Read Khumi Chin JOBA 10 Bible Online

JOBA 10 - Khumi Chin bible

JOBA 10

¹Kai ly khaileaung pri y heng nai kapaleih na bo. Paleung no-ei naimy kai i tangam nai tangai pi kyh ba.

²Aw Tameuh, kai i kamngo pajeng moh kyh ba. Kai i kamngo nai sai thui pi kyh ba.

³Nang i hina tanrei ana nai ly avo na a? Nangmy i sa nai sai ai paso y a? Khumi hawi y nai katauchi ai ly khen i, panuiyhm ai nai avo y a?

⁴Nang ly ati cheaungkhang ai khumichi niu nai kamta, niu teang lawh sai a?

⁵Nang i heng nai ly kaichi i heng nai kamta, deung dawi sai a?

⁶Hunaibaly ati mana nai y, kai i kamngo awm nai ngireichi hawi, kai i tamang nai ngiereichi ai chih lawh mo?

⁷Kai teng y kamngo by y nai hawi, kai ai nangmy kiu i nai amimi py, atleu pajau y, nanai nang ly pany nai ne.

⁸Nang i kiu my ly kai ai mo-cha palum pi. Vai, huni kiu my ly kai ai taphra lawh.

⁹Nang ly kai ai khaileaung hawi sa palum pi, nanai pany jo ba. Kai ai taphra vui iy, spryh lawh hai teang ai a?

¹⁰Nang ly kai i ampo teng y sa thai naira haiho pei iy, kai ai khumicho amlawn hai; kai ai amhm i taku theung y angpa hai bo.

¹¹Nang ly kai i tlang ai hiu hawi athovuichi sa naimy, huni hiuchi ai ngan hawi peih mym hai bo.

¹²Kai ai paheng iy khaw parai nai tamen naira amteng hai ba. Nangmy khen kry nai deaungkho y kaheng nai ne.

¹³Na i py huni neng thym thang y, nang ly kai i tlang tleaung y patang naira tym hai ai nai, paleung theung y dawn naimy awm, nanai vai, kai pany bo.

¹⁴Nang ly kai i kamngo pahen y naimy khai ai nai, kai mana khala sa tamang ai mo, nanai khen ajeng ryry lawh nai ne.

¹⁵Kai kamngo sa tamang kyh nai dengdairei, nang ly kai ai bawi la ryp bo. Na i py kai, kateng sa nai khala py, kai ly meimai ngo y. Kai ly paleung atho di iy, kangji nga nai ne.

¹⁶Kai, nang chawn nai khala, nang ly khrangsi kamta, kai ai preng iy patiu. Kai i tlang tleaung y no nga hai ai nai, rengrang nairachi malawn py sa.

¹⁷Nang ly kai i molam y avawrei, hawi y nai pany hai nai keungchi patei. Kado theu naira ly nawira nawira bo. Nang ly kai ai avaw avawrei tiu nai ne.

¹⁸Aw Tameuh, nang ly ati mana nai y, kai ai tapen lawh mo? Kai ly ami py niu y rai khala my, kadei veng ai nai ngai alam.

¹⁹Amhm taku theung i dengdairei, tapreaung angawm y kachei praw nai ly tapen y naimy awm nai hawi vanrei lawm ai.

²⁰Kai i heng nai ly tem ai nai kasa bo ny y a? Kai ai kaimy tlairei khai su ba! Heng ai awm rai nai neng kani khala ly amo theu naimy awm ai nai pei ba.

²¹Kai ly panum na iy, vengpang naimy khiu cheng nai pri, kangvang malawn py kaveng lawm iy,

²²vengpang nai pri y kachei ai bo. Mana khala py vawi ali teang ai ny y leang bo.