Read Khumi Chin THEU NAI 32 Bible Online

THEU NAI 32 - Khumi Chin bible

THEU NAI 32

¹Mosi ly mawi anui y satlo y naimy, mawi salo y kra parai pa-rei awm nai khala khumichi ly Aron teng y chei achu pariukhiu iy, “Kaichi ai Aikupta pri i dengdairei pahawi nai Mosi ly ati mana lawh mo, nanai kaichi pany y nai deaungkho y, kaichi ai pahawi ai nai tameuh harei so pi kyh,” nanai takeng u.

²Aron my nichi teng y, “Nangchi i ajuchi hawi cho chanauchi ateaung nai muku kanochi aleng iy kai teng y jeu hai u,” napi.

³Hunaibaly khumi bawibawichi ly mymychi i muku kanochi aleng iy Aron teng y pei u.

⁴Aron my muku kanochi ai patlawn iy muku hawi si cho myn sa bo. Naibaly khumi mipuichi my, “Israelachi awi, hini tameuh ly achi ai Aikupta pri i dengdairei pahawi nai keung, achi i tameuh ne he!” napi.

⁵Naibaly Aron ly muku si cho myn mo y maicham sa iy, “Khawndam ly ARENG ai tahm khai nai pawi sa u ai nai tla,” nanai satang thai hai bo.

⁶Kani pa-nyh khawn angthodyh y khumi bawibawichi ly leng patlum nai kapathypra hawi leunghawi kapathyprachi talam u bo. Huna nai apathyp u chum baly nichi cha nei pavui u i, neampacho, neampachychi amau u bo.

⁷ARENG my Mosi teng y, “Mawi anui y satlo kaliki ly Aikupta pri i dengdairei pahawi nai nang i khumichi ly kai ai paleang u vui bo.

⁸Nichi ly kai i reita lam i nai hi u vui bo; muku hawi si cho myn sa iy huni myn y apathyp i, chiu u bo. Huni tameuh ly nichi ai Aikupta pri i dengdairei pahawi nai tameuh ne, nanai aeu u sau na bo,” napi.

⁹ARENG my, “Hini khumichi ly khri pa-rei paleung tang, nanai kai pany.

¹⁰Kai ai paka moh; kai ly kado theu i, nichi ai katamyh pawn ai. Naibaly kai ly nang hawi nang i kangpreangchi ai khumi cheng kalen kang lawm hai ai,” napi.

¹¹Na i py Mosi ly my i ARENG Tameuh teng y khri pa-rei ahui naimy takeng nai ly “Aw ARENG, nang ly Aikupta pri i dengdairei sa thai naira len parai nai hawi atleu pi nai, nang i khumichi ai khri pa-rei kado theu hai lawh ai bo a?

¹²Aikupta chengchi my, nang ly Israela chengchi ai mawichira pahawi iy tamyh be ai nai, Aikupta pri i dengdairei pahawi nai teu, nanai thui y ai a? Kado theu hai me mo ly paleung amnym kyh jemjem ba; nang i khumichi tlang tleaung y pajeng naira tym hai mo kyh.

¹³Nang i miseaung Abraham, Isaka hawi Jakobchi ai pany pi jo kyh; nang ly nichi i kangpreangchi ai kani mang i ka-sichi kamta peung hai ai, nanai hawi, nangmy adeu hai typ nai huni pri bawibawi ly nichi i kangpreangchi amtym jojo ai nai, nanai pany pi ba,” nanai ahui pi bo.

¹⁴Naibaly ARENG ly kado katheu rym i, mymy i khumichi ai pajeng y naimy lawi hai bo.

¹⁵Mosi ly makeng nyhrei ririra y reita leu pei naichi tajiu typ nai lengseaung phei nyhrei syn iy, mawi i nai satla kathiu bo.

¹⁶Huni lengseaung phei nyhrei hawi, huni salo y tajiu naichi ly ARENG i kuchi ne.

¹⁷Josua ly khumi mipuichi i aeu nai katyn thai nai khala Mosi teng y, “Tai naira mang aeu nai katyn amsau taw nai kathai lawh ly” napi.

¹⁸Mosi my, “Kai i thai nai katyn ly tavai eaung nai katyn py ny y, tavai sum vo hang nai katyn py ny y, khulym thui nai raawi katyn teu,” napi.

