Read Khumi Chin THEU NAI 4 Bible Online

THEU NAI 4 - Khumi Chin bible

THEU NAI 4

¹Naibaly Mosi my, “Israela chengchi kai ai ym y, kai i leu py tangai y iy, ‘Nang ARENG ai niu nanai ly ny y leang,’ nanai thui u lawh baly kai mana sa ai mo?,” napi.

²ARENG my, “Nang i kiu y ati syn mo?” nanai deng. Mosi my, “Cheaungvawi syn,” nanai pathang.

³ARENG my, “Nang i cheaungvawi ly khaileaung y aphi,” napi. Naibaly Mosi ly cheaungvawi aphi nai khala pavui lawm nai deaungkho y ni ly jei i angpreng vui bo.

⁴Huna nai khala ARENG my Mosi teng y, “Meung iy pavui tamai y patiu,” napi. Mosi ly leu pei nai kamta pavui ai patiu i, cheaungvawi lawm teang nai ne.

⁵ARENG my Israela chengchi i mo y hina nai kamta ka-ym awm ai nai so pi; hunaibaly nang ly nichi i ARENG Tameuh, Abraham i Tameuh, Isaka i Tameuh, Jakob i Tameuh ai niu, nanai nichi ym u ai,” napi.

⁶ARENG my Mosi teng y, “Nang i kiu ly nangmy i baichu theung y tapo,” napi. Mosi ly leu tangai i tapo bo; kiu ajiu teang khala kiu ly keaungsi man i, ji kamta kaleung bo.

⁷Naibaly ARENG my, “Nang i kiu ly nangmy i baichu theung y atapo teang bi,” napi. Mosi ly atapo iy, kiu ajiu teang nai khala hawi teang i ngan kari lawm teang nai ne.

⁸ARENG my Mosi teng y, “Israela chengchi ly nang ai ym y, nangmy angchei i patei pi nai rengrang sa nai ym u y lawh baly, hini pa-nyh i rengrang sa nai ly ym u ai mang.

⁹Na i py nichi ly hini ka-ma-ra nyhrei niu iy ym y, nang i leu py tangai u y veangveang lawh baly Naing tavo tui deu iy, khaileaung y lei, tui ly thi lawm ai mang,” napi.

¹⁰Na i py Mosi ly “Aw ARENG, kai ai pato mo kyh; kai ly leu haidau by y, nangmy kai ai leu pei nai thym khala malawn py leu haidau by y, kai ly labeaung palai ham y nai ne,” napi.

¹¹Huna nai khala ARENG my, “Khumi ai ami my leu katheu hai mo? Khumi ai ami my kano pang hai mo? Khumi ai mei angvang hai nai, ti y baly mei paju hai nai keung y ami mo? Kai ARENG my ny y lawh sai a?

¹²Nang ly vaimy chei ly kaimy sabawm ai, nang katheu ai nai kai my kang thui pi ai,” napi.

¹³Na i py Mosi my, “Avo y leang ARENG, pahen parai naimy takhra leaungrei ai phai pato ba,” napi.

¹⁴Naibaly ARENG ly kado theu naimy Mosi teng y, “Nang ly Levi theaung khumi ngamjo Aron awm, nanai pany y nai sai a? Ni ly leu haiho awm, nanai kai kapany. Hini molam y ni ly nang hawi avum ai nai, vaimy nang teng y ang jeu dudu bo.

¹⁵Nang i thui hai ai nai leu ly ni teng y thui pi. Kai ly nangni mana thui ai nai tla mo, nanai kang thui pi ai.

¹⁶Ni ly Israela chengchi teng y thui pi ai nai awm nai ngierei, nang i jeng y thui pi ai. Ni ly nang i leu thui pi pateang nai keung lawm ai. Ni py nang i thui nai ngiereichi ai Tameuh i leu kamta palawn ai.

¹⁷Hini cheaungvawi syn jojo; nang ly cheaungvawi hawi rengrangchi sa ai,” napi.

¹⁸Naibaly Mosi ly ampu Jethro teng y vawi ali i ni teng y, “Kai ly Aikupta pri y kai i amjo amnauchi ai de ai nai kachei ai nai ngai,” napi. Jethro my chei ai nai paleung kahawi my pavum bo.

¹⁹Mosi ly Midian pri y awm nai thym khala y ARENG my, “Aikupta pri y vawi ali teang jau, nang ai padei ai hau naichi ly dei u be bo,” napi.

²⁰Naibaly Mosi ly aju hawi chapochi ai keaungngo kano kasau tleaung y tang i, Tameuh my syn hai nai cheaungvawi py syn iy, Aikupta pri y vawi teang nai ne.

²¹ARENG my Mosi teng y, “Vai nang ly Aikupta pri y vawi ali teang bo i, kaimy sa thai naira kang pei nai rengrang tlai naichi samrang i mo y so pi takengkei ba; na i py kaimy samrang i paleung tang hai ai; ni ly Israela chengchi ai theu ai nai pei ai ny y,” napi.

²²Huna nai khala nang ly samrang teng y, “Israela chengchi ly kai ARENG i chapo chalu ne.

²³Kai i chapo ly kai ai chiu ai nai molam chei hai ai nai leu kang pei i py, nang ly paka lawh; hunai deaungkho y kai ly nang i chapo chalu kapadei ai,’ nanai thui pi,” napi.

²⁴Naibaly Aikupta pri mang y tako nai meingtym hareira y tai i, ARENG ly Mosi ai padei ai nai tau bo.

²⁵Huna nai khala ni i aju Zipporah ly lengseaung bo awm nai la i, chapo i lengkhym takip pi iy, huni lengkhym hawi Mosi i kheu y tabei bo. Naibaly lengkhym takip nai molam y Zipporah my, “Nang ly kai i juvo tatang ne,” napi. Hunai deaungkho y ARENG my Mosi ai padei y nai ne.

²⁷Hunai thym khala ARENG my Aron teng y, “Nang ly Mosi hawi avum ai nai daichi ka-vym mang y chei,” nanai leu pei nai kamta ni ly chei bo. Ni ly Mosi ai ARENG i mawi kachaira y avum iy apachawm hawi bo.

²⁸Naibaly Mosi ly mymy ai pato nai keung ARENG i leu pei naichi hawi sa ai nai rengrang ka-ma-rachi py, Aron teng y amti pi nai ne.

²⁹Naibaly Mosi hawi Aron nini ly Aikupta pri y chei hawi i, Israela cheng lu sa naichi ai akachu hai bo.

³⁰Aron ly ARENG my Mosi teng y leu pei nai ngiereichi, Israela cheng lu sa naichi teng y thui pi iy, nichi i mo y rengrang ka-ma-rachi patei pi nai deaungkho y,

³¹nichi ly thui pi nai ngiereichi ym u bo. ARENG ly nichi teng y jeu iy, nichi i tlang tleaung y ana patheng nai sai pany pi bo, nanai thai nai khala, nichi ly ARENG ai lu meung iy chiu u nai ne.