Read Khumi Chin THEU NAI 33 Bible Online

THEU NAI 33 - Khumi Chin bible

THEU NAI 33

¹ARENG my Mosi teng y, “Nang ly Aikupta pri i dengdairei pahawi nai khumichi hawi vanrei, hini meingtym i nai theu iy kai ly Abraham, Isaka, Jakob hawi nichi i kangpreangchi teng y pei ai adeu nai pri y chei u.

²Nangchi ai lam patei ai nai Angel ai kaimy pato pi ai. Kanan cheng, Amori cheng, Hiti cheng, Perizi cheng hawi Jebusi chengchi ai kaimy patheu pawn ai.

³Nangchi ly cha nei avaw y iy pa-tiu khuta hawi nai pri kahawira kang tha ai. Na i py nangchi ly paleung tang nai khumichi ne nai y, lam sala y nangchi ai kang tamyh pawn lawh na i, kaimy kypkyp ly nangchi hawi vanrei chei y leang,” napi.

⁴Israela chengchi ly huna nai leu pei nai thai nai khala paleung mawn u i, vang kateng ateaungchi ateaung u y bo.

⁵ARENG my Mosi dengdairei Israela chengchi teng y, “Nangchi ly paleung tang nai khumi ne; kai ly nangchi hawi kani tanareichy chei hai lawh baly, nangchi ai kang padei chauchau ai; vai ly nangchi i vang kateng ateaungchi aleng u; huna khala naini, kai ly nangchi ai mana kang sa hai ai mo, nanai dawn pi ai,” napi.

⁶Hunai deaungkho y Israela chengchi ly Sinai mawi i dengdairei theu u nai bo y, vang kateng ateaungchi ateaung u bi y leang bo.

⁷Israelachi tai naira tleirei y Mosi ly Tabynako ai, tai naira i angam mang, kamlo kyhra y sa reng nai ne. Huni ai ly ARENG i awmra Tabynako, nanai amyn pathi; ami py ne sy, ARENG i kangai pany ai ngai nai khumi ly ARENG i awmra Tabynako mang y chei ai nai tla.

⁸Mosi ly Tabynako mang y chei nai tleirei, khumichi ly mychi tai mo y angdo u iy Mosi Tabynako theung y kun nai pa-rei, khen patawm u reng.

⁹Mosi Tabynako theung y kun phai kun baly, tamai angjawi tla kathiu i, Tabynako katheu pa-kho y beu bo. ARENG ly tamai theung mang Mosi hawi leu arum nai ne.

¹⁰Khumi bawibawichi ly Tabynako katheu pa-kho y tamai beu nai niu baly, lu meung iy chiu u bo.

¹¹Naibaly ARENG hawi Mosi ly ahawi kamrawi tengtawi leu arum nai kamta mo atha leungtang naimy leu arum hawi. Huni bo y Mosi ly tai mang y vawi ali teang bo. Na i py mymy ai sabawm nai keung thawndeang leaungrei, Nun i chapo Josua ly Tabynako theung y awm jo nai ne.

¹²Mosi my ARENG teng y, “Nang ly kai ai hini khumichi ai pahawi ai nai leu pei nai ly teng khyp; na i py kai hawi vanrei ami ai pato ai mo, nanai ly leu pei y nai ne. Nangmy, ‘Nang ai hawihai palai kang pany, nang ai paleung kang no,’ nanai thui bo.

¹³Nang ly kai ai paleung no na baly, kai ly nang i kalop sa iy nang i paleung kangai sa thai ai nai, nang i sa ai dawn tau naichi thui pi kyh. Hini khumichi ly nangmy vawi takhra nai khumichi ne, nanai py pany pi kyh,” napi.

¹⁴Huna nai khala ARENG my, “Kai ly nang hawi vanrei chei iy, nang ai eaung naira kang pei ai,” napi.

¹⁵Mosi my, “Nang ly kai hawi vanrei chei hai y baly, kaichi ai hini meingtym i nai theu hai mo kyh.

¹⁶Nang ly kaichi hawi vanrei chei hai y lawh baly, nang ly nangmy i khumichi hawi kai ai paleung no, nanai ami pany thai ai mo? Nang ly kaichi hawi vanrei awm hai khala naini, kaichi ly khaileaung pri i cheng takhrachi hawi amtleh nai amny ai,” napi.

¹⁷ARENG ly Mosi teng y, “Kai ly nang ai hawihai palai pany iy paleung kang no nai deaungkho y, nang i hnei nai kamta kang sa pi ai,” napi.

¹⁸Hunaibaly Mosi my, “Nang i kangvang nang parai nai sangso niu ai nai pei kyh,” nanai takeng.

¹⁹ARENG my, “Kai i nang parai nai ngierei nang ai patei iy kai i amyn kachai py, nang teng y amteng hai ai; kai ly ARENG ne; kaimy vawi takhra nai khumichi teng y, tamen naira hawi pahen naira kapatei reng nai ne.

²⁰Kai ai niu nai khumi ly heng ai ny y nai deaungkho y, nang ai kai i meimai kang patei ai ny y.

²¹Na i py kai i sahawi y awm nai lengseaung saleung y angdo.

²²Kai i nang parai nai kangvang sangso ko nai khala, kai ly nang ai lengseaung ka-ko sala y kang khai iy, kai katlen vui y ryrei ly nang ai kai i kiu hawi kang tamym vui ai.

²³Naibaly kai i kiu la vui ai i, nang ly kai i nithun anam niu ai khyh; na i py kai i meimai ly nang niu ai ny y,” napi.