¹⁹Mosi ly tai naira kang sa y tym nai khala, si cho myn hawi khumichi lam lengleang nai niu baly, khri pa-rei kado theu nai deaungkho y, my i syn nai lengseaung phei nyhrei ai mawi kheutang y aphi su i, tleu piu bo.

²⁰Ni ly nichi i sa nai si cho myn ai patlawn vui i, teipei pa-rei deng iy tui hawi kanu khala, Israela chengchi ai nei hai bo.

²¹Mosi my Aron teng y, “Hini khumichi ly nang deaungkho y huna tanrei len nanai kamngo sa ai nai nichi ly nang ai ati ang sa hai mo?,” nanai deng.

²²Aron my pathang nai ly “Kai ai kado theu hai lawh moh; hini khumichi ly hawi y naira sa ai nai, mana tanrei paleung ka-dawn len na mo, nanai nangmy pany yb nai ne.

²³Nichi ly kai teng y, ‘Aikupta pri i dengdairei kaichi ai pahawi nai keung Mosi ly dei mo, heng mo py kaichi pany y nai deaungkho y, kaichi ai pahawi ai nai tameuh harei so pi,’ nanai ang takeng.

²⁴Kaimy nichi teng y, ‘Nangchi i muku ateaung alangchi aleng iy kai ai pei,’ kanapi. Kai ly nichi teng i nga nai muku ateaungchi mai y patlawn i, hini si cho myn lawm bo!,” napi.

²⁵Israela chengchi ly tengpang sahawi i paleung ka-echi my cheh ai naira lawm i, Aron my atho sa hai nai molam y, pakym paka lei y na pa-rei lang lengleang, nanai Mosi ly niu nai ne.

²⁶Hunaibaly Mosi ly tai naira apai katheu pa-khora angdo iy, “ARENG i khumichi awi, kai teng jeu u!, nanai athorei my palau bo. Huna nai khala Levi theaungchi ly Mosi teng y chei u achu i,

²⁷Mosi my nichi teng y, “Israela chengchi i ARENG Tameuh my, ‘Nangchi khumi luteng ly haisau syn iy, tai naira apai pa-kho tleirei y chei u bawibawi ly nangchi i amjo amnau, ahawi ka-dawi, yhm deaungpachi ai tleh u,’ nanai leu ang pei,” napi.

²⁸Levi theaungchi ly Mosi i leu pei nai tangai u i, huni kani y khumi leaung sang thomrei tahm tleh u bo.

²⁹Naibaly Mosi ly Levi theaungchi teng y, “Vaini nangchi ly nangmychi i chapo kypkyp, amjo amnau kypkypchi ai tleh nai deaungkho y, ARENG i kalop sa ai nai pathyp pi nai keung y, nangmychi naimy aau u nai bo; hunai y ARENG ly nangchi ai amtheaung hai bo,” napi.

³⁰Kani pa-nyh y Mosi my Israela chengchi teng y, “Nangchi ly khri pa-rei kamngo sa tamang u bo. Vai, kai ly ARENG awm nai mawi salo y lyn kalau ai; nangchi i kamngo lawira nga ai nai takeng pi ai i, nga tan nga lym ai,” napi.

³¹Mosi ly ARENG teng y chei ali teang i, “Hini khumichi ly khri pa-rei kamngo sa tamang u bo; muku tameuh myn sa iy chiu u lawh bo.

³²Nichi i kamngo pahen pi kyh; na i py nichi i kamngo pahen pi y ai na baly, nang i khumi amyn tajiu nai cha-iu theung i nai, kai i amyn taphra vui teu,” nanai takeng bo.

³³ARENG my, “Kai i tlang tleaung y kamngo sa nai khumichi i amyn naini kaimy i cha-iu theung i kataphra ai.

³⁴Vai chei iy nang teng y kang thui pi nai meingtym y tym pa-rei nichi ai pahawi; kai i angel my nang ai lam patei ai; na i py hini khumichi i kamngolai kapajeng ai nai neng tym ai mang,” napi.

³⁵Hunai deaungkho y ARENG ly Israela chengchi tlang tleaung y no kanghawi tym hai bo; huni ly nichi my Aron ai si cho myn sa hai lawh nai deaungkho y ne.