Read Khumi Chin JOBA 1 Bible Online

JOBA 1 - Khumi Chin bible

JOBA 1

¹Uz pri y Joba napi nai khumi leaungrei awm; ni ly hawi naira angym i, Tameuh ai jei kaji nai khumi, hawi y naira asyn ai nai pany nai khumi ne.

²Ni ly chapo leaung saryhrei hawi chaniu leaung thomrei awm.

³Ni ly beram sang saryhrei, kula-iu sang thomrei, si paino sangrei hawi keaungngo kano kasau chungvai pangrei py nang nai ne. Miseaung neangneang py awm i, ni ly nisi pri verei y nangkeh nai khumi ne.

⁴Joba i chapochi ly akachu u iy, cha nei pawi kamki sa i, mychi i tuicho leaung thomrei ai py, huna nai pawira y jeu ai nai avawrei palau u reng nai ne.

⁵Pawi lui nai tleirei kani pa-nyh khawn y Joba ly kangthodyh ang thau iy, chapo chaniuchi i vui kachai sa nai kapathyprachi talam pi reng. Huna nai kamta Joba i sa nai sai ly mymy i chapo chaniu leaung leaungrei my, Tameuh ai dawndan y nai, mei aniu y nai kamngo so lawh na, nanai paleung mawn nai deaungkho y ne.

⁶Tameuh i mo y kani pri mang ichi[1]ahihawi nai neng kani tym nai khala, setan[2]py nichi hawi vanrei abawi teang.

⁷ARENG my setan teng y, “Nang ly ati sa mo? nanai deng. Setan my, Kai ly khaileaung pri y aki aleaung nai ne,” nanai pathang.

⁸ARENG my, “Khaileaung pri y hawi angym iy kai, Tameuh ai jei kaji nai, hawi y naira ai asyn ai pany nai khumi, kai i miseaung Joba kamta leaungrei py by y, nanai pany bo a?” napi.

⁹Setan my, “Joba ly ati sai py ngo y lawh teu baly, nang ai jei kaji naimy tahm khai na a?

¹⁰Nang ly ni hawi ni i yhm dengtheungchi ai py, ni i nang nai yhmtheaung katuichi ai py ama hai iy kry pi bo. Ni i sa nai ngiereichi ai amtheaung hai i, si painochi py kati leila pajau y na pa-rei, neangneang peung hai bo.

¹¹Nang ly ni i nang nai yhmtheaung katuichi ai chau hai lawh teu baly, ni ly nang ai mei ka-niu y my ang pasawi ai,” napi.

¹²ARENG my, “Ni i peang nai ngiereichi ai, nang i kiu tleaung y kang-au; na i py ni i tlang ai ly abi moh " napi. Naibaly setan ly mymy teng i nai leh vui bo.

¹³Kanirei nai khala Joba i chapo chaniuchi ly mychi i amjo kalen yhm y cha nei pawi sa nai thym y,

¹⁴khumi leaungrei ly Joba teng y ampreng i, “Kaichi ly sichi hawi li thawn nai khala, keaungngo kano kasauchi ly sahawi y teicha tlai nai ne.

¹⁵Huna nai thym y Seba chengchi[3]ly, vaimy tym u iy ang tiu miu i, tawnbawichi ang lawm pi pawn na bo. Nichi ly nang i miseaungchi ai padei pawn i, kaimy leaungrei naini tleaung khyh; huna nai y areng nang teng y kang jeu iy, satang kang thai hai nai ne.” napi.

¹⁶Huna nai huni khumi my thui pi i, leu tem y rai khala my takhra miseaung leaungrei tym i, “beramchi hawi beram typ nai keungchi ly alipakang tla hai i, dei u be bo; kaimy leaungrei naini tleaung khyh i, areng nang teng y kang jeu iy, satang kang thai hai nai ne,” napi.

¹⁷Huna nai huni khumi ny thui pi i, leu tem y rai khala my takhra miseaung leaungrei tym bi i, “Khalide[4]damra kamkawm thomrei ly kaichi ai ang tiu i, kula-iuchi la pawn bo; nang i miseaungchi ai padei pawn nai deaungkho y, kaimy leaungrei naini tleaung khyh i, areng nang teng y kang jeu iy, satang kang thai hai nai ne,” napi.

¹⁸Huna nai huni khumi my thui pi i leu tem y rai khala my takhra miseaung leaungrei tym taleang bi i, “Areng nang i chapo chaniuchi ly nang i chapo kalen i yhm y cha nei pawi sa u nai thym kha,

¹⁹daichi ka-vym mang dengdairei ali kamchai tym. Huni ali kamchai molam y yhm anawi i, nichi bawibawi ly dei be bo; kai leaungrei naini tleaung khyh i, areng nang teng y kang jeu iy, satang kang thai hai nai ne,” napi.

²⁰Huna nai khala Joba ly mymy i ateaungchi sei vui bo. Sam py avau vui iy, khaileaung y ambeu i chiu sa.

²¹“Kai ly tapen nai khala beng tlairei, beng tlairei kadei ai; ARENG my ang pei i, vai ly la ali teang nai bo; mymy i amyn ly taham hawi sy,” nanai thui.

²²Joba ly huna nai leaungsaichi avum lawh teu i py, Tameuh i tlang tleaung y labeaung hawi malawn py tamang y nai ne.