Read Khumi Chin JOBA 11 Bible Online

JOBA 11 - Khumi Chin bible

JOBA 11

¹Leu neangneang katheu nai ly tlau y naimy awm ai nai avo na a? Leu peung nai tleirei ly amy i kamngo lawi pajau na a?

³Joba awi, kaichi ly nang ai leu pathang teang pajau na a? Nang i katheu ngaulau nai molam y kaichi awm pypy ai, nanai nang athang khai a?

⁴Nangmy, “Kai i katheu nai leuchi ly teng; kai ly Tameuh i mo y kamngo by y,” nanai thui lawh.

⁵Tameuh my nang ai leu pei teang ai nai kangai hai lawh ly!

⁶Mymy i cheng nai ly thiu parai nai sai, khumichi i cheng naira hawi pho pajau y na pa-rei, thiu parai naichi ly nang teng y ang thui pi ai mang. Tameuh ly nang i tlang tleaung y pajeng ai ataing nanai teu i py, nang ai kamngo pajeng nai ly di hai ai.

⁷Nang ly Tameuh i sa thai naira hawi nang parai nai sai ai pata pajau na a?

⁸Kani khusang malawn py, Tameuh ai pajyh patleh pajau y; na i py nang ly kani mang y tym thai y leang. Tameuh ly tavau pri satang pany; na i py nang ly pany y leang.

⁹Tameuh i nang parai nai sai ly khaileaung pri tleaung y kau i, suida pangli tleaung y py kau.

¹⁰Tameuh ly nang ai ang patiu iy angchih lawh baly, mymy ai ami paka pajau ai mo?

¹¹Tameuh ly awm ngaulau nai khumichi ai pany; nichi i hawi y sa nai saichi py niu se nai ne.

¹²Keaungngo kano kasau karam ly neaung hawi nai keaungngo kano kasaucho tapen khala naini, khumi hawi y nai ly tau cheng ai.

¹³Joba awi, nang ly paleung amtlau iy, Tameuh teng y ahihawi ba.

¹⁴Hawi y naichi ai nang i yhm i nai patheu pawn veng ba.

¹⁵Naibaly vam parai nai hawi my, mipui theung y tahm awm naimy abawi pajau ai.

¹⁶Huna nai khala nang ly jangni y avum nai, tui my lemheu nai ai tami veng nai kamta, amy i ngari kamtangchi py tami veng ai.

¹⁷Nang i heng nai ly kanithun teng nai kani tleaung y malawn py, angvang keh ai. Veng nai neng py khutawi mo kamta, angvang phang ai.

¹⁸Nang ly tlamsa naimy awm iy, athang khai naira awm ai. Tameuh ly nang ai ang kry iy, ka-kawm rym hai ai.

¹⁹Nang ly mani paleung ka-e ai py, jei hyn ai ny y. Khumi mipuichi malawn py, nang teng y kasabawmra hnei u ai.

²⁰Na i py khumi hawi y naichi ly paleung phra athosi nimy, lawi tleaungra lam hau i py, niu u ai ny y. Nichi i athang khai naira harei ly dei naira ne.