Read Khumi Chin THEU NAI 30 Bible Online

THEU NAI 30 - Khumi Chin bible

THEU NAI 30

¹“Rimui patawi ai nai maicham ly Akasia dengkeaung ngan hawi so.

²Huni ly maicham ly jeng ka ka-meaung, jeng miurei, ka miurei hawi ka-sang miu nyhrei awm ai nai tla. Maicham kachawn taki kamsuichi ly maicham hawi amtawn prei ai nai tla.

³Maicham kangbai, teng ka-ki, kachawn takichi ai muku paleaung ai nai tla. Maicham teng ka-ki muku hawi mawm ai nai tla.

⁴Maicham i makeng nyhreira y samtleangchi thawi ai nai muku sengtleng nyhrei tai ai nai tla.

⁵Samtleangchi ly akasia dengkeaung ngan hawi sa iy, muku paleaung ai nai tla.

⁶Leu Maikawm Pawm mo i kanih ali jang nai angam mang y, huni maicham khai ai nai tla. Huni meingtym y kai ly nang hawi avum ai.

⁷Aron ly khawn tleirei maisi thawn ai nai sa nai khala y, maicham salo y rimui mui katui patawi ai nai tla.

⁸Ni ly dym mang y maisichi thawn nai khala py, rimui mui katui patawi ai nai tla. Nang i katu chanau deungrei rimui mui katui talam nai ly ARENG i mo y avaw by y pa-rei sa jojo ai nai tla.

⁹Huni maicham salo y ly patawi ngau y nai rimui talam ai nai avo y. Tawnbawi ai mo, teicha teinei mo py talam ai nai avo y. Kreip hang talam nai py leih ai nai avo y.

¹⁰Aron ly sanengrei y tlenrei, kamngo ahui nai tawnbawi thi hawi maicham kachawnra i taki kamsui palyhreichi ai py kaleu iy, maicham kachai sa ai nai tla. Nang i katu chanauchi ly huni reita ai saneng tleirei sa jojo ai nai tla. Huni maicham ly Kai, ARENG i vui au nai chai keh nai maicham ne,”

¹¹ARENG my Mosi teng y,

¹²“Nang ly Israela chengchi i amyn la nai khala, amyn la nai thym y nichi teng y khrukhra naira avum y ai nai, ARENG teng y khumi luteng aau ai nai tla.

¹³Amyn la naira y abawi nai khumichi ly pei ai tla nai khumi akeu tangka ly neh iy pei ai nai tla. Khumi luteng huni akeu tang ka kai teng y talam ai nai tla.

¹⁴Saneng apomrei hawi saneng apomrei leng amyn la naira y kup nai khumichi ly kai teng y akeu pei ai nai tla.

¹⁵ARENG teng y nangchi i khumi akeu pei nai khala, Khumi kanang py ne sy, khumi kamawn py ne sy, pei ai nai tla nai akeu tleaung y nawi py nawi y, di py di y, hujirei pei khyp ai nai tla.

¹⁶Nang ly Israela chengchi teng i, huni akeu tangka pangym achu iy kai i awmra Tabynako kry ai nai i vui teaung ai nai tla. Nangchi i khumi akeu pei nai tangka saho y, ARENG ly nangchi tlang i vui ama hai ai, nanai pany jo ai,” napi.

¹⁷ARENG my Mosi teng y,

¹⁸“Kheupaja panuira awm nai kheupaja rahum sa ai nai tla. Huni kheupaja rahum ly kai i awmra Tabynako hawi maicham sala y khai iy, tui kadeng ai nai tla.

¹⁹Aron hawi ni i chapochi ly mychi i kiu kheuchi, huni rahum i tui hawi asi u ai nai tla.

²⁰Nichi ly kai i awmra Tabynako theung y kun y rai khala py ne sy, maicham salo y katalamrachi talam y rai kha py ne sy, huna nai kiu kheu asi u baly dei ai ny y.

²¹Nichi hawi nichi i kangpreangchi ly huni reita patawm jojo ai nai tla,” napi.

²²ARENG my Mosi teng,

²³“Mura hang sie holai palyhrei, sinamon mui katui sie saryhrei, lawitheng sie saryhrei;

²⁴kassia sie holai palyhrei napi nai hawi keh nai mui katuichi ai (ka-vo khai yb nai kaji jirei neh ai nai) olive asitui palang tariurei hawi katlen iy,

²⁵rimui kamta tahm palyn nai asitui so.

²⁶Hini tahm palyn nai asitui teaung iy kai i awmra Tabynako hawi Leu Maikawm Pawm ai py,

²⁷sabawi hawi huni i ateaungchi ai py, maisi yhm ateaung hawi huni i ateaungchi ai py, rimui patawira maicham ai py,

²⁸leng patlum nai maicham hawi huni i ateaung ngiereichi py, rahum hawi panuira py, huni rimui hang hawi pajui ai nai la.

²⁹Hunichi ai hina nai kamta talam nai deaungkho y, chai keh hai ai nai tla. Hunichi ai abi nai ngierei ly pajeng naira avum ai.

³⁰Naibaly Aron hawi ni i chapochi ai kai i kalop sa nai pathyp pi nai keungchi lawm ai nai, nichi ai rimui hawi leih iy tahm palyn pi.

³¹Israelachi teng y hina nai leu pei; kai i kalop sa ai nai tahm palyn naira y nangchi i katu chanau deung kangthau khrairei, hini asitui kachai teaung ai nai tla.

³²Huni asitui ly khumi rumrangchi tlang tleaung y leih ai nai tlo y; huni asitui ka-tawm py sa ai nai tlo y. Huni asitui ly kachai ne i, asitui kachai, nanai palawn ai nai tla.

³³Khumi ami py ne sy, huni asitui ka-tawm sa nai mo, pathyp pi nai keung ny y nai khumi tlang tleaung y, huni asitui leih nai mo, sa lawh baly, kai i khumi theung i nai nyn va vui ai,” napi.

³⁴ARENG my Mosi teng y, “Rimui mui katuichi napi nai state, onykha, kalbanum hawi kathan katli tangchengchi ai kaji kangngeng riri neh ai nai tla.

³⁵Rimui sa nai kamta huni mui kahawichi ai rimui mui katui so; chaipyn iy tangcheng lawm ai nai palawi thiu ai nai tla.

³⁶Huni mui katuichira i phyrei ai teipei pa-rei deng iy, kai i awmra Tabynako theung, kai i mo y syn ly Leu Maikawm Pawm mo y phui ai nai tla. Huni rimui mui katui ai chai keh nai rimui mui katui palawn ai nai tla.

³⁷Nangmychi teaung ai nai ly huni rimui sa nai kamta sa ai nai tlo y; huni rimui mui katui ly kai i vui talam nai ne i, rimui mui katui kachai palawn ai nai tla.

³⁸Huni rimui mui katui ai amy i vui mui kahawi sa nai khumi ly kai i khumi theung i nai nyn va vui ai,” napi.