Read Khumi Chin THEU NAI 38 Bible Online

THEU NAI 38 - Khumi Chin bible

THEU NAI 38

¹Ni ly leng patlum nai maicham ai akasia dengkeaung ngan hawi sa; huni maicham ly jeng miu pangrei, ka miu pangrei, ka-sang ly miu thomrei awm.

²Taki palyhreira i kachawn kamsuichi ly maicham hawi sa patawm prei nai ne. Maicham verei y kheupaja hawi mawm typ bo.

³Ni ly maicham i ateaung alangchi ly maidym hawi thau kadeng nai laawm pangdai, khaileaung chawn, sora, leangkhawn hawi mai-ai kadeng nai laawmchi ai kheupaja hawi sa bawibawi nai ne.

⁴Kheupaja rumryh ly maicham ka-sang laileaungrei y tai bo.

⁵Kheupaja rumryh taki palyhreira y samtleang thawi ai nai sengtleng palyhrei sa.

⁶Ni ly samtleang nyhrei ai akasia dengkeaung ngan hawi sa iy, kheupaja hawi mawm typ bo.

⁷Samtleang ai ly maicham makeng nyhreira i sengtlengchira thawi yb bo. Maicham palauhau ai nai dengkeaung dawn hawi sa nai ne.

⁸Ni ly ARENG i awmra Tabynako katheu pa-khora y kalop tla nai neampachychi i, kheupaja khangpuichi hawi kheupaja rahum hawi panuira sa bo.

⁹Ni ly ARENG i awmra Tabynako tapang ai nai kanih alichi ai kalang mai ka-syn hawi sa; tokalawi ngan mang y tapang ai nai kanih ali hang nai ly miu chungvairei awm.

¹⁰Kanih ali vawn ai nai chengheng apomrei hawi panuira apomrei ai kheupaja hawi py, leangkhawn hawi katlangchi ai tangka hawi py sa nai ne.

¹¹Tosyh ngan mang i kanih alichi py, tokalawi ngan mang i kamta sa teang.

¹²Nidym ngan mang i jang ai nai kanih ali hang nai ly jeng miu vui pangrei awm iy, chengheng horei, panuira horei, leangkhawn hawi katlangchi ai tangka hawi sa bo.

¹³Katheu pa-kho awm nai Tabynako nisi ngan mang apai py, miu vui pangrei awm teang bo.

¹⁴Tabynako mang mang makengrei y, ka miu holai pangrei awm nai kanih ali hang nai hawi, chengheng thomrei, panuira thomrei awm bawibawi.

¹⁶Tabynako apai ka-ki verei jang ai nai kanih alichi ly kanih mai ka-syn hawi sa nai ne.

¹⁷Chengheng panuirachi ai kheupaja hawi sa iy, chengheng leangkhawnchi, katlangchi hawi chengheng meaung mymrachi ai tangka hawi sa; apai chengheng bawibawichi ai tangka katlangchi hawi patawm prei nai ne.

¹⁸Tabynako apai katheu pa-kho i vui kanih ali hang nai ai ly an kamngau, an kamleng, an kamsen pathym nai beram mui, kalang mai ka-synchi hawi aneng iy mawi-en ka-pu thun bo. Tabynako apai kanih alichi kamta katheu pa-kho kanih ali hang nai ly jeng miu apomrei hawi, ka-sang miu pangrei ne.

¹⁹Huni kani ali ai ly kheupaja panuira palyhreira y panui nai chengheng palyhreira y vawn typ nai ne. Huni i leangkhawnchi, chengheng mawm mymrachi hawi chenghengchi ai tangka hawi sa bo.

²⁰Tabynako hawi apai i vui khangmui bawibawichi ai kheupaja hawi sa nai ne.

²¹Leu sai horei tajiu typ nai lengseaung phei nyhrei reumera ARENG i Tabynako i vui teaung nai tamo ngan amynchi ly pathyp pi nai keung Aron i chapo Ithama my lu sa iy, Levi theaungchi my Mosi i leu pei nai kamta tajiu bo.

²²Juda theung Hura i katu, Uri i chapo Bezalela ly ARENG my Mosi teng y leu pei nai ngierei sa nai ne.

²³Ni ai sabawm nai keung Dan cheng theung i Ahisama i chapo Aholiaba ly mawi o-pangen nai kupe kakawp, ka-tawm myn sa kawp nai keung, an kamngau, an kamleng, an kamsen pathym nai beram mui, kanih mai ka-synchi aneng kawp nai khumi ne.

²⁴Tabynako i vui khumichi ly ARENG teng talam nai muku kaji bawibawi ly sie 2,508 rei awm.

²⁵Khumi amyn la achu nai khala, Israela chengchi teng i nga nai tangka kaji ly sie 8,628 awm nai ne.

²⁶Huni tangka kaji ly khumi amyn la nai khala kup naichi i pei achu nai tangkachi ne. Saneng apomrei hawi saneng apomrei leng neampacho vuikanai ly 603,550 rei awm nai ne.

²⁷Panuira harei y tangka kaji sie 83 rei awm riri iy, Tabynako hawi kanih ali jang nai chengheng panuira i vui teaung nai tangka kaji ly sie 8,571 rei awm.

²⁸Huni bo y palai rai nai tangka kaji 57 rei nai ly Bezalela my leangkhawnchi, chengheng meaung mymrachi hawi katlangchira teaung bo.

²⁹ARENG teng y talam nai kheupaja kaji ly sie 6,068 rei awm.

³⁰ARENG i awmra Tabynako katheu pa-kho i vui panuirachi, kheupaja maicham, kheupaja rumryh, maicham i ateaung alang bawibawichi,

³¹Tabynako apai hawi katheu pa-kho i vui panuirachi, Tabynako hawi apai ka-ki khangmui ngiereichi ai, huni kheupaja hawi sa nai ne.