Read Khumi Chin THEU NAI 36 Bible Online

THEU NAI 36 - Khumi Chin bible

THEU NAI 36

¹“Bezalela hawi Aholiaba nini py Tabynako sa ai nai, ARENG teng i kupe kakawp hawi, ka-vo dawn pany kawp nai takhra kupe kakawp bawibawichi py, ARENG i leu pei nai kamta khyp sa u ai nai tla,” napi.

²Mosi ly Bezalela hawi Aholiaba nini ai py, Tabynako sa ai nai ARENG teng i kupe kakawp nga nai khumichi hawi, sabawm ai nai paleung ka-no awm nai bawibawichi ai py palau iy, kalop amteaung hai bo.

³Nichi ly Tabynako sa ai nai Israela chengchi my syn nai katalamra vawnsai ngiereichi Mosi teng i nai nga u bo. Khawn tleirei Israela chengchi ly mymychi i katalamra vawnsaichi Mosi teng y syn pi jojo nai ne.

⁴Huna nai khala Tabynako sa nai kupe kakawpchi ly Mosi teng y chei iy,

⁵“Khumi mipuichi my syn nai vawnsaichi ly ARENG my sa hai nai kalop i vui, ngai nai tleaung y palai na bo,” napi u.

⁶Naibaly Mosi my, “Ami py Tabynako sa ai nai i vui y talam ai nai vawnchi talam u bi moh jau,” nanai leu pei iy, taira i khumi bawibawichi teng y satang thai hai. Hunaibaly khumichi ly katalamra vawnsaichi syn u y leang bo.

⁷Talam nai vawnsaichi ly kalop sa ai nai aleu nai bo y, palai pangpo na veng bo.

⁸Kupe kakawpchi theung i kawp katlen nai keungchi ly ARENG i awmra Tabynako sa u bo. Nichi ly kanih mai ka-syn hawi an kamngau, an kamleng, an kamsen pathym nai beram mui hawi aneng iy pakhi awm nai kheruben mynchi thun nai kanih ali hang nai horei hawi Tabynako sa u nai ne.

⁹Kanih ali bawibawi ly ahyh riri iy, ha harei ly jeung miu apom phai tajarei, ka miu palyhrei awm bawibawi.

¹⁰Nichi ly kanih ali hang nai pangrei y dawnrei hui tabi i, takhra ali pangrei ai py, hunai kamta hui tabi teang.

¹¹Kanih dawnrei i tawm katemra y kanih ngan kamngau hawi tai u bo.

¹²Angchei i kanih dawn tawm katemra y tlapaha vui pangrei, pa-nyh i kanih dawn tawm katemra y tlapaha vui pangrei py, ka-tlyh khyp tai teang nai ne.

¹³Nichi ly muku leangkhawn vui pangrei sa iy, huni leangkhawnchi hawi kanih dawn nyhrei ai kanih jeungrei palawn hai bo.

¹⁴Naibaly nichi ly Tabynako tabiu ai nai mi-i mui hawi aneng nai kanih ali hang nai holai harei hui tabi u bo.

¹⁵Kanih ali holai harei ly jeng, ka ahyh bawi i, ali ha harei i jeng ly miu phairei, ka miu palyhrei awm bawibawi.

¹⁶Nichi ly kanih ali hang nai pangrei ai jeungrei hui tabi iy, takhra ali tariurei ai jeungrei hui tabi nai ne.

¹⁷Angchei i kanih jeung tawm katemra y tlapaha vui pangrei, takhra kanih jeung tawm katemra y tlapaha vui pangrei py tai u bo.

¹⁸Nichi ly Tabynako tabiu ai nai kheupaja leangkhawn vui pangrei sa iy, teng nyhrei hui tabi i, tabiura harei lawm bo.

¹⁹Huni bo y amphura sambeu sa u bi; harei nai ai ly an kamsen pathym nai beram katai peih hawi py, huni salo y tabiu bi ai nai mawi peih kanem sa u nai ne.

²⁰Nichi ly Tabynako theung mang i angpangchi ai akasia dengkeaung ngan hawi sa u bo.

²¹Angpang ha harei ly jeng miu horei, ka ly miurei bo ka-rei awm i,

²²Tabynako i vui angpang bawibawi ly pakaura sa iy tabi bo. Tabynako i angpang ngierei ly pakaura sa nai ne.

²³Tokalawi ngan mang y tapang ai nai angpang dawn apomrei sa iy,

²⁴Angpang dawn ha harei i kheutang y panuira nyhrei pacho ai nai tangka panuira vui palyhrei sa bo.

²⁵Hunai kamta Tabynako i tosyh ngan mang tapang ai nai angpang dawn apomrei sa iy,

²⁶angpang dawn ha harei i kheutang y tangka panuira vui palyhrei sa bo.

²⁷Nidym ngan mang i Tabynako nithun mang tapang ai nai angpang dawn tariurei ai py,

²⁸nidym ngan taki nyhrei pakau ai nai angpang dawn nyhrei py sa bo.

²⁹Huni angpangchi ai kheutang y py, salo mang py, sengtlengchi hawi tabi typ bo; huni bo i taki nyhrei py, hunai kamta sa teang nai ne.

³⁰Hunai deaungkho y angpang dawnrei i kheutang y tangka panuira nyhrei awm i, angpang dawn tajarei hawi tangka panuira holai tariurei awm nai ne.

³¹Nichi ly Tabynako theung mang i angpang dawnchi i vui atleangrachi ai akasia dengkeaung ngan hawi sa u. Tabynako tokalawi ngan mang i vui atleangra pangrei,

³²tosyh ngan mang i vui atleangra pangrei hawi, nidym ngan mang i vui atleangra pangrei sa u bo.

³³Umtang i angpang laileaung atleangra ly Tabynako taki nyhrei y tem hai bo.

³⁴Angpangchi ai muku paleaung iy atleangrachi khaw ai nai muku sengtlengchi tai bo; atleangrachi ai py muku paleaung nai ne.

³⁵Nichi ly kanih ali hang nai ai an kamngau, an kamleng, an kamsen pathym nai beram mui, kalang mai ka-synchi hawi aneng iy kheruben mynchi thun nai ne.

³⁶Kanih ali khaw typ ai nai muku leangkhawn tai nai chengheng palyhrei ai ly Akasia dengkeaung ngan hawi sa u bo. Chenghengchi pado ai nai kheutang y tangka panuira palyhrei sa u nai ne.

³⁷Tabynako katheu pa-kho i vui kanih ali hang nai ai an kamngau, an kamleng, an kamsen pathym nai beram mui, kalang mai ka-synchi hawi aneng iy, mawi-en thun nai ne.

³⁸Huni kanih ali hang nai i vui chengheng pangrei sa iy, leangkhawnchi tai i, chengheng meaung hawi, chengheng kheutang ai muku paleaung bo; chengheng panuira kheu pangrei ai kheupaja hawi sa nai ne.