu kathiu bo. Huni pri ly khaileaung hawi iy teicha teinei neangneang awm. Huni pri y Kanan cheng, Hiti cheng, Amori cheng, Perizi cheng, Hevit chengchi awm u nai ne.

⁹Israela chengchi i vo hang nai katyn kathai; nichi ai Aikupta chengchi my ana patheng nai py kaniu bo.

¹⁰Kai i khumi Israela chengchi ai Aikupta pri i nai patheu iy pahawi ai nai, vai kai ly nang ai Aikupta samrang teng y kang pato ai,” napi.

¹¹Na i py Mosi ly Tameuh teng y, “Kai ly vang y nai khumi ne. Aikupta pri samrang teng y chei iy Israela chengchi ai mana kapatheu thai ai mo?” napi.

¹²Tameuh my, “Kai ly nang hawi vanrei awm ai; kaimy nang ai kang pato nai ka-ma-ra ly nangmy huni khumichi ai Aikupta pri i dengdairei pahawi nai khala, nangchi bawibawi ly hini mawi y kai, Tameuh ai chiu u ai,” napi.

¹³Naibaly Mosi my, “Kai ly Israelachi teng y chei iy nichi teng y, ‘Nangchi i amsi pajochi i Tameuh ly kai ai nangchi teng y pato nai ne,’ nanai thui pi iy nichi my, Huni Tameuh i amyn ly mana mo?,’ nanai deng lawh baly, kai ly mana pathang pi ai mo?” napi.

¹⁴Tameuh my, “Kai i amyn ly Kai ne: [1] “Kai ne”, nanai leu sai ly Hebrai leu y Jehovah, nanai ne; huni ai ly khumi leu y “ARENG” nanai leu tapeang bo. Kai nanai amyn awm nai keung ly nangchi teng y kai ai pato nai ne,’ nanai Israela chengchi teng y thui pi ai nai tla,” napi.

¹⁵Naibaly ARENG my Israelachi teng y, “Nangchi i amsi pajochi i ARENG, Abraham i Tameuh, Isaka i Tameuh, Jakob i Tameuh napi nai ARENG Tameuh my nangchi teng y kai ai ang pato nai ne,” nanai Israela chengchi teng y thui pi ai nai tla. Huni amyn ly deungtasarei kai i amyn ne; momang i deung kangthauchi ly huni amyn hawi kai ai palau u ai.

¹⁶Nang chei iy Israela cheng lu sa naichi ai pangym ly nichi teng y nangchi i ARENG, Abraham i Tameuh, Isaka i Tameuh, Jakob i Tameuh napi nai ARENG Tameuh ai niu iy, huni Tameuh ly nangchi teng y jeu i, Aikupta chengchi my nangchi ai ana nai niu pi bo.

¹⁷Kai ly nangchi ana naira avum nai Aikupta pri i dengdairei nangchi ai pahawi iy, Kanan cheng, Hiti cheng, Amori cheng, Perizi cheng, Hevit cheng hawi Jebusi chengchi i awm nai pri y pahawi ai. Huni pri ly khaileaung hawi iy teicha teinei avaw y nai ne, nanai amti pi.

¹⁸“Nichi ly nang i leu tangai u ai. Hunaibaly nang ly Israela lu sa naichi hawi vanrei Pharao samrang teng y chei iy, ‘Kaichi ly Hebrai chengchi i ARENG Tameuh hawi avum bo; kaichi ly ARENG Tameuh teng y apathyp ai nai daichi ka-vym y kani thomrei chei ai nai pei kyh,’ nanai hnei.

¹⁹Aikupta samrang ly kai i haiho hawi atho so y baly, nangchi ai theu ai nai ang pei ai ny y, nanai kapany.

²⁰Na i py kai i sa thai naira hawi rengrang ka-ma-rachi patei iy, Aikupta chengchi ai kapajeng ai. Hunaibaly samrang ly nangchi ai theu ai nai ang pei ai.

²¹Kai i chengchi ly Aikupta chengchi teng y meimai nga pa-rei kaimy sa ai i, nangchi theu u nai khala bengtlairei theu u ai ny y.

²²Israela neampachy ngiereichi ly Aikupta khumi yhm deaungpachi hawi mychi yhm y anga nai Aikupta neampachychi teng i py muku tangka, amia, ateaung alangchi hnei u ai. Naibaly nangchi ly nangmychi cho chanauchi ai huni ateaungchi pateaung iy, Aikupta chengchi i yhmtheaung katuichi amtym u ai,” napi.