Read Khumi Chin JOBA 12 Bible Online

JOBA 12 - Khumi Chin bible

JOBA 12

¹Nangchi aeu u nai ly khumichi i aeu nai raawi ne. Nangchi dei nai khala, tau kacheng py nangchi hawi vanrei tama ai.

³Na i py nangchi ka-tawm, kai py tau cheng nai ne. Kai ly ami mana mo i py, nangchi tleaung y theang y leang. Nangchi thui nai leuchi ai ly khumi lutengchi my pany.

⁴Vai ly kai i ahawi ka-dawichi my malawn py, kai ai ang panui hai bo. Kai ly hawi nai ne iy, kamngo by y nai khumi lawm i py, kai ai nichi my panui hai. Na i py vaichi khala, Tameuh ly kai i chiu sa hnei takeng nai ang tangai pi reng nai ne.

⁵Ngari kamtang avum y nai khumi ly kai ai thui preaung u bo. Atheng nai khumi ai atlym pa-rei nui u moh.

⁶Kangviu damrachi hawi tameuh by y nai khumichi ly mymychi i atho haiho naini, a-ym nai khumichi ne i py, tlamsa naimy awm u nai ne.

⁷Tavochi hawi tawnbawichi teng i malawn py, nangchi amtiu ai naira neangneang awm.

⁸Kacheng mawi, tui mawichi teng i cheng naira hnei u.

⁹Nichi bawibawi ly mymychi ai ARENG my sa nai ne, nanai pany u.

¹⁰Heng nai amjy cheaungkhangchi i, hengra lam patei nai keung ly Tameuh ne. Khumi luteng i hengra ly mymy i kiu tleaung y awm.

¹¹Na i py palai ly teicha teinei pateang nai kamta, kano py leu raawi tangai patawm reng nai ne.

¹²Miteaung acheang naichi ly tau cheng naira angym; na i py Tameuh ly tau cheng naira hawi, sa thai naira angym nai ne. Tameuh ly pany thai praw nai cheng naira hawi sa thai naira haiho angym nai ne.

¹⁴Tameuh my taphra nai ai ly ami my sa palum teang thai ai mo? Tameuh my kawm nai khumi ai ly ami my su pajau ai mo?

¹⁵Tameuh my kani nai hai y baly kani khang. Kani khri pa-rei taawi hai baly tui len nai ne.

¹⁶Tameuh ly sa thai naira haiho len parai nai deaungkho y, eaung naira nga hai jojo. Tapawp nai khumi hawi, katapawpra avum nai nini leaung nyhrei malawn py, mymy i kiu tleaung y awm.

¹⁷Mymy ly peang nai keungchi ai, tau cheng naira dyhp hai iy, mipui i lu sa naichi ai kamthu kamta sa hai bo.

¹⁸Samrangchi ai samrang i nai pala iy, paeung vui bo

¹⁹Pathyp pi nai keungchi hawi sa thai naira haiho awm nai khumichi ai panem vui bo.

²⁰Ka-ym awm nai khumichi i labeaung tamym vui iy, miteaung ka-cheangchi i tau cheng naira la pi veng bo.

²¹Sa thai naira awm nai khumichi ai kangji pei iy, mangchochi i haiho jum hai bo.

²²Mymy ly vengpang nanai meingtymchi ai angvang hai.

²³prichi ai len hai iy khaw hai; na i py nichi ai sum hai iy phra hai bo.

²⁴Mymy ly mipui lu sa naichi ai ka-khum lawm hai chum baly, tawm-mo pany hai y i, lam tamang iy ajau hai.

²⁵Nichi ly kaveng theung y patham iy, mhm-rah nei ala naichi kamta, tapai tamang naimy tako u bo.