Read Khumi Chin THEU NAI 39 Bible Online

THEU NAI 39 - Khumi Chin bible

THEU NAI 39

¹Meingtym Kachaira kalop sa nai pathyp pi nai keungchi amthyp nai, rym-ah awm apu parai nai ateaungchi ai, nichi ly an kamngau, an kamleng, an kamsen pathym nai beram mui hawi aneng u bo. ARENG my Mosi teng y leu pei nai kamta, Aron i vui pathyp pi nai keung ateaungchi sa pi nai ne.

²Pathyp pi nai keung i vui ephod ly kalang mai ka-syn, an kamngau, an kamleng, an kamsen pathyp nai beram mui, muku jyn hawi aneng.

³Nichi ly an kamngau, an kamleng, an kamsen pathym nai beram mui, kalang mai ka-synchira y muku phei kamporyp ai, muku vui seih iy aneng nai ne.

⁴Ephod ai suichi ai nai paleang asavanra vui nyhrei tai bo.

⁵ARENG my Mosi teng y leu pei nai kamta, kupe kakawp hawi aneng nai khobai, huni vawnchi hawi aneng iy, ephod hawi patawm mei bo.

⁶Nichi ly Kanelian lengseaung vang katengchi kata iy muku kriura y khai chum baly, hunira y Jakob i chapo leaung holai nyhrei amynchi tajiu typ nai ne.

⁷Nichi ly ARENG my Mosi teng y leu pei nai kamta, Israela cheng holai nyhreichi i jeng y, huni lengseaungchi ai paleang asavanra vui salo y tai nai ne.

⁸Nichi ly tangtaang adangra ai ephod sa nai ateaungchi hawi sa iy, mawi-en py hunai kamta sa teang.

⁹Huni tangtaang adangra ly tlip typ iy, jeng, ka ka-meaung ka ka-rei awm.

¹⁰Nichi ly huni tangtaang adangra tleaung y, vang kateng lengseaung lam palyhrei tai; angchei i lam y amia, topazi lengseaung, karnet lengseaung,

¹¹pa-nyh i lam y, emarakdim lengseaung, saphire lengseaung, diamond;

¹²pa-thom i lam y, huakintho lengseaung, kalkidon lengseaung, amethusto lengseaung;

¹³palyh i lam y, birula lengseaung, karnelian lengseaung, jasper lengseaungchi ne; hunichi ai muku kriu theung y khai me bo.

¹⁴Huni vang kateng lengseaung ha hareira y, amyn ha harei tajiu ai nai, lengseaung holai nyhreira Israela cheng holai nyhreichi jeng y, Jakob i chapo leaung holai nyhreichi i amyn tajiu typ nai ne.

¹⁵Nichi ly tangtaang i vui muku leangchi sa.

¹⁶Muku kriu nyhrei hawi muku sengtleng nyhrei sa iy, muku sengtleng nyhrei ai ly tangtaang adangra tleng mang i, taki nyhreira tai u bo.

¹⁷Muku leang nyhrei ai tangtaang takira i sengtlengra tai iy,

¹⁸takhra tawm katem nyhrei ly muku kriu nyhrei hawi sui mei bo. Hunai kamta muku leng ly ephod i paleang asavan nai vuichi i mo y tai nai ne.

¹⁹Nichi ly muku sengtleng nyhrei sa bi iy ephod hawi abiri nai, tangtaang adangra anui mang i taki nyhreira, theung mang y tai bo.

²⁰Nichi ly muku sengtleng nyhrei sa bi iy apu parai nai tangtaang adangra i leng, ephod i paleang asavan nai vui nyhrei mo i anui kyh y tai bo.

²¹ARENG my Mosi teng y leu pei nai kamta, tangtaangra i sengtlengchi ai, ephodra i vui kamngau hawi suichi nai deaungkho y, tangtaang adangra ly ahaw kathiu y naimy tangtaang adangra salo y khaw typ jo nai ne.

²²Nichi ly ephod anui y amchiu ai nai baichu kangjiu ly an kamngau pathym nai beram mui hawi sa u bo.

²³Huni baichu kangjiu i lu apaenra ly teng aphrai y ai nai, kanih ngan hawi mawm typ nai ne.

²⁴ARENG my Mosi teng y leu pei nai kamta, huni baichu kangjiu anui mang tawm kamkira y, an kamngau, an kamleng, an kamsen pathym nai beram mui, thaisi athai mynchi hawi muku syhryhchi pakhe iy tai u.

²⁷Nichi ly Aron hawi ni i chapochi i vui theung i baichu kangjiu,

²⁸lupeu, lukhym, kanih mai ka-syn phangphi,

²⁹an kamngau, an kamleng, an kamsen pathym nai beram mui hawi mawi-en thun nai khobai kanemchi ai ARENG my Mosi teng y, leu pei nai kamta sa u bo.

³⁰Nichi ly “ARENG i vui aau patyp bo,” nanai tajiu typ nai muku hawi sa nai lu athangra sa u bo.

³¹ARENG my Mosi teng y leu pei nai kamta, huni lu athangra lupeu tleaung y vui kamngau kalang hawi thangchi nai ne.

³²ARENG i awmra Tabynako molam sa nai kalop bawibawichi pajau angym be bo; ARENG my Mosi teng y leu pei nai ngierei Israela chengchi ly sa u nai ne.

³³Nichi ly Tabynako hawi huni i ateaung alangchi, leangkhawnchi, apang dawnchi, leangteaungchi, chenghengchi hawi anuirachi py,

³⁴an kamsen pathym nai beram katai peih tabiura, mawi peih kanem kanih ali hang nai tabiura py,

³⁵lengseaung phei nyhrei khai nai Leu Maikawm Pawm, angjeaungra samtleangchi hawi Pawm khym py,

³⁶sabawi hawi huni i ateaung alangchi, Tameuh teng y talam nai tako py,

³⁷muku maisi yhm kateang hawi maisi yhmchi, huni i ateaung alangchi hawi maisi hang py,

³⁸muku maicham, tahm palyn nai asitui, rimui mui katui hawi Tabynako katheu pa-kho i vui kanih ali hang nai py,

³⁹kheupaja maicham, kheupaja rumryh, angjeaungra samtleang, maicham i ateaung alangchi py, muku rahum hawi panuira kheu py,

⁴⁰Tabynako apai i vui kanih alichi, chenghengchi hawi panuirachi, Tabynako katheu pa-kho i vui kanih ali hang nai hawi vuinawnchi, Tabynako khangmuichi py, ARENG i awmra Tabynako angtheung mang i ateaung ngiereichi py,

⁴¹meingtym kachaira apathyp nai khala, pathyp pi nai keungchi amthyp ai nai rym-ah awm apu parai nai ateaungchi, pathyp pi nai keung Aron hawi ni i chapochi ateaung ai nai ateaung kachaichi py Mosi teng y tym hai u bo.

⁴²Israela chengchi ly ARENG my Mosi teng y leu pei nai ngiereichi sa u angym be bo.

⁴³Mosi ly nichi i sa chum nai ngiereichi ai hawihai palai khen i, ARENG my leu pei nai kamta nichi i sa u be nai ly niu nai deaungkho y Mosi my nichi ai amtheaung hai bo.