Read Khumi Chin THEU NAI 5 Bible Online

THEU NAI 5 - Khumi Chin bible

THEU NAI 5

¹Huni bo y Mosi hawi Aron nini ly Aikupta samrang teng y chei hawi i ni teng y, “Israelachi ai ARENG Tameuh my, ‘Israela chengchi ly daichi ka-vym y Tameuh teng apathyp nai pawi sa ai nai molam, nichi ai chei ai nai pei,’ ang napi,” napi.

²Samrang my ly “Huni ARENG ly ami mo? Kai ly ati mana nai y huni ARENG i leu tangai iy, Israelachi ai chei ai nai pei ai mo? Kai ly huni ARENG ai pany y nai deaungkho y Israela chengchi ai pato pajau y leang,” napi.

³Naibaly Mosi hawi Aron nini my, “Hebrai chengchi i Tameuh ai kaini ly niu nai ne. Kaichi i ARENG Tameuh teng y apathyp ai nai kani thomrei ka-teng daichi ka-vym y chei ai nai pei tanga kyh; kaichi ly huna nai so y baly tavai keung y mo, no kanghawi y mo, kaichi ai ang padei ai,” napi.

⁴Huna nai khala samrang my Mosi nini Aron teng y, “Hini khumichi ai ati mana nai kalop pathlang hai ryry ai mo? Huni miseaungchi ai kalop phai so hai teang!

⁵Nangchi cheng ly Aikupta chengchi tleaung y nawi keh bo. Vai nangni ly nichi ai kalop anawn hai ai nai tau hawi lawh ly!” napi.

⁶Huni kani y my Pharao samrang ly Aikupta cheng kalop pacheang nai keungchi hawi Israela cheng kalop lu sa nai keungchi teng y,

⁷“Vai i dengdairei Israela chengchi ai iukhi paawp ai nai chohphi pei u moh; mychi hau iy tawn u ryp sy.

⁸Na i py angchei i iukhi sa nai jirei so u jojo sy; ati mo i py iukhi vuikanai jaw moh sy, nichi ly kalop pathlang u nai teu. Hunai deaungkho y nichi ly ‘Kaichi i Tameuh teng y apathyp ai nai pei!,’ nanai hnei u nai ne.

⁹Nichi ai kalop sa nai tleaung y so hai ra, den py anawn hai u moh. Huna khala naini nichi ly li-tapawp nai leu tangai ai nai rai y ai i, kalop phra ai ny y,” napi.

¹⁰Naibaly kalop pacheang nai keungchi hawi Israela cheng kalop lu sa nai keungchi ly Israela chengchi teng y chei u i, “Samrang my, ‘Kai ly nangchi ai chohphi kang pei y leang bo.

¹¹Nangmychi naimy chohphi nga thaira y hau u ryp, na i py iukhi ly angchei i sa nai jirei sa u jojo ai nai tla,’ nanai leu ang pei,” nanai amti pi bo.

¹²Hunaibaly Israela chengchi ly Aikupta pri verei y chohphi hau u nai ne.

¹³Naibaly kalop pacheang keungchi my, “Nangchi ly chohphi nga nai khala i kani tleirei iukhi paawp nai jirei, vai py nga ai nai tla,” nanai thui naimy Israela chengchi ai dei kangheng kalop sa hai u bo.

¹⁴Aikupta cheng kalop pacheang nai keungchi my Israela cheng kalop lu sa naichi ai khyh pakhau iy, “Vaini nangchi ly ati mana nai y angchei i jirei iukhi paawp u y lawh mo?” napi.

¹⁵Naibaly Israela cheng kalop lu sa nai keungchi ly samrang teng y chei u i, “Nang parai nai samrang awi, kaichi ai ati mana nai y hina nai sa lawh mo?

¹⁶Nang ly kaichi ai chohphi ka-leu pa-rei pei y naimy iukhi paawp ai nai tla, nanai leu pei bo; nang i saho y vai, kaichi ly khyh pakhau naira avum u lawh bo,” napi.

¹⁷Huna nai khala Samrang my, “Nangchi atho kasichi awi, nangchi i ARENG teng y apathyp ai nai hnei nai ly nangchi kalop pathlang ai ngai u nai teu.

¹⁸Kalop keung y phai amso u teang jau! Nangchi ai chohphi kang pei y leang; na i py angchei khala i jirei paawp u ai nai tla,” napi.

¹⁹Angchei khala i jirei iukhi paawp ai nai tla, nanai thai u nai khala, Israela cheng miseaung luchi ly mymychi patang naira avum ai nai apany u nai ne.

²⁰Nichi ly samrang teng i nai theu u nai khala, nichi ai ajeng nai Mosi nini Aron ai avum.

²¹Nichi my ly “Samrang hawi miteaung kehchi my kaichi ai niu ngai y ai nai, nangni sa hawi nai deaungkho y ARENG ly nangni ai pajeng sy; kaichi ai padei ai nai nangni ly nichi kiu y haisau au hawi lawh nai bo,” napi.

²²Naibaly Mosi ly ARENG teng y, “Aw Areng, ati mana nai hini khumichi ai patang hai lawh mo? Kai ai ati mana nai y pato nai mo?

²³Kai ly nang i leu pei nai kamta Pharao samrang teng y thui pi nai khala i dengdairei, ni ly nang i khumichi ai ana kalikachi bo. Na i py nang ly nichi ai ati sai py sabawm pi y lawh ly!,” napi.