Read Khumi Chin THEU NAI 31 Bible Online

THEU NAI 31 - Khumi Chin bible

THEU NAI 31

¹ARENG my Mosi teng y,

²“Kai ly Juda theaung theung i Hura i katu, Uri i chapo Bezelela ai vawi yb bo;

³Ni ly muku, tangka, kheupajachi ai khen hawi iy ka-pu sa kawp nai, vang kateng lengseaungchi kata iy palum kawp nai, dengkeaung mawi o-pangen kawp nai, napi nai huni kalopchi kawp katlen hai ai nai, kai ly ni teng y sa thai naira kapei nai ne.

⁶Kai ly ni ai sabawm ai nai Dan theaung theung i, Ahisama i chapo Aholiaba ai kavawi yb bo. Kaimy leu pei nai ngiereichi sa thai ai nai, takhra kupe kakawp bawibawichi ai py, khri pa-rei sa thai naira kapei nai deaungkho y,

⁷nichi ly kai i awmra Tabynako, Leu Maikawm Pawm hawi khym, Tabynako theung i ateaung alang bawibawichi,

⁸sabawi hawi huni i ateaung alangchi, muku maisi yhm kateang hawi huni i ateaung bawibawichi, rimui mui katui patawira maicham,

⁹leng patlum naira maicham hawi huni i ateaung alangchi, rahum hawi panuira,

¹⁰Aron hawi ni i chapochi pathyp pi nai kalop sa nai khala y amthyp ai nai, rym-ah awm nai pathyp pi nai keung ateaungchi,

¹¹tahm palyn nai asitui hawi meingtym kachaira i vui rimui mui katuichi py, sa u thai ai nai ne. Kaimy nang ai leu kang pei nai kamta, nichi ly huni bawibawichi sa u ai nai tla,” napi.

¹²ARENG my Mosi ai Israela chengchi teng y thui hai nai ly

¹³“Kai i Anawn kani y ja ai nai tami u moh; Anawn kani ly Kai, ARENG my nangchi ai, kai i khumi y vawi takhra nai ne, nanai katu chanau deung kangthau khrairei, pany jo ai nai ka-ma-ra ne.

¹⁴Anawn kani ly ja ai nai tla; ati mana nai mo na baly huni kani ly khai takhra nai kani ne nai deaungkho y, ja ai nai tla. Anawn kani y ja y naimy kalop sa nai khumi ai ly padei takengkei ai nai tla.

¹⁵Nangchi ly kani tariurei sala y kalop sa ai nai nga; na i py saryh kani ly ARENG i vui au patyp nai anawn kani ne; huni kani y kalop sa nai khumi ai ly padei takengkei ai tla.

¹⁶Israela chengchi i vui Anawn kani ly Leu Maikawm sa nai ka-ma-ra ne i, ja ai nai tla.

¹⁷Huni ly kai hawi Israela chengchi sala khaw hai nai ka-ma-ra ne; ati mana nai mo na baly Kai, ARENG my kani tariurei sala y kani hawi khaileaung ai sa nai ne i, saryh kani y ly kalop so y naimy kai anawn bo,” napi.

¹⁸Tameuh ly Sinai mawi salo y Mosi teng y, leu pei chum nai khala, Tameuh mymy kypkyp my lengseaung phei nyhrei tleaung y reita leuchi tajiu pi iy, Mosi teng y pei pi nai ne.