Read Khumi Chin THEU NAI 37 Bible Online

THEU NAI 37 - Khumi Chin bible

THEU NAI 37

¹Bezalela my ly akasia dengkeaung ngan hawi jeng miu nyh pa-thom ka-rei, ka miurei bo ka-rei, ka-sang ly miurei bo ka-rei awm nai Leu Maikawm Pawm sa bo.

²Leu Maikawm Pawm theung mang hawi angam mang ly muku an paleaung iy, teng taki ly muku hawi mawm hai typ nai ne.

³Pawm angjeaungra muku sengtleng palyhrei sa iy, kheutang taki palyhreira y muku sengtleng ha harei tai bo.

⁴Angjeaungra samtleang ai ly Akasia dengkeaung ngan hawi sa iy, muku paleaung bo.

⁵Leu Maikawm Pawm angjeaung ai nai samtleang nyhrei ai ly Pawmra i mang mang makeng nyhreira tai nai sengtlengchira thawi yb nai ne.

⁶Pawm khym ai nai muku tangcheng hawi jeng miu nyh pa-thom ka-rei, ka miurei bo ka-rei awm nai khym sa bo.

⁷Pawm khym i kachawn nyhreira y, muku tangcheng hawi kheruben myn nyhrei sa.

⁸Kheruben myn ai py Pawm khym hawi sa tabi ryp nai ne.

⁹Kheruben nyhrei ly mo atha leungtang iy, nini i pakhi kadai nai ly Pawm y deung meuh bo.

¹⁰Ni ly jeng miu nyhrei, ka miurei, ka-sang ly miurei bo ka-rei awm nai sabawi ai akasia dengkeaung ngan hawi sa bo.

¹¹Huni sabawi ai muku paleaung iy teng ka-ki ly muku hawi mawm hai typ bo.

¹²Sabawi takira peurei kambai awm nai mawmra sa iy, muku hawi mawm typ bo.

¹³Sabawi angjeaung ai nai taki palyhrei i kheuchira y, muku sengtleng palyhrei tai nai ne.

¹⁴Huni sengtleng palyhreichi ai ly mawmra sahawi y abiri iy tai bo.

¹⁵Angjeaungra samtleang nyhrei ai akasia dengkeaung ngan hawi sa iy muku paleaung bo.

¹⁶Sabawi ateaung samtang, sora, tuidym hawi kreip hang talam ai nai khauchi ly muku hawi sa nai ne.

¹⁷Ni ly maisi yhm kateang ai muku tangcheng hawi sa; maisi yhm panuira hawi kateang ai py, muku hawi sa nai ne. Huni maisi yhm kateangra y kaseaung paumyn, pau kangdai napi nai pau ka-puchi ly maisi yhm kateangra y sa tabi ryp bo.

¹⁸Maisi yhm phei pheirei mang y kateangchy thomrei, bawibawi tariurei sa.

¹⁹Kateangchy tariureira i ha hareira y, kaseaung paumyn, pau kangdaichi abawi nai baden pau hawi atawm nai, ka-pu kaseaung pau thomrei awm.

²⁰Maisi yhm kateang meaungra y paumyn, pau kangdaichi baden pau hawi atawm nai, ka-pu sa nai kaseaung pau palyhrei py awm.

²¹Kateang thomrei sala y kaseaung paumyn ha harei py awm.

²²Kaseaung paumyn sengreang hawi maisi yhm kateangchi ly tabi mei iy, muku hawi sa nai ne.

²³Ni ly maisi yhm kateang i vui maisi yhm saryhrei, tangkeih hawi maidym khauchi ai muku hawi sa.

²⁴Ni ly huni maisi yhm kateang hawi, huni i vui ateaung ngiereichi ai muku tangcheng sie horei hawi sa nai ne.

²⁵Ni ly rimui mui katui patawi ai nai akasia dengkeaung ngan hawi maicham sa; huni maicham ly jeng miurei, ka miurei, ka-sang ly miu nyhrei awm; maicham kachawn taki kamsuichi ly maicham hawi amtawn prei nai ne.

²⁶Maicham kangbai, teng kamki, kachawn taki kamsuichi ai py muku paleaung iy, maicham teng ka-ki muku tangcheng hawi mawm bo.

²⁷Huni maicham i makeng nyhreira y sengtleng nyhrei thawi ai nai, muku sengtleng nyh nyhrei tai.

²⁸Samtleang nyhrei ai akasia dengkeaung ngan hawi sa iy, muku an paleaung hai typ bo.

²⁹Ni ly tahm palyn nai asitui kachai hawi rimui mui katui tangcheng sa nai ne